Job 40 - Chuj San Sebastian Bible

¹ 'Ix yaln pax Jehová 'ixtc 'a Job:

² Ach Job, xcob' a nib'c a te'wtzoc a b'a 'ayn an tztac' wuj smasnil tic, ¿tom 'ayt wal tas tza nib'j al 'ayin? Ta'wan̈ 'ayin, xchi Dios.

³ Yuj cha, 'ix ta'w Job, xyaln 'ixtic:

⁴ ¿Tas wal 'oj wutc in ta'wi, toc 'ay jac xon wel'chi? Yel xo wach' to sictac tzin cani.

⁵ Tox in paxtin cha'ox 'ejem, man̈x 'a tas wach' walni, xchi Job.

⁶ 'Ix yaln pax Jehová 'ixtc 'a 'a, yic 'ayc' 'a scal jun 'ic'n̈ab':

⁷ Te'wtzej a b'a 'a wojltac, tzin nib'ej to 'oj a pac 'ayin yuj tas 'oj in c'anb'c tic.

⁸ ¿An̈ja am tza te'wtzej a b'a alni to man̈ tojloc tzwutj ach in b'onyaji, yujto may a mul 'a tzotj alni?

⁹ ¿Tom yel xo wal 'ec'b'al ep 'a wib'n̈ tza na'a? ¿'Icha am sc'an̈ yol in jaj tic, 'ixta am sc'an̈ pax ec cha?

¹⁰ Ch'ox wila' toto yel niwn el'chi, tzam 'el tzicnjoc c'ac' 'ayach, mto tzictzni yilx a niwnal smasnil.

¹¹ Tzcham wal eln 'och eb' b'an̈quintac yeq'ui; 'ac' owl yet' eb', masnto tz'em eb' o'oj.

¹² A eb' tzcob' yi' chan̈ sb'a yet' eb' maysch'olnil sb'eyb'al tzlaj 'ilchjoc o'oj, tza te'cn 'ejm eb'.

¹³ Tza muccn eb' 'a yol lu'um, tza macn can 'ejm eb' 'a yol lum 'a campusan 'a 'aj 'ay eb' chamnac.

¹⁴ 'Ixta 'oj wutc wilni toto yel 'ay ep, 'oj stac' a coln a b'a tzyal cha.

¹⁵ 'Ochn̈ q'ueln 'a no niwquil noc' behemot sb'i, an xin b'o no 'icha ach wutj ach in b'oni. A no tic, c'ultc tzlo no 'icha no wacax;

¹⁶ caw wal 'ay yip yichspatc no', caw 'ay yip schib'jal xub' no'.

¹⁷ A sn̈e no', lajn stzatzl 'icha te c'ute', ax sch'an̈l xub' no', ch'umquixtac yaji, caw 'ay yip.

¹⁸ A sb'acl no', lajn 'icha q'uen bronce, ax yoc no', lajn 'icha q'uen hierro.

¹⁹ A jun noc' tic, cojn yel xo wal satjub'tac yaj in b'on 'a scal smasnil jun tzo'n̈ xo no noc' in b'ojnac. Cojn in tztac' pax in satn 'eli.

²⁰ A 'a eb' lum jolmctac witz 'aj tzlaj tajn no calte'al noc', ata tzlaj say no te c'ultc slo'.

²¹ Ax 'a yen̈l eb' te te 'ay xi'il, ata tz'em pun̈n no sicb'oc, mto a 'a scal eb' te b'alal 'a yaxlu'um, ata tzc'ub'j 'el sb'a no'.

²² A eb' te te 'ay yen̈l cha, ata tzsicb' no 'a yich eb' te', ax eb' te sauce sb'i 'a stitc a', a eb' te tzc'ub'n 'el no'.

²³ Wach'xam tzq'uib' a a 'a yol sb'e no', palta matz xiw no', toxn̈ej tz'och chel-loc a 'a sn̈i no', toc 'ay tzna no'.

²⁴ ¿Mach wal junc tztac' syamn no', yic tzc'oln 'elt yol sat no', mto yic tzya'n 'ec' ch'an̈ 'a yol sn̈i no cha?