Job 35 - Chuj San Sebastian Bible

Yoxc'ajil spaxti Eliú

¹ 'Ix yaln pax Eliú 'ixtc 'a Job:

² ¿Tom wach' tza na'a, yic cob' 'ix alni to may a mul, sec tzyal am Dios chi a nani to may a mul cha?

³ Wach'xam 'ix al 'a Dios 'ixtic: ¿Tas aln eco wach'xam tz'och in mul? ¿Tom 'ay jac 'oj wic' 'a spatic yic matz 'och in mul 'ayach? xa chi.

⁴ An tic, 'oj wac' spac a paxti chi 'a sat eb' 'a wach'c'ojl tic.

⁵ Tzcham wal a q'ue q'ueln 'a satcha'an̈, ax elni chajtlto a 'asun, caw wal chan̈ yajb't 'a eb'an̈.

⁶ Toto tza'ch a mul, toc 'ay 'oj 'aj Dios o'oj; wach'xam caw wal niwn tzotj a sayn a muloc, toc 'ay 'oj 'ajoc.

⁷ Toxn̈ej caw wach' pax tas tza b'o'o, toc 'ay pax tz'aji; toc 'ay jac 'oj yic' Dios 'a a patquil.

⁸ A eb' quit 'anma'il, a eb' tz'ixtx 'el yuj a mul; a pax eb', wach' tz'el'ch yuj tas wach' tza b'o'o.

⁹ A eb' 'anma til wal tz'aj yixtxi, til wal sc'acw eb', tzlaj 'el yaw eb' yic tzlaj sayn eb' mach tzcoln 'el 'a yol sc'ab' eb' tz'ixtn cha.

¹⁰ Palta man̈oc Dios tzsayc' eb', atn jun b'ojnac eb', a pax tz'a'n yip eb', yic tzb'itnan eb' 'a yic 'ac'wal.

¹¹ 'Ec'b'al wal yaj on̈ scuynec Dios 'a yib'n̈ no noc' cajn 'a sat lum tic, yel xo wal jeln cajc yuj 'a yib'n̈ smasnil no ch'ic.

¹² Tzcob' yal sb'a eb' tz'ixtx chi 'a Dios, palta matz ta'w 'a eb', yujto caw wal tu sb'eyb'al eb', b'an̈quintac pax eb'.

¹³ A Dios tztac' yuj smasnil, matz chaj yab' paxti may yel'chi.

¹⁴ ¿Tas wal 'oj 'aj sta'w 'ayach yic tzalni to matz el Dios? A paxti tzalx 'a spatic 'ayx ec' 'a yojltac, yuj cha, to tza tan̈wej tas 'oj yutc sb'onyaji.

¹⁵ Yujto cob' tzal 'ixtic: A Dios matz ya'ch wal schicn 'a tas tz'och smulc 'anma', toc tzcot yowal, toc tzya'ch syailal junc mach, xa chi.

¹⁶ Palta ach tic mamin Job, a jun tzo'n̈ a paxti cha, toxn may jac tzyal 'el'chi, til wal tas tzcob' ala', palta toxn may jac a nab'en yic tzach paxtin cha, xchi Eliú 'a Job.