Job 38 - Chuj San Sebastian Bible

Spacjnac Dios tas xyal Job

¹ Xlajw cha, 'ix paxtin Jehová 'a win Job 'a scal jun chacxuxm'ic', 'ix yaln 'ixtic:

² ¿Machch cob' ach tic, yuj cha, tza c'ub'n 'el in jelnal yet' a paxti may yel'chi?

³ A ticnec te'wtzej a b'a, yujto 'ay tas 'oj in c'anb'c 'ayach, ax a pacn 'ayin.

⁴ ¿'Ajtil 'aych 'eq'ui yic xin b'on 'ejm yipnub'al yich lum lum tic? Al wab'i', tom yel xo niwn tas ojtac.

⁵ ¿Ojc ama mach 'ix alni jantc x'aj yechl lum lum tic, mach 'ix nan cha'an̈ jantc tz'aj lu'um?

⁶ ¿Ojc ama 'aj b'achn 'ejm yipnub'al yich lu'um? ¿Mach 'ix b'ab'l 'a'n 'ejm q'uen q'uen 'ix 'emcn yipnub'oc yich lum cha?

⁷ Wan xo sacb' 'el 'a jun c'u cha, 'ix b'itn chan̈ smasnil c'anal, ax eb' wángel caw 'ix 'el yaw eb' yuj tzaljc'ojlal.

⁸ A yic xn̈i'chj q'uel a mar 'a yib'n̈ lum lum tic, ¿mach 'ix 'a'n 'och smacl sat a', yic 'ix 'och wan a'?

⁹ An xwa'ch 'asn spichloc a', xwa'n 'och 'asn chi spotloc a'.

¹⁰ An 'ix wa'cn 'ejm smon̈jonal a mar chi 'aj tzc'ochi, xwa'n can 'och syaweal spuertail a'.

¹¹ Xlajw cha, xwaln 'a a 'ixtic: Cojn 'a tic tzach jawi, man̈x 'oj stac' a c'axw 'ec' 'a cha; a 'a tic 'oj a jaw pawnjoc, xin chi 'a a'.

¹² ¿'Ayxam 'aj 'ix al 'a sacl yib'cha'an̈, to tz'el 'a yet'ul yic tzsacb' pax 'a junx c'u cha?

¹³ A yic tzsacb' pax cha, tzpucb't sacq'uinl chi 'a sat lu'um, ax eb' tu snab'en, tzlaj sc'ub'c 'el sb'a eb'.

¹⁴ Yuj sacq'uinl cha, tzcheclji tas yilx sat lum lu'um; yajn̈ej tzjelmj yilx 'icha tz'ajcn 'ejm stintail junc seyo, mto 'icha stz'ib'quintacl yilx junc pichul.

¹⁵ A sacq'uinl chi tzyamn 'och wan eb' maysch'olnil snab'en, yuj cha, man̈x 'a tas tztac' yuj eb'.

¹⁶ ¿'Ayxam 'aj ach 'ix el jun tzo'n̈ niwc xab' oln to c'ultac yaj 'aj tzpac' a mar?

¹⁷ ¿Tox am 'ix ela 'aj 'ay spuertail yet'l chamel?

¹⁸ ¿Ojc ama jantc yechl slewnal sat lum lu'um? Toto yel niwn tas ojtac, al 'ayn cab'noc.

¹⁹ ¿Ojc ama 'ajtil molb'il sacq'uinal yet' q'uic'q'uinal?

²⁰ ¿Tzam stac' e'n 'at sacq'uinl chi 'a 'aj tzlajw c'ochi, tzlajw cha, tze'n pax meltzjoc 'a yet'l chi jun 'ejm xo?

²¹ ¿Si'mb'il am ojc ach tic tas yaji, yujto til xo wal yab'lil tzela? ¿'Aljnacch xo ama yic sb'o smasnil tas?

²² ¿'Ayxam 'aj ach xit'c 'a 'aj moln q'uen chew wu'uj, yet' 'aj moln q'uen sacb'at?

²³ A jun tzo'n̈ cha, molb'il wu'uj yic tzin c'ann 'a owal mto 'a yic tzwa'n cot junc yailal.

²⁴ ¿Ojc am b'e 'aj tz'atcn sacq'uinal yic tzpojn can sb'a? ¿Ojc am paxi tas tzyutj 'ic' spojn sb'a yic tzcot 'a stojlal 'aj tzq'uel c'u?

²⁵ ¿Mach tzjacn cot secnjoc yaxn̈ab' 'a satcha'an̈, tzch'oxn can pax 'a jun 'i'n̈ab' cha, sec chucx sb'e 'aj tz'ati,

²⁶ yic tzyac' n̈ab' 'a lum cusltac lu'um, 'a 'aj may xon 'anma cajan,

²⁷ sec tziclax lum lum tacn̈ sat yic wach' tzpa'x te 'unn c'ultac?

²⁸ ¿Mach junc mamb'il yaj 'a n̈ab' mto 'a chicb'chan̈ tza na'a?

²⁹ ¿Mach pax junc nunb'il yaj 'a q'uen che'ew mto 'a q'uen sacb'acum?

³⁰ ¿Mach tz'a'n tzatzb'oc a a 'icha q'uen q'ue'en, mto yic tzpitzw chan̈ chew 'a yib'n̈ a mar?

³¹ ¿Tzam stac' ecn syam sb'a jun tzo'n̈ c'anal tzcuch Mo'otz? ¿mto tztac' a juln 'el jun c'anal tzcuch Sacb'sun 'a scal jun tzo'n̈ xo c'anal?

³² ¿Ach am tzac' q'uelc jun chac c'anal 'a yic wan sacb'i? ¿Ach am tzej b'ey jun tzo'n̈ c'anal 'a sb'e, atn jun tzcuch Niwquil Osa yet' jun Yune Osa?

³³ ¿Ojc am jun tzo'n̈ ley tzc'anlb'ax 'a satcha'an̈? ¿Ach am wan a'n cuyxoc jun tzo'n̈ ley chi 'a sat lum tic?

³⁴ ¿Tzam stac' aln 'a 'asun sec tzya' cot n̈ab'?

³⁵ ¿Tzam stac' a checn 'at raya 'a junc lugar? ¿Tzam ta'w 'ayach: Waji, tic tzin 'ati, xchi am 'ayach?

³⁶ ¿Mach x'a'n sjelnal snab'en no ibis yet' no 'ajtzo tza na'a?

³⁷ ¿Mach wal junc caw jelan, yojtac jantc wal 'asn 'ayc' 'a smasnil? ¿Mach wal junc tztac' yi'n 'elt a a 'a scal 'asn cha, yic tzyac' n̈ab',

³⁸ sec wach' a lum pococ, tz'och lum b'i'chal, junxn̈ej tz'ajcn lum smasnil?

³⁹ ¿Ach am tza say schib'j yune no nun león tzchi'a, sec tzb'utj e no cotc cha,

⁴⁰ yic tzmoln sb'a no 'a yol yet'l 'aj 'ay, mto yic tzcan lachn no 'a cal c'ultac?

⁴¹ ¿Mach tz'a'n tas tzc'ux e no joj tza na'a, yic tz'ec' saync e no tas tzc'ux e no cotac, yic tz'el yaw e no sc'ann tas tzc'ux 'ayin?