Job 37 - Chuj San Sebastian Bible

¹ A yic tzwiln sjaw junc 'ic'n̈ab', caw wal tzin xiwi, ax in pixan, toxn̈ej tztin̈tin̈n yib'xi, 'icha to tzjul 'elt sb'a tzwab'i.

² 'Ab'tec wal sc'an̈ c'u, a jun cha yol sjaj Dios. A 'a yol sti tz'elt jun tzc'an̈ cha.

³ A tz'a'n 'ec' copljoc raya 'a satcha'an̈, tzya'n q'ue wan letz'lom 'a junjn sti 'aj tzlajw c'och lum lum tic.

⁴ Tzlajw cha, tz'ab'x sc'an̈ yol sjaj Dios jun 'ay yopiso 'a yib'n̈ smasnil; ya' sb'a tzc'an̈ cha, til wal yec' copljoc raya, toxn matz 'och wa'an.

⁵ Caw satjub'tac yab'x sn̈il-li yol sjaj Dios, til wal tas niwn yel'ch tzb'o'o, palta may mach tztac' yojcan 'eli.

⁶ A tzalni yic tz'em q'uen sacb'acm 'a yib'n̈ lum lum tic, tzya'n cot pax n̈ab' yel xo wal 'ay smay.

⁷ A tz'a'n smol sb'a eb' 'anma 'a yol yatut, sec tzyojquej 'el eb' tas wan sb'on Dios.

⁸ Ax e no noc', tzlaj 'och e no sc'ub'c 'el sb'a 'a yojl eb' q'uen n̈aq'ue'en.

⁹ A 'a stojlal sur, ata tzcot 'ic'n̈ab', ax 'a stojlal norte, ata tzcot sic yuj 'ic'.

¹⁰ Yuj yic' Dios, tzpitzw q'uen che'ew, ax eb' a niwc a', c'uxn tzchewb'i can 'el eb' a yuj q'ue'en.

¹¹ A tz'a'n b'ut'joc 'och a a chi 'a scal 'asun, ax 'a scal chi tzpitzw chan̈ raya.

¹² Cojn 'aj tznib'j Dios tzyac' n̈ab', cojn ta tz'och 'asn 'a satcha'an̈; 'ixta tzyutj 'asn chi syiclni tas tzalx 'a 'a, yic tzya'n 'emt n̈ab' 'a sat lum lu'um.

¹³ A yet' jun tzo'n̈ chi tztac' ya'n cot Dios yowl sc'ojol, mto yic tzya'n pax swach'c'ojlal 'a sat lum lum tic.

¹⁴ Mamin Job, 'ac' techjoc a maclni ab' tas tzwal tic, tza nan wal si'mb'il, chajtlto caw satjub'tac yilx tas tzb'o Dios.

¹⁵ ¿Tzam nachj 'el o'oj tas tzyutj Dios sc'anlb'an jun tzo'n̈ tic? ¿Ojc ama tas tz'aj spitzw chan̈ letz'lom 'a scal 'asun?

¹⁶ ¿Tzam nachj 'el o'oj tas tz'aj yoch wan 'asn 'a scal 'ic'? A jun cha, a tzch'oxn 'el sjelnal Dios to caw satjub'tac yilxi.

¹⁷ Ach tic caw teb'il xoj tztechj c'ac' 'oj 'a yol a pichul yic tzyi'n cot Dios 'ic' 'a stojlal sur, yuj cha, siclab'nac tz'aj sat lum lum tic.

¹⁸ ¿Tzam stac' a colwj jac yet' Dios yic tzjen̈n 'at satchan̈ tic, 'icha tzyac' junc q'uen q'uen tzatz tz'ajcn 'a yet'ul?

¹⁹ Al 'ayn̈ ticnec tas wach' caln 'a Dios, yujto 'icha scal q'uic'q'uinl 'ayn̈ ticnec, man̈xtzac nachji tas tzcala.

²⁰ An tic, matz in te'wtzej in b'a walni to tzin paxtin yet' Dios. Toto tzin c'an paxtinc in b'a yet'oc, 'icha to wan wi'n cot chaml 'a wib'an̈.

²¹ Toto tzq'uic'b' 'och 'asn 'a satcha'an̈, man̈xtzac stac' quilnec xon jac yoc c'u; palta toto tzjacw 'elt 'ic', caw pilmtac tz'ajx satcha'an̈, sja'l quilnec paxi.

²² A 'a stojlal norte, caw wal tzictzni tz'aj 'icha yilx q'uen oro, caw tzsat qui c'ojlec yuj stzictznil Dios.

²³ Matz tac' cojcanec 'eli jantc wal spoder Dios tztac' yuj smasnil, yujto man̈x yalnb'ilc sjelnal. Caw tojl paxi, wach' snab'en, may junc mach tzcomn 'ixtej.

²⁴ Yuj cha, caw wal 'ay xiwc'ojlal 'anma 'a 'a. Toc 'ay jac yel'ch eb' tzyal jelnal sb'a 'a Dios, xchi Eliú.