Job 42 - Chuj San Sebastian Bible

Slajb' paxti Job 'a Dios

¹ Yuj cha, xta'w Job, xyaln 'ixtc 'a Dios:

² Wojc wal si'mb'il to smasnil tas tztac' o'oj; a tas tza nib'j a b'o', tza b'on̈ej.

³ Ach 'ix al 'ayn 'ixtic: ¿Machch cob'i', yuj cha, tza c'ub'n 'el in jelnal yet' a paxti may yel'chi? xa chi. An tic, a tas satjub'tac yilxi, yet' tas to matz nachj wu'uj, a chi xwala.

⁴ 'Ix aln pax 'ixtc 'ayin: Chaj ab'i' tas 'oj wala'; tza pacn 'ayin tas 'oj in c'anb'c 'ayach, xa chi.

⁵ A 'a yic yaln̈taxi ton̈j tzwab' alxi, palta ax ticnec, caw wal tzach wilch yet' in sat.

⁶ Yuj cha, tznachj 'el wu'uj to may jac wel'chi, yel xo wach' tzin 'emwocn 'a sat lu'um, mto 'a scal stan̈il c'ac' yic tzin nan in b'a yuj tas xwala, xchi Job.

Tzya'x Dios swach'c'ojlal 'a Job

⁷ A yic xlajw yaln Jehová jun tzo'n̈ tic 'a Job, 'ix yaln pax 'ixtc 'a win Elifaz: Caw wal tzin owx 'och 'ayach, yet' 'a eb' chawn̈ ajun et' tic, yujto man̈ wach'c tas xeyal 'a in patc 'icha 'ix yutj sb'a win in checb' Job tic.

⁸ Yuj cha, a ticnec b'i'an, 'ijec cot ucwn̈oc no quelm wacax yet' ucwn̈oc no mam calnelu, tz'at eya'n 'a win in checb' Job, ax win 'oj 'a'nc e no xajmb'al-l 'ayn eyu'uj. Ax sleslwi win eyu'uj, ax in chan slesl win cha, sec may 'oj ex wutc yuj e man̈ nab'enal, 'icha wal smoj e chani, yujto man̈ wach'c tas xeyal 'a in patic, 'icha xyutj sb'a win in checb' cha, xchi Dios.

⁹ Xlajw cha, x'at win Elifaz 'aj Temán, win Bildad 'aj Súah, yet' win Zofar 'aj Naamat, sb'on eb' 'icha 'ix yutj Jehová yalni. Yuj cha, 'ix schax slesl Job yuj Dios.

¹⁰ A yic xlajw sleslwi can Job yuj eb' swach'c'ojl cha, 'ixta to b'i'an, 'ix ya'n pax Jehová swach'c'ojlal 'a yib'n̈ jun 'ejm xo, 'icha xon 'a yic yalan̈, 'ec'b'al to xyutj pax Dios ya'n sjel 'a 'a.

¹¹ Xlajw to cha, 'ix c'ochx eb' yu'tac Job chi 'at yila', eb' yanab', eb' swach'c'ojol yet' jantcn̈ej mach 'ojtnac 'a yic yalan̈. 'Ix 'och wal jun niwquil tzaljc'ojlal, 'ix wa eb' 'a yatut Job cha. 'Ix syamn 'och eb' ya' sniwnal sc'ojol, 'ix yaln pax eb' to locn eb' xcus yuj yailal 'ix 'ec' 'a yib'n̈ yuj Jehová. Xlaj ya'nc junjn eb' tumin yet' junjn colc'ab' nab'a oro 'a Job cha.

¹² 'Ix ya'n pax Dios niwtjoc tas 'ay 'a Job, 'ec'b'al 'ix yutj ya'n pax 'icha xon tas 'ay 'a win 'a yic yalan̈. Yujto 'ix q'uexc'och sb'isl scalnelu win 'a chan̈lajn̈e mil, waque mil scameyo, jun mil mojn̈ smam swacax, jun mil no 'axna.

¹³ Ucwn̈ yunnal, 'oxwn̈ pax yisil.

¹⁴ A 'ix b'ab'l cha, Jemima sb'i 'ix, 'ix schab'il, Cesia sb'i 'ix, 'ix yoxil, Keren-hapuc sb'i 'ix.

¹⁵ May xon eb' 'ix 'ix 'a yolyib'n̈q'uinl tic tza'wni swach'l yilx 'icha eb' 'ix yisl win Job cha. An̈jtona', locn eb' 'ix schaj smacl yet' ewin snul'ej yic spojn can 'ec' win Job smasnil tas 'ay 'a 'a.

¹⁶ A yic xlajw ye'cn jun tzo'n̈ tic, 140 ab'il to xyila, 'ix laj yil to sq'uib'cn yixchicn eb' yunnal.

¹⁷ Caw wal 'ichm winc xo Job yic xchami.