Jonás 3 - Chuj San Sebastian Bible

Snajnac sb'a eb' 'aj Nínive

¹ 'Ix yaln pax Jehová 'a Jonás 'a scha'ejmal 'ixtic:

² —'Ixc 'a niwquil chon̈b' Nínive, tzlajw cha, tzaln 'el tastc 'oj wal 'aych tic, xchi.

³ Xlajw cha, 'ix 'at Jonás 'a Nínive, 'icha wal 'ix yutj Jehová yaln 'a 'a. A jun chon̈b' cha, caw wal niwquil chon̈ab'. 'Oxe c'u ste'nb'il smasnil yol chon̈b' cha.

⁴ 'Ix 'och Jonás 'a yol chon̈b' cha, 'a b'ab'l c'u 'ix yaln 'ixtc 'a caw 'ip. ¡Yic wal chawn̈q'uej ticnec, 'oj lajwc 'el chon̈b' Nínive tic! xchi.

⁵ Ax eb' 'anma cajn 'a jun niwquil chon̈b' cha, eb' 'ichm 'anma' yet' eb' 'unin, 'ix ya'ch eb' sc'ojl 'a Dios. 'Ix 'och eb' 'a c'ajb'c'ojlal, 'ix ya'n 'och eb' te pichl n̈achtac sat, 'ixta xyutj eb' sch'oxn 'el scusc'ojlal yuj smul.

⁶ A yic xc'och yab'xil jun tic 'a win sreyl Nínive cha, 'ix q'ue wan win 'a sdespacho, xyi'n 'el spichl yic sreyl 'aych yu'uj, ax te n̈achtac sat xya'chi, x'em wocn win 'a scal stan̈l c'ac'.

⁷ Xlajw cha, xya'n win rey b'o jun ley yet' eb' 'ay yopiso yet'oc, xya'n alxoc 'el 'a smasnil yol chon̈b' Nínive. Xchi jun ley chi 'ixtic: May cab' junc on̈ec tzon̈ wac ticnec, may pax cab' junc on̈ec, tzca'c wa qui wacax, qui calnelu, may no tzca'c yuc' a'.

⁸ Palta a quiquec to tzca'c 'och te pichl n̈achtac sat, yic tzqui ch'oxnec 'eli, to tzon̈ cusi, yet' pax no cajb'en noc'. Leslw coyc 'a Dios yet' 'a smasnil quip. Tzlajw cha, tzcactnec qui b'on smasnil maysch'olnil tzlaj qui b'o'ec, man̈x quixtquec eb' 'anma'.

⁹ Toq'ue tzat tztac' sjeln Dios snab'en 'a q'uib'n̈ec, yic tz'och wan yowl sc'ojol, toto 'ixta', matz on̈ chamec, xchi win rey 'a jun ley cha.

¹⁰ A yic xyiln Dios sjeln eb' 'aj Nínive snab'en, 'ix yactn can eb' stu b'eyb'al, yuj cha, 'ix sjeln snab'en 'a yib'n̈ eb' 'anma cha, xyalni to mant 'oj yac' lajwc 'el jun chon̈b' cha, 'icha xyutj ya'n alxc 'eli.