Job 5 - Chuj San Sebastian Bible

¹ A ticnec ach Job, 'awjan̈, 'oj yal sb'a mach junc 'oj ta'wc 'ayach. 'Oj wila', mach junc eb' ángel 'oj a c'an scolwal.

² A junc 'anma may snab'en, a yowl sc'ojl chi 'oj milnoc, ax mach tznib'n 'och junc tas, 'oj c'un cham yuj schichnc'ojlal.

³ 'Ay 'aj wiljnac eb' tu snab'en, 'ix laj cob' niwtjoc tas 'ay 'a eb', palta yajn̈ej satx can 'ejm jun tzo'n̈ chi 'a eb' muc'uc.

⁴ Ax yunnal eb', man̈x 'a mach tzcolwj 'a eb'; a yic tzc'och eb' 'a sat eb' yajal, caw wal man̈x 'a yel'ch tz'aj eb' ta', man̈x 'a mach tzcoln eb'.

⁵ A sat smasnil tas cob' 'awb'il yuj eb', a yic tz'el-li, ax eb' 'anma tzcham yuj wejel, a eb' tzc'uxni, c'uxn tzlaj say 'elt eb' 'a scal q'ui'ix. Ax eb' caw may jac tas 'ay 'a 'a, a eb' tzlaj 'i'noc can 'at smasnil sricoal eb' tu snab'en cha.

⁶ A yailal man̈ ton̈joc tzjaw 'a quib'an̈, man̈ munoc tzjaw 'ixta'.

⁷ Mun wal tzquij cot yailal 'a quib'an̈, 'icha tz'aj stz'itj 'el snich te c'ac', 'ixta tz'aj sjaw 'ayon̈.

⁸ Q'uinloc an 'ixta waj 'icha aj tic, yajn̈j am cha tzwaln in b'a 'a Dios.

⁹ A Dios til wal tas satjub'tac tzb'o'o, man̈x b'ischjb'enoc tas tzb'o cha.

¹⁰ A tz'a'n cot n̈ab' 'a yib'n̈ lum lum tic, sec 'ixta tz'aj yoch yalil smasnil tas 'ay 'a sat lu'um.

¹¹ A tz'i'n chan̈ eb' 'anma 'emmquilal yeq'ui, a pax tz'a'n sniwnal sc'ojl eb' 'aych 'a syailal.

¹² A tz'a'n juwc 'el tas tznib'j eb' jelan sec matz 'el'ch tas nab'il yuj eb'.

¹³ A tztenn 'och wan eb' maysch'olnil snab'en cha, sec matz 'el'ch tas tznib'j eb'.

¹⁴ Caw wal chimc'ual tzlaj telw 'ejm eb' 'icha to 'ac'wl xo 'ayc' eb'. Toxn̈ej tzlaj smachlc eb' tz'ec' eb'.

¹⁵ A Dios, a tzcoln eb' 'oltac tz'aj yixtx yuj eb' maysch'olnil snab'en, a tzcoln 'el eb' 'a yol sc'ab' eb' 'ixtm 'anma'.

¹⁶ A pax 'aych yipc sc'ojl eb' may wal ste'nal, tzmacn sti eb' maysch'olnil snab'en, sec man̈x 'a tas tztac' yaln eb'.

¹⁷ Caw wach' yic junc mach tz'ajx cuenta yuj Dios. Man̈ a patquilc can 'el tas tzach yutj ach ya'n cuenta Dios to tztac' yuj smasnil.

¹⁸ Toto a tz'a'n lajwc junc mach, a pax tz'an̈tni; toto a tz'a'n 'och syailal junc mach, a pax tz'a'n b'oxc sc'ojol.

¹⁹ Til wal 'ejm 'oj a colx 'el yuj 'a tas 'ay smay, wach'xam junc yel xo caw tu', ma'oj scha jawc 'a eb'an̈.

²⁰ A yic 'oj laj cham 'anma yuj wejel, 'oj a colx 'el 'a yol sc'ab' chaml chi yu'uj; ax yic 'oj jawc owl 'a yib'n̈ eb' 'anma', 'oj a colx 'el yuj 'a scal owl cha.

²¹ 'Oj a colx 'el yuj 'a yol sc'ab' eb' alm peclal; ax yic 'oj jawc yailal 'a yib'n̈ smasnil 'anma', may yuj to 'oj a xiwi.

²² A yic 'oj jawc wejel, owal mto yic 'oj jawc no chiwjum noc', ma'oj a xiw yuj jun tzo'n̈ cha.

²³ A 'a scal a munljel, may q'uen q'uen 'oj extni; ax e no calte'al noc', may 'oj yutc e no' a munljel cha, ma'oj ac' 'owl yet' e no'.

²⁴ Ax eln cot pax a b'a to 'ayx tzaljc'ojlal pax 'a atut; 'oj a b'isn pax smasnil no a cajb'en noc', ax elni to tz'acn e no'.

²⁵ Caw 'oj niwtjoc sb'isl en̈tl b'aq'uin̈, til wal 'oj 'aj eb' 'icha te c'ultc tzpac' 'a sat lu'um.

²⁶ Caw wal 'ichm achx winac, ax a chami, 'icha tzyac' 'ixm trigo caw wal c'an yic tzpolxi, 'ixta 'oj aji.

²⁷ Ach Job, a tas xwal tic, cojc si'mb'il to 'ixta yaji; yuj cha, tzcham wal a cuyn jun tzo'n̈ tic, yujto a wach'loc tz'aji, xchi win Elifaz cha.