Job 7 - Chuj San Sebastian Bible

¹ An̈ 'anman̈ cajn on̈ 'a sat lum tic, lajn wal cab'n syal 'icha junc soldado mto 'icha junc 'anma 'aych mosoal 'a spatron̈.

² A junc moso cha, comnoc yajn̈ej tzq'uic'b' mu'c 'a snab'en yic tz'ilji, mto 'icha junc munljum caw tznib'j schaj stojl muc'uc.

³ 'Ixta xwutj in b'a yet' in yailal, to niwn yujl xwab' syail; 'a junjn 'ac'wal 'ay in cusc'ojlal.

⁴ A yic tzin waycn 'ejm 'a junjn sq'uic'b'alil, caw wal tznajtxb'i yec' 'ac'wl chi tzwab'i; caw tzin tzactzj in teltn 'eq'ui, may b'a'n̈ xon tzsacb'i; yuj cha, tzwaln 'ixtic: ¿Janc' wal 'oj in q'ue wa'an? xin chi.

⁵ Ax in niwnal, caw wal 'ayx 'och yayil, tzlaj 'el spojwal sat in yab'il cha, caw wal 'ayx in jab' yet'oc.

⁶ A 'in q'uinal, caw wal ji'lti sb'ey tzwab'i, lajn wal sb'ey 'icha junc jul-lab' b'ey ch'al tzc'an eb' jalum, yuj cha, to tzlajw c'och in q'uinal, man̈x 'a tas 'aych yipc in c'ojol.

⁷ Ach in Diosal, na cot nab'an to a jab' in q'uinl tic, lajn 'icha yic tzyi'n junc mach yic' jun 'ejmoc, 'ixta yeq'ui. Man̈x b'a'n̈ 'oj wil jacx tzaljc'ojlal 'a tic.

⁸ A eb' tzin 'iln 'och ticnec, man̈x b'a'n̈ 'oj in yilch eb'; wach'xam cob' 'oj in sayx 'eq'ui, palta man̈x 'oj wilchji.

⁹ 'Icha tz'aj satchan̈ 'asun yic tzc'achwi, 'ixta tz'aj sat 'ejm junc 'anma', yic tz'at mucxoc can 'a campusan;

¹⁰ man̈x b'a'n̈ tzc'ochx 'a yatut, man̈x 'aj 'oj yilch sb'a yet' eb' yican.

¹¹ Yuj cha, ma'oj stac' in macn in ti'. 'Oj wal in b'a yuj in yailal, yujto an wal tzwab' syail.

¹² Mamin, ¿tom lajn in 'icha junc no lagarto 'a yojl a mar tzela, yuj cha, tza'n 'och in tan̈mal?

¹³ A yic tzin nan 'ixtic: Tecn wach' 'oj in way jac 'a sat in ch'at, sec toq'ue tz'och wan jac in yailal tic yuj in wayn̈ cha, xin chi,

¹⁴ palta ax tz'aji, cojn waych tzac' wila'; tzin a xib'tn 'a in waych cha.

¹⁵ Yel xo am wach' tzin a pitz' chamoc; wach' cab' to tzin chami.

¹⁶ Man̈xtzac techj wuj tzwab'i, nab'a xoj pitzn in. Man̈x in extoc. A 'in q'uinl tic, lajn tz'aj yec' 'icha yic tzyi'n junc mach yic'.

¹⁷ ¿Toc 'ay quel'ch an̈ 'anman̈ tic? ¿Tas cob' yuj tzach 'och 'il cuj on̈?

¹⁸ ¿Tas yuj cob' an̈ja on̈ a tan̈wni 'a junjn c'u, junjn 'ip tzon̈ a'lni pax prowal?

¹⁹ ¿Tas yuj matz ej 'el a sat 'ayin, comnoc tzin actjcan junc rato yic tzin b'u'n 'at jac yal in ti'?

²⁰ Ach in Diosal stan̈mal 'anma aji, toto tz'och in mul 'ayach, ¿tom tzab' syal yu'uj? ¿Tas wal yuj a 'ayn tza tojlb'tzej 'och a jul-lab'? ¿Tom 'al wajch 'aych 'icha junc 'icatz?

²¹ ¿Tom wal matz tac' in a'n niwnc'ojlal yuj in mul? ¿Tom matz tac' in a'n niwnc'ojlal yuj tas maysch'olnil tzin b'o'o? 'In to jab'xoj in 'atcn 'a scal pococ, 'oj in a sayq'ui, palta man̈x 'oj wilchji, xchi Job.