Job 8 - Chuj San Sebastian Bible

¹ Xlajw cha, 'ix ta'w win Bildad 'aj Súah, 'ix yaln win 'ixtic:

² ¿B'a'n̈to wal 'oj 'och wan aln jun tzo'n̈ a paxti tic? A tas wan aln tic, lajn wal 'icha jun 'ic'n̈ab' caw ow.

³ A Dios tztac' yuj smasnil, may 'aj tzjelmtej tas tojol, may 'aj tzyij 'ec' smacl junc mach.

⁴ A eb' onnal cha, tecn 'ay smul eb' x'och 'a Dios, yuj cha, xya'n jawc yailal 'a yib'n̈ eb'.

⁵ Ach tic, comnoc wal tza'ch a b'a 'a yol sc'ab' Dios tztac' yuj smasnil, al a b'a 'a 'a, comnoc tz'o'ch sc'ojl 'ayach.

⁶ Toto yel wach' a nab'en tzyila, tojl tzotj a b'a 'a sat, 'oj ach stan̈woc, ax ya'n pax smasnil tas ec xon yaj 'icha 'a yalan̈.

⁷ Wach'xam 'ay tas 'aych xon 'a yic yalan̈, palta a tas 'oj 'ajxoc pax 'ayach, man̈x lajnoc yet'oc, yel xo wal niwn tas 'oj a cha'.

⁸ C'anb'j 'ec' ab'i', tas 'e'nc eb' 'anma 'a pecti', tza cuyn jun tzo'n̈ sjelnal eb' 'anma 'e'nc 'a pecti cha.

⁹ An̈ec tic, 'icha to 'ewt on̈ jawc 'a yolyib'n̈q'uinl tic, mant 'a jac tas cojquec; ax jab' qui q'uinlec 'a sat lum tic, lajn wal yec' 'icha wewen.

¹⁰ Palta ax eb' 'anma 'e'nc 'a pecti cha, til wal tas wach' a cuyn can 'a spatc eb'.

¹¹ A te b'alal yet' te papiro, cojn 'aj 'ay a a', ata wach' sq'uib' eb' te'.

¹² Palta q'uinloc tztup chan̈ a a cha, ax te c'ultc cha, tztacj 'el te', wach'xam may mach tzu'n 'el te', c'un stacj 'el te 'a yib'n̈ jun tzo'n̈ xo te c'ultac.

¹³ 'Icha jun tzo'n̈ c'ultc cha, 'ixta tz'aj eb' 'anma maysch'olnil tas tzb'o'o, atn eb' tzyac' sat sc'ojl 'a Dios; ax tas cob' 'aych yipc sc'ojl eb', 'oj lajwoc 'ejmi.

¹⁴ A tas cob' 'aych yipc sc'ojl eb' cha, lajn 'icha jun tzo'n̈ ch'alxim.

¹⁵ Q'uinloc cob' 'ay mach tznib'j can yamn 'a junc ch'alxim cha, toc 'ay yip jun cha; q'uinloc tzon̈ can t'un̈n 'a 'a, ¿tom ma'oj t'ucchjoc?

¹⁶ A eb' 'anma maysch'olnil snab'en, lajn eb' 'icha junc te snichte tzpo'chj yuj yoc c'u, chucx lum lum 'aj tzpa'x chan̈ te sat cha.

¹⁷ 'Ay te tzlaj 'at sch'an̈lyib' 'a slot'l q'ue'en, ax 'a yib'n̈ q'uen q'uen chi tzq'uib' cha'an̈.

¹⁸ Palta q'uinloc 'ay mach tz'ec' to'nc chan̈ te', man̈x 'a mach 'oj nanc coti, toto 'e'nc te ta'.

¹⁹ 'Ixtnta tz'aj junc c'ultc chi sat 'ejmi, ax 'aj tzto'x q'uet cha, chucx te c'ultc chi tzpa'x chan̈ ta'.

²⁰ A Dios matz patquilj can 'el junc mach tojl snab'en, matz colwj pax 'a mach to tu tas tz'el sb'oni.

²¹ Toto tza na a b'a, 'oj ach yac' tzewjoc pax jun 'ejm xo, ax ya'n a tzaljc'ojlal a paxtini.

²² A eb' 'ajc'ojl yajch 'ayach, 'oj q'uixwc 'el eb', ax yatut eb' maysch'olnil snab'en cha, 'oj lajwoc 'ejmi, xchi Bildad 'a Job.