Jonás 1 - Chuj San Sebastian Bible

'Atnc Jonás 'elc 'a Dios yalni

¹ 'Ay jun winc Jonás sb'i, yunnal Amitai, 'ix paxtin Jehová 'a 'a, 'ix yaln 'a 'ixtic:

² 'Ixc 'a jun niwquil chon̈b' Nínive, tzaln yab' eb' 'anma ta', to 'oj in satl jun chon̈b' chi yet' smasnil eb' cajn 'a 'a, yujto 'ix niwtj smaysch'olnilal eb' 'ayin, xchi Dios.

³ Palta ax Jonás, ma'ix syiclj 'a Dios, a yico', to 'ix 'at 'elc 'a 'a. 'Ix 'atcn 'a chon̈b' Tarsis yalni, yuj cha, 'ix 'at 'a jun puerto 'ay 'a sti a mar 'a Jope. Ata x'ilchj jun barco yu'uj, wan s'at te 'a Tarsis cha. 'Ix stojn spasaje, xlajw xoj cha, x'och 'a yol barco, 'ix 'ati, yic tz'at 'elc 'a Jehová yalni.

⁴ Palta ax Jehová x'a'n cot jun niwquil 'ic' caw ow 'a yib'n̈ a mar cha, caw wal 'ijn tzpoj te barco chi yuj jun 'ic' cha.

⁵ Ax eb' ch'umn barco cha, caw xiw chan̈ eb'. Junjn eb' 'ix laj yal sb'a eb' 'a sdiosal. 'Ix syamn 'och eb' sjuln can 'at yictz te barco chi 'a yojl a mar cha, sec tzseb'b' yal-l te'. Palta ax win Jonás, tox x'ejm win 'a jun cuarto 'a 'aj 'ay syamc'ab'il te 'a yalan̈, ata waync winac.

⁶ Ax win capitan̈ yic te barco cha, 'ix 'ejm win 'a 'aj 'ayc' Jonás, xyaln win 'ixtc 'a 'a: —¿Tas tza b'o 'a tic ach waynoc'? ¡Q'uen̈ wa'an, leslwan̈ 'a a Diosal! Toq'ue tzat 'o'ch sc'ojl 'ayn̈ec, ax qui colchjec, xchi winac.

⁷ 'Ix yaln eb' ch'umn barco chi 'a junjn 'ixtic: —A ticnec, ca'c 'och b'ul, sec wach' 'oj nachjoc 'el cujec mach 'ay smul, yuj cha, tzjaw jun tic 'a quib'n̈ec, xchi eb'. Xlajw cha, 'ix ya'n 'och eb' jun b'ul cha. Ax x'aji 'ix can 'a yib'n̈ Jonás chajtlto yu'uj 'ixta tz'aj eb'.

⁸ Yuj cha, xyaln eb' 'ixtc 'a 'a: —Al 'ayon̈ tas yuj tzjaw jun tic 'a quib'n̈ec. ¿Tas opiso, yuj cha, tzach cot 'a tic? ¿'Ajtil ach coti? ¿Tas sb'i a chon̈ab'? ¿Tas 'anmal ach? xchi ewin 'a 'a.

⁹ 'Ix ta'w Jonás, 'ix yaln 'a ewin 'ixtic: —An tic hebreo in. A 'a Jehová sDiosal satcha'an̈, ata tzwal in b'a, atn jun b'ojnac a mar yet' lum lu'um, xchi.

^10-11 'Ix yaln pax Jonás 'a eb' ch'umn barco cha, chajtlto wan s'at 'elc 'a Jehová. A yic xyab'n eb' to 'ixta', xyiln pax eb' to caw yelc'ojlal tzcot yowl a mar cha, yuj cha, caw 'ix wach' xiw eb' si'mb'il, 'ix sc'a'nb'n pax eb' 'ixtc 'a 'a: —¿Tas yuj 'ixta tza b'o'o? ¿Tas wach' tzach cutj ticnec on̈, sec tz'och numn a mar tic? xchi eb'.

¹² —Julnec can 'at 'a yojl a mar tic, sec 'oj 'och numn a'. Wojtac, chajtlto wu'uj tzjaw jun tic 'a q'uib'n̈ec, xchi Jonás cha.

¹³ Ax eb' ch'umn barco cha, 'ix yac' eb' yip sch'umn 'at te', sec tz'el'ch eb' yet' te 'a 'aj 'ay sti lum lu'um, palta man̈xtoc stac' yuj eb', yujto caw yelc'ojlal tzowb' chan̈ a mar cha.

¹⁴ Yuj cha, 'ix tew eb' 'a Jehová, 'ix yaln eb' 'ixtic: Mamin Jehová, man̈ on̈ a satl yuj schamlil jun winc tic, 'icha tz'aj scham eb' milm cham 'anma', yujto ach tic Jehová, wan a b'on 'icha tas nab'il o'oj, xchi eb'.

¹⁵ A yic xlajw yaln eb' jun tzo'n̈ cha, 'ix sjuln 'at eb' Jonás 'a yojl a mar, ax a mar cha, 'ix 'och numn a'.

^16-17 Palta ax Jehová, lista xo yaj jun no niwquil chay yu'uj, yic tzb'u'x 'ejm Jonás yuj no'. 'Oxe c'u 'oxe 'ac'wl xcan Jonás 'a yol sc'ojl no chay cha. A yic xyiln eb' ch'umn barco to x'och numn a mar cha, caw wal xiw eb' si'mb'il 'a Jehová, xya'n eb' xajmb'al, xlajw cha, xya'n eb' sti 'a 'a.