Job 39 - Chuj San Sebastian Bible

¹ ¿Ojc ama tas tiempoal tz'alj yune e no calte'al chiwo? ¿'Ayxam 'aj tzela tas tz'aj yalj yune e no c'ultquil chej?

² ¿Ojc ama jaye 'uj scuchn chan̈ e no yune', 'ixta to b'i'an, tz'alj yune e no cha?

³ A yic tz'alj yune e no cha, to tzmotz' sb'a e no' sec tz'ec' syal no 'unn cha.

⁴ A yic tz'och yip e no cotc cha, tz'atcn e no 'a calte', man̈xtzac japx e no 'a snun cha.

⁵ ¿Mach 'ix 'actn can 'el no calte'al b'uru tza na'a? ¿Mach 'ix alni yuj cha libre yaj no'?

⁶ An xwala 'aj tzcan cajn no', ata xwa'cn 'at no 'a cusltac lu'um, 'a lum niwc pan̈n 'a'lic 'aj may wal c'ultac.

⁷ Matz nib'j no tzcan 'a 'aj 'ay 'anma', yujto til wal 'aw tzyab' no', matz nib'j pax no to tz'och 'a yaln̈ 'icatz.

⁸ A 'a eb' lum tzalctac, ata tz'ec' say wa sb'a no', a te 'unn c'ultac, a te tz'ec' say no slo'.

⁹ ¿Tzam a na ach tic to a junc no simbron wacax 'oj yal sc'ojl no smunlj jac a munljel, mto tza mac no junc 'ac'wl 'a yol a colal?

¹⁰ ¿'Ojm stac' a'n q'ue te yugo 'a sjolm no', yic tza'n t'ocwc lum no', 'oj yal am sc'ojl no yoch tza'n o'oj?

¹¹ ¿Tom yuj caw 'ay yip no', yuj cha, ax cob' a'nc yipc a c'ojl no yuj a munljel?

¹² ¿Am tza na'a to 'oj stac' a c'ann no', yic 'oj a molnc chan̈ tas tzyac' a munljel, mto 'oj a c'an no te'j trigo 'a a te'lab'?

¹³ 'Iltnab'n no avestruz, 'ay cob' sc'axl no 'icha no cigüeña, palta matz tac' sjen̈w no'.

¹⁴ A yic tzya'n no sn̈olob', a 'a scal arena ata tzmuccn no sn̈olb' cha, sec ax sc'a'l yoc c'u a chi tz'a'n q'uixnjoc no n̈olb' cha.

¹⁵ Toc tzuj snan no' toto 'ay mach tz'ec' te'nc poj sn̈olb' no cha, mto junc no noc' tz'ec' 'a yib'an̈.

¹⁶ Caw tu snab'en no 'a no yune cha, 'icha to man̈ yico'oc no'; toc 'ay yel'ch no n̈olb' chi 'a no', toxn̈ej matz 'elt no cotc cha.

¹⁷ Yujto an ma'ix wac' snab'en no', yuj cha, 'ixta tzyutj sb'a no',

¹⁸ palta yic tzq'ue wan no', tzya'n no carela, ton̈j tzewj can no yuj no chej cob' tz'och tza'n yu'uj, yujto matz techj sb'ey no chej chi 'a no'.

¹⁹ ¿Tom ach 'ix ac' yip no chej? ¿Mach 'ix 'a'n pitzwc xil sjaj no' sec wach' yilx no'?

²⁰ ¿Tom o'oj tztac' sb'atj chan̈ no 'icha no b'ojch'in, ax yic tzjormj yol sn̈i no', caw tzxiw eb' 'anma'?

²¹ Tzmac' 'ejm no sc'ab' tz'ec' no 'a lum 'a'lic, matz xiw xon no jac s'at 'a owal.

²² Toc yojc no' toto 'ay tas 'ay smay, toc tzxiw no'. Matz meltzj no 'a spatc yuj q'uen espada tzjaw 'a yojltac,

²³ wach'xam tzchil-lji q'uen q'uen 'aych 'a win 'ay q'ue 'a yib'n̈ no'. Wach'xam tzcoplji q'uen yespada mto q'uen slanza ewin 'ajc'ojol, palta matz xiw no'.

²⁴ A yic tz'oc' no cacha yic owal, yet' wal smasnil yip no chej cha, tzya'n no' carela s'ati, toxn man̈xtzac yal sc'ojl no tz'och wa'an.

²⁵ A yic tz'oc' no cacha cha, tz'oc' pax no chej cha; najt to wal sc'och no', tzyab'n no' to 'ay owal, tzyab'n pax no yel yaw eb' capitan̈.

²⁶ ¿Jeln ach ama, tztac' am aln 'a no c'uc'um yic tz'at jen̈n̈oc no 'a stojlal sur?

²⁷ ¿Ach am tzal 'a no salt'iw yic tzb'on no yet'l 'a caw cha'an̈?

²⁸ A 'a c'ual yet' 'a 'ac'wal, ata 'ayc' no 'a sat eb' q'uen tenam, mto a 'a sjolm eb' q'uen tenm chi tzc'ub'j 'el sb'a no'.

²⁹ Ata tzmac no yil 'a chan̈ cha, 'aj tz'at yic' no schib'ej.

³⁰ A chic', a 'i'n pitzn e no yune no cha, a 'aj 'ay sniwnal junc no chamnc noc', ata 'ayc'n̈ej no', xchi Dios.