Job 6 - Chuj San Sebastian Bible

¹ Xlajw cha, xyaln Job 'ixtic:

² A smasnil jun tzo'n̈ in yailal tic yet' in cusc'ojlal, comnoc tz'echtax yet' junc 'echtab'.

³ Tecn yel xo 'al 'a yib'n̈ q'uen arena 'ay 'a sti a mar. Yuj cha, yajn̈ej xwaln jun tzo'n̈ in paxti chi muc'uc.

⁴ Yujto a Dios tztac' yuj smasnil, 'icha to 'ix 'och sjul-lab' 'a in niwnal. A jun sjul-lab' cha, caw 'ay svenenoal sti', yuj cha, caw wal tzyab' in niwnal syail. A Dios 'ix yoych wal tas 'ay smay 'ayin.

⁵ Q'uinloc caw yax te c'ultc 'aj tzwa no b'uru, ¿tom 'oj 'el yaw no'? Q'uinloc 'ay tas tzc'ux no wacax, ¿tom 'oj 'el yaw no yuj wejel?

⁶ ¿Tom 'ay junc mach wach' swa yet' junc schib'l wal may yatz'mil? Toto may yatz'mil sacl no n̈olob' ¿tom wach' sc'uxxi?

⁷ 'Icha schib'l wal may yatz'mil, 'ixta schib'l woch tzin c'ux ticnec tzwab'i. Matz in nib'j wa 'in b'a.

⁸ Comnoc wal tz'el 'a sc'ojl Dios ya'n tas tzin c'an 'a 'a; comnoc tzyac' tas 'icha tzin nib'ej.

⁹ Comnoc tz'el 'a sc'ojl in ya'n lajwoc sec tzin sat 'ejmi.

¹⁰ Toto tz'el'ch 'icha tzin c'an 'a 'a, wach'xam caw tzwab' syal yuj in yailal, palta caw wal tzin tzalji, yujto may 'aj xwij 'el in nab'en 'a sley Dios niwn yel'chi.

¹¹ Man̈x 'a wip tzwab'i yic tzwa'n techjoc yailal, man̈x 'a pax tas yuj 'i'n cob' to pitzn in.

¹² ¿Tom wal lajn stzatzl in niwnal tic yet' q'uen yax q'ue'en mto 'icha q'uen bronce yaj in chib'jal?

¹³ Man̈xtzac stac' in coln in b'a 'a yol wico', may pax junc mach tzcolwj wet'oc.

¹⁴ A mach 'aych 'a syailal, smoj wal yajx sniwnal sc'ojl yuj eb' swach'c'ojol, wach'xam to a Dios tztac' yuj smasnil, man̈x 'a yel'ch 'a sat jun 'anma cha.

¹⁵ Palta ax xo tic ex in wach'c'ojol, ton̈j xe wach' juj in nab'en; lajn ex 'icha junc sb'e a 'elmal a tztacj chan̈ 'a yic man̈xtzac yac' n̈ab'.

¹⁶ A yic tzya'n n̈ab' b'ut'n sb'e a yet' a b'eymal a'.

¹⁷ Palta ax yic man̈x 'a n̈ab', tztacj can 'aj tzb'ey a a cha; a yic caw 'ay c'ac', tzwach' tup chan̈ a'.

¹⁸ An tic lajn in 'icha eb' b'eymal 'anma', tz'elcn eb' 'a sti b'e cob' say jac yal tzyuq'uej, palta ax tz'aji, ton̈j tzsatcn 'at eb' 'a lum cusltac lu'um, axta tzcham eb'.

¹⁹ A eb' b'eymal 'anma yic chon̈b' Temán, yet' eb' yic Saba, xcob' sayc' eb' a a chi 'a sti b'e cha.

²⁰ Ax yic xlaj c'och eb' cob' say yil a a chi 'a yol sb'e a cha, caw wal taquin̈, yuj cha, xtac sc'ojl eb' yilni, yujto a cob' a 'aych yipc sc'ojl eb'.

²¹ 'Icha wal yilx junc cha, 'ixta eyilx 'a in sat; yujto a yic xeyilni to caw wal niwquil yilx in yailal 'aychi, ton̈j ex xiw cha'an̈.

^22-23 An tic, may jac e tumn xin c'ana yic tzin mann 'el in ba' a yol sc'ab' eb' 'ajc'ojl yajch 'ayin, atn eb' 'anma tznib'j tzin milni.

²⁴ 'A'c in cuynb'il chi wab'i', 'oj in cha wab' 'ayex; tzeyaln pax wab'i', 'ajtil 'ix laj 'och in mul cha.

²⁵ Alc tas yel 'ayin wach'xam ya' 'oj wab'i'; palta ax tic, caw may yel'ch jun tzo'n̈ tzeyal 'ayn tic.

²⁶ Ax tic, tu tzcob' eyal 'ayn yuj jun tzo'n̈ tas xlaj wala', palta eyojtac a spaxti junc mach 'aych 'a syailal, 'ay 'aj may xon jac yel'chi.

²⁷ Ax tic, tzyal e c'ojl eya'n 'och suerte 'a yib'n̈ eb' meb'a 'unn chamnc smam, tzyal pax e c'ojl e chon̈n 'el junc e wach'c'ojol.

²⁸ Ax ticnec, 'ochn̈ec q'ueln 'a in sat, toto wan wa'n 'es 'ayx tzeyab'i.

²⁹ 'Actjec eyaln jun tzo'n̈ chi 'a wib'an̈; comnoc tzeyojquej 'eli, to yel jun tzo'n̈ tzwal tic.

³⁰ ¿Am wal tzeyutj e nani to 'a'm in 'es? ¿Am tzeyutj e nani to man̈ wojcoc 'aj 'ay tas tu'?