Job 4 - Chuj San Sebastian Bible

A jun b'ab'l c'umjb'a x'ochi

¹ Yuj cha, xta'w win Elifaz 'aj Temán 'ixtc 'a Job:

² Q'uinloc tzon̈ paxtin jac et'oc, tu 'am tzab'i, palta tecn man̈ smojc to ton̈j sictac tzon̈ can on̈.

³ Yujto til wal 'anma 'aj xac' jun tzo'n̈ cuynb'il, xlaj a'nc snab'en eb' 'anma somchjnac 'eli.

⁴ A eb' tzlaj juw 'el snab'en, xlaj a tojlb'tzej snab'en eb', ax eb' to wan 'ijn tzmeltzj 'a spatic, xa yamchwan eb'.

⁵ Ax ticnec, a yic xjaw a yailal, yel xo wal may jac a te'nal.

⁶ Ach tic, caw wal yiclum ach 'a Dios, caw tojl a b'eyb'al alni. ¿Tas pax yuj tzsomchj chan̈ a nab'en ticnec?

⁷ Na cot nab'an, ¿tom 'ayx 'aj xjaw yailal 'a yib'n̈ junc mach to may smul?

⁸ A tzwutj wiln an tic, a mach tzb'on maysch'olnil, a jun maysch'olnil chi tzjaw pax 'a yib'an̈.

⁹ 'Icha tz'aj satl tas yuj chacxuxm'ic', 'ixta tzyutj Dios satn 'el eb' tzb'on maysch'olnil chi yuj yowl sc'ojol.

¹⁰ Lajn yaj eb' 'icha no león. Wach'xam tz'el yaw no', palta a yic tzma'n 'el Dios ye no', tz'och wan no yel yaw.

¹¹ Man̈xtzac 'ilchj tas tzc'ux no', yuj wejel tzcham no', ax e no cotc león, toxn̈ej tzsactzic can 'at e no'.

¹² 'Ay jun 'ab'x caw c'ultac 'ix alx 'a in chiquin, teb'il wal 'ix tojlb'i wab'ni.

¹³ A 'a 'ac'wal, 'a yic yorail tzcot swayn̈ eb' 'anma', ata x'och jun in waych tu yilxi.

¹⁴ 'Ix jaw wal jun niwquil xiwc'ojlal 'ayin, 'ix 'ib'x chan̈ smasnil in niwnal.

¹⁵ 'Ay jun spixn 'anma xjaw 'a wojltac, 'ix smasn 'ec' sc'ab' 'a in sat, caw in xiw yu'uj.

¹⁶ 'Ix 'och wan lin̈n 'a wojltac, cojn yen̈l chi xwila, ma'ix stac' xon wiln sat. Ax xwab'ni sajsni spaxtini, 'ix yaln 'ixtic:

¹⁷ A junc 'anma chamlb'a yaji, ¿tom tztac' yalni to caw tojl tzyutj sb'a 'a sat Dios? ¿Tom tztac' yalni to may jac smul 'a sat jun mach b'ojnac?

¹⁸ 'Intax to a Dios matz ya'ch wal yipc sc'ojl eb' schecb' 'ay 'a satcha'an̈; 'intax eb' ángel, 'ay pax spaltail eb' 'a sat.

^19-20 Ocxom wal eb' 'anma', caw wal may ste'nal eb'. Lajn eb' 'icha junc xamit n̈a b'ob'il q'ue 'a yib'n̈ poc. Wach' yic tzq'uin̈lb'i, ax 'a yic yemc'ual juwnc xo paxi. Lajn pax eb' 'icha no 'ij tzte'x can 'ejm 'a sat lum, jun 'ejmn̈ej tzcham muc'uc, toc 'ay mach tzcus yu'uj.

²¹ 'Icha yic slan̈chj junc mantiado yic tzn̈i'chj sch'an̈il, 'ixta yaj sq'uinl eb', yajn̈ej tz'eq'ui, mantzac nachj 'el sjelnal Dios yuj eb', xchi jun pixn chi 'ayin.