Jonás 2 - Chuj San Sebastian Bible

A slesl Jonás

¹ A yic 'ayc' Jonás 'a yol sc'ojl no chay cha, 'ix leslwi 'a Jehová sDiosal.

² 'Ix yaln 'ixtic: A wal 'a scal in yailal in 'awj 'aych Mamin Jehová. Ach ta'w 'ayin, yic 'ayn 'ec' wal 'a xab'l yich yet'l chamel. Ata in 'awj 'ayach, 'ix ab'n tas xwala.

³ Wal 'a xab'l yich a mar in a julcn 'ati, smasnil a a tzb'eyi, 'ix yoych sb'a eb' a 'ayin. A eb' a niwc a', xmayy 'ec' a 'a wib'an̈.

⁴ A 'ix wutj walni, tox in a julcn 'el 'a ojltac 'a jun 'ejmn̈ej, a xin na'a, to man̈x 'oj wil atut to ec yaji.

⁵ In 'em'ch 'a snajtil yich a mar, 'ijn in ji'wi. 'Ix 'och b'a'n jun tzo'n̈ c'ultc 'ay 'a yojl a 'a in jolom.

⁶ In 'em'ch can 'a yich eb' lum witz 'a yojl a a cha. A walni to jun 'ejmn̈ej in macx can 'ejmi, palta ach tic Jehová, in Diosal ach, xin a colcn 'el 'a yol sc'ab' chamel.

⁷ A wal yic wan slajw in q'uinl xwab'i, ach in nan cot Mamin Jehová. 'Ix c'och in lesl 'aych 'a atut to ec yaji.

⁸ A eb' tzlaj 'och tza'n yuj jun tzo'n̈ yechl tzalx 'och diosal, tzpatquilj can 'el eb' a wach'c'ojlal.

⁹ Palta an xo tic, tzwal yuj diosal 'ayach. 'Oj wac' in xajmb'al, ax in yiclni 'aj 'ix wac' in ti 'ayach. Cojn ach tztac' a colwj Mamin Jehová, xchi Jonás.

¹⁰ Xlajw cha, xya'n Jehová xejc q'uet no chay win Jonás chi 'a sti a mar.