Job 41 - Chuj San Sebastian Bible

¹ An̈jtona no Leviatán, ¿'Ojm stac' e'n q'uet no yet' q'uen lucub'? ¿'ojm stac' a jaln sti no'?

² ¿Tzam stac' a'n 'ec' ch'an̈ 'a yol sn̈i no', mto tztac' a'n 'och alambre 'a sti no cha?

³ ¿'Oj tewoc 'och am no 'ayach, sec tz'o'ch a c'ojl 'a no'? ¿'ojm c'unnoc no 'ayach sec tz'a'l no a libre?

⁴ ¿Tzam stac' a'n trato yet' no', yic tz'och no a mosooc 'a smasnil tiempo?

⁵ ¿Tzam stac' a tajn yet' no 'icha tzac' yet' junc no ch'ic? ¿tzam stac' a'n 'och sch'an̈l no', yic tztajn eb' esl yet' no'?

⁶ ¿Tzam stac' spojn 'ec' eb' 'anma schib'jal no 'a 'a? ¿tom 'oj stac' scotc tzu'n 'at eb' no', ax schon̈n eb'?

⁷ ¿'Ojm stac' a juln 'ec' junc jul-lab' 'a yol stz'umal no'? ¿tzam stac' a juln 'ec' jun jul-lab' arpón sb'i 'a yol sjolm no'?

⁸ Q'uinloc tzcob' a nib'c a yam no', 'oj ach spoc' 'ejm no', ma'oj 'at jun chi satc'ojlal o'oj, sec man̈x b'a'n̈ 'oj a b'o 'ixta'.

⁹ A mach tz'iln no Leviatán cha, tzsicb' 'ejm yuj xiwlal.

¹⁰ Toc 'ay mach tztac' ste'wtzan sb'a stzuntzn no', ocxom wal in an tic, toc 'ay mach tztac stewtzan sb'a sjaw 'a wojltac.

¹¹ Toc 'ay mach 'a'jnac junc tas 'ayin, yuj cha tzyaln to 'ay in b'oc 'a 'a. ¡A smasnil tas 'ay 'a yolyib'n̈q'uinl tic, wicn̈ej yaji!

¹² Matz wactj waln yuj no Leviatán cha, yujto caw wal 'ay yip yoc no', may tas tza'wni yip 'icha no'.

¹³ Toc 'ay junc mach tztac' yi'n 'el stz'umal no 'aych 'a 'a, mto tztecch junc lanza 'a yol stz'umal no cha, yujto a stz'umal no', 'icha q'uen smacl sat jul-lab', 'ixta yajch 'a no'.

¹⁴ ¿'Aym junc mach tztac' sjacn sti no', yujto a ye no', yel xo wal 'ay smay yilxi?

¹⁵ A solc'al no 'a yib'an̈, latztz'i yajch 'a yich spatc no', caw wal tzatz 'icha q'ue'en, lajn 'icha jun tzo'n̈ smacl sat jul-lab' cha.

¹⁶ Chachmb'a yaj solcal no chi smasnil, toxn may 'aj tz'och jac 'ic' 'a scal.

¹⁷ Junn̈j yaji, toxn may mach tztac' spojn 'ati.

¹⁸ A yic tz'at'swi no', 'icha wal letz'lo'om, 'ixta chi tz'elt 'a yol sn̈i no', ax yol sat no', caw tzictzni 'icha yic tzjaw yoc c'u 'a sq'uin̈b'ial.

¹⁹ A 'a yol sti no cha, ata tz'elt tz'itljoc snich c'ac'.

²⁰ Ax 'a yol sn̈i no', ata tz'elt tab', 'icha sq'ue wan xob' tas tztaj 'a yojl junc chen 'a yib'n̈ c'ac'.

²¹ Caw xexni tz'aj stza c'ac' yuj yic' no tz'eli, ax 'a yol sti no', ata tz'elt snich c'ac'.

²² A stel sjaj no', caw wal 'ay yip, smasnil 'anma', caw wal tzxiw 'a no'.

²³ A schib'jal no 'a sniwnal caw 'ay yip, caw tzatz 'icha q'uen hierro n̈usb'il 'a scal c'ac', wach' yaj sb'o'i.

²⁴ A spixn no', caw tzatz 'icha junc q'uen q'ue'en, lajn 'icha junc q'uen cha'.

²⁵ Toto tzcot no 'a eb' 'anma', caw wal tzxiw chan̈ eb' tzyal jelnal sb'a yuj no', man̈xtzac yil eb' s'at 'elc yuj xiwlal.

²⁶ May mach tztac' ya'n owl yet' no', may yopiso espada mto q'uen lanza yet' jun tzo'n̈ xo jul-lab' 'a no'.

²⁷ A q'uen hierro, 'icha te 'ac 'ixta q'uen 'a no', ax q'uen bronce, 'icha junc te te c'a'el, 'ixta q'uen 'a no'.

²⁸ A junc jul-lab' tzjulx 'och 'a no', toxn matz xiw no yu'uj; a junc q'uen tzjulx 'och 'a no', lajn wal sc'och 'a no 'icha yoc trigo.

²⁹ Toto tzjab'x 'och junc te niwquil te 'a no', 'ichan̈ej qui jab'n 'och junc 'aj, 'ixta tzyab' no'. A yic tzc'an̈ q'uen jul-lab', toc tzxiw no', ton̈j tz'och q'ueln no'.

³⁰ A yic tzjucn 'at sb'a no 'a sat lu'um, 'icha sanja 'ixta tz'ajcn 'at lum 'a xab' yuj no', lajn tz'ajcn 'icha 'aj tz'ec' q'uen rastrillo.

³¹ A xab'l yich a mar, tz'ib'x sat a yuj no' yic tzb'ey no' 'a yojl a', 'icha yic tzxej tas su'q'ui sjab' 'a yol chen, 'ixta yib'x a yuj no'.

³² A a mar 'aj tz'ec' no cha, sacpolnac tz'ajcn a 'a spatquil no', lajn yilx 'icha sac lana.

³³ May junc xo no noc' 'a sat lum tic lajn yet' no'; a jun noc' cha, an b'ojnac yic may xon b'a'n̈ tzxiwi.

³⁴ A no sat yaj wuj 'a smasnil no noc' 'ay smay, a no 'aych sreyloc smasnil no chiwjum noc', xchi Dios 'a Job.