Job 36 - Chuj San Sebastian Bible

Schan̈c'ajil spaxti Eliú

¹ 'Ix yaln pax Eliú 'ixtic:

² 'Ac' wal niwnc'ojlal, a ticnec to 'oj ach in cuyu', yujto 'ayt tas wach' walni yic tzin coln Dios 'ayach.

³ 'Oj in c'anlb'oc jun tzo'n̈ in jelnal caw wal yel xo niwan, yic tzin ch'oxn 'eli, to tojl tas tzb'o Dios, atn jun b'ojnac in.

⁴ 'Ojquej 'eli to a tas 'oj wal 'ayach, man̈ 'esoc, an wan in paxtin 'aych tic, tz'acn yaj jelnal 'ayin.

⁵ A Dios caw wal niwquil yet' spoder, toc 'ay yalnb'il sjelnal, palta may junc mach tzpatquilj can 'eli.

⁶ A eb' 'anma maysch'olnil tzyutj sb'a, yajn̈ej tz'ijx 'ec' sq'uinl eb' yu'uj, ax eb' tz'ixtxi, a tzb'onyaj eb'.

⁷ A tztan̈wni eb' 'anma wach' sb'eyb'al, a tz'a'n 'och eb' yajlil sec tzb'inax eb' 'a smasnil tiempo.

⁸ Toto tzjalx eb' maysch'olnil yet' cadena, caw wal tzyab' eb' syail.

⁹ A Dios a tzch'oxn yil eb', 'aj tzlaj 'och smul eb' cha, yujto tzlaj 'ec' eb' 'a yib'an̈.

¹⁰ Tzpaxtin 'a eb' yic tz'ajx cuenta eb' yu'uj; tzyaln pax 'a eb' to tzyactj can eb' maysch'olnil cha.

¹¹ Toto tzchaj eb' yab'i', tzya'n 'och sb'a eb' 'a yol sc'ab', caw tzaljc'ojlal 'oj 'ec' eb', a tzyal jantc to sq'uinl eb' tz'ajxi.

¹² Palta toto ma'oj scha eb' yab'i', 'oj tzu'xoc cham eb'; may xon jac tas tzyojquej can 'el eb', ax s'atcn eb' 'a chamel.

¹³ A eb' tu snab'en cha, caw wal tzowxn̈ej eb', wach'xam tz'ajx 'och syailal eb' yuj Dios, palta matz yal sb'a eb' 'a 'a, yic tzc'ann eb' scolwal.

¹⁴ Caw quelmtac winc eb', tzlaj cham eb', q'uixweltac tz'aj eb' slajw 'eli.

¹⁵ A 'a scal syailal junc mach, a Dios tz'a'n nachjc 'el smul yu'uj sec tzcolchj can 'el 'a syailal.

¹⁶ 'Ixta ach yutj ach tic, ach scoln 'el 'a tas 'ay smay, 'ix ya'n smasnil tas 'a yol a c'ab', 'ix cot wal ch'ucn tas wach' sc'uxx 'a sat a mexa.

¹⁷ Palta ax ticnec, wan a b'eyc'ojlax yuj Dios, a yailal smoj yajx 'a eb' 'anma tu snab'en, a chi wan a chani.

¹⁸ Yuj cha, tan̈wj wal a b'a, sec ma'oj a satx'el yuj Dios mu'c yuj yowl sc'ojol; ma'oj stac' a'n niwn tumn 'a 'a, yic tzach colchj can 'el 'a yaln̈ yowl sc'ojl cha.

¹⁹ Toc 'ay yel'ch a ricoal 'a sat. Toc 'ay yel'ch pax a b'inab'ilal 'a 'a.

²⁰ Tan̈wj a b'a yic wach' matz ej cot q'uic'q'uinl 'a eb'an̈, tzyal 'el'chi atn yowl sc'ojl Dios tzsatn 'el jun tzo'n̈ chon̈ab'.

²¹ Tan̈wj a b'a, sec matz ach 'atx can 'a scal maysch'olnil, 'ix 'ajx cot jun yailal tic 'a eb'an̈ sec man̈xtzac a b'o maysch'olnil cha.

²² Tzcham wal eln spoder Dios. May junc cuywjum tztac' slab'tzan sb'a yet'oc.

²³ May junc mach tztac' yaln 'a 'a tas yowlal 'oj sb'o', matz tac' yaln pax 'a 'ixtic, maysch'olnil tzotej, man̈ xchic 'a 'a.

²⁴ Smasnil 'anma', tzbitnej swach'l Dios yuj tas b'ob'il yu'uj; an̈jtona pax ach tic, al a wach' paxti 'a jun xo.

²⁵ Wach'xam caw najt 'ay tas b'ob'il yu'uj, palta tztechj yiln eb' 'anma smasnil.

²⁶ A Dios caw wal niwn yel'ch yet' spoder, an̈ec xo tic, matz tac' cojcanec tas wal yaji, matz tac' pax calnec jantc yaj sq'uinal.

²⁷ A tz'i'n q'ue junjn t'ujn̈ a a' 'a cha'an̈, tzmeltztan 'och n̈ab'il.

²⁸ A 'a scal 'asun, ata tz'och a a chi n̈ab'il, tzlajw cha, tzcot tzicnjoc n̈ab' 'a quib'n̈ec.

²⁹ ¿Mach wal junc tztac' yojcan 'eli tas tz'aj spucn sb'a 'asn yu'uj, mto tzyojquej 'eli tas tz'aj sc'an̈ c'u 'a satcha'an̈?

³⁰ A Dios cha, a tz'a'n q'ue wan letz'lom 'a yib'n̈ a mar, yuj cha, tzcheclj tas 'ay 'a xab'l yich a'.

³¹ 'Ixta tzyutj Dios sb'eyc'ojlan eb' 'anma', tztac' pax ya'n tas tzc'ux eb'.

³² A yamjnac raya, tzjuln 'at 'a 'aj tznib'j tzjulb'ti, tojln̈ej sc'och jun raya chi 'a 'aj tznib'ej.

³³ Toto tzc'an̈ c'u, tzyal 'el'chi to wan ya'n n̈ab', 'intax no cajb'en noc', yojc no' to jab'xoj ya'n n̈ab' cha.