Job 34 - Chuj San Sebastian Bible

Schac'ajil spaxti Eliú

¹ 'Ix yaln pax Eliú 'ixtic:

² Ax jeln ex tic, ax cuywnacx tic, macljec eyab' tas 'oj wala':

³ A qui chiquin, a tzmaclni toto wach' tas tzalxi mto ma'ay, 'icha tzyutj yol qui ti' yab'lni tas tzqui c'uxu.

⁴ An̈jtona', 'ixta yaj jun tzo'n̈ paxti tzcalc tic, qui b'eyc'ojloquec tas tzcala, ax snachj 'el cujec tas wal yaji.

⁵ Yujto a Job 'ix yal 'ixtic: An tic toc 'ay in mul, palta a Dios matz in sb'oyaji.

⁶ 'Es tzwac'a toto tzwala to 'ay in mul. Wach'xam may in mul cha, palta matz b'ox in lajwelal tic, xchi.

⁷ Toxn may mach lajn 'icha Job tic, caw tzb'uchwj 'a Dios, lajn wal 'icha jac a a tzcuq'uej.

⁸ Tznib'j junn̈j tzyutj sb'a yet' eb' maysch'olnil sb'eyb'al, tznib'j jun yec' yet' eb' tu snab'en.

⁹ Xyalni to may tas tzca'c ganar yic wach' tzcutjec qui b'a 'a sat Dios.

¹⁰ Palta ax 'ay e nab'en tic, chajec eyab' tas 'oj wala'. A Dios tztac' yuj smasnil, tecn may 'aj tzb'o tas man̈ tojloc.

¹¹ A tz'a'n spac yic junjn mach, a tzyala tas tz'el sb'on junjn 'anma'; junjn mach 'oj scha spac smoj schani.

¹² Wal yel, a Dios tztac' yuj smasnil, may 'aj tzb'o tas man̈ tojloc.

¹³ May mach 'ix 'a'n yopiso yic tzya'n yajlil 'a yolyib'n̈q'uinl tic smasnil.

¹⁴ Q'uinloc tzyal sc'ojl Dios, tzyij pax 'ec' yic' 'ac'b'il yuj 'a 'ayn̈ qui masnil an̈ 'anman̈ec tic,

¹⁵ to 'ixta', jun 'ejmn̈ej tzon̈ chamc qui masnil, tzon̈ 'ochx canec poccal.

¹⁶ Mamin Job, toto ach tic caw 'ay a nab'en, chaj ab' tas 'oj wal tic; sictac tzach 'aj a maclni tas 'oj wala'.

¹⁷ Q'uinloc a Dios man̈ tojloc tas tzb'o'o, to 'ixta', ¿tom tztac' ya'n yajlil? ¿Tom tza nib'j tza'ch 'a yib'n̈ Dios jun caw wal wach' snab'en?

¹⁸ A eb' rey mto eb' yajal, toto man̈ wach'c tzyutj sb'a eb', matz xiw Dios yaln 'och 'a sat eb'.

¹⁹ A Dios matz ya'ch sb'a yet' eb' yajal, yet' pax eb' rico, tom ax yet' eb' meb'a' tzya'ch sb'a, palta lajnn̈ej yel'ch eb' 'a sat, yujto a xb'on eb'.

²⁰ Toto tzyal sc'ojl Dios, junn̈j wal rato tzlajw 'anma scham smasnil 'a junc 'ac'wal, yajn̈ej tzon̈ satc 'eli; ax eb' tzyal jelnal sb'a' mun 'oj cham eb' 'a 'ichn̈jta', man̈ 'anmac 'oj milnc eb'.

²¹ A Dios yojc sb'eyb'al junjn 'anma', tzyila tas yec' junjn mach.

²² A eb' maysch'olnil sb'eyb'al, matz tac' sc'ub'x 'el eb' yuj q'uic'q'uinal.

²³ A Dios matz yal 'a junc mach b'a'n̈ tzc'och sb'oyaj sb'a 'a yojltac.

²⁴ Man̈ yowlaloc tzc'anb'j 'ec' yab'i', tas tzyutj ya'n lajwc eb' niwc winac, sec chucx mach tz'ochx can sjelc eb' 'a yopiso.

²⁵ A Dios yojtac tas tzlaj sb'o eb', a 'a 'ac'wal tzc'och 'a eb', tzsatn can 'el eb'.

²⁶ 'A sat 'anma', tz'ajx 'och syailal eb' yu'uj, 'icha tz'aj junc maysch'olnil,

²⁷ yujto matz nib'j eb' syiclc tas tzyala, matz nib'j eb' sb'eylb'oc sley.

²⁸ A eb' meb'a', yet' eb' 'ay tas 'ay sc'a'l tz'och yu'uj, 'ix c'och yel yaw eb' 'a Dios yuj eb' maysch'olnil cha. 'Ix yab'i, to caw 'oltac yel yaw eb'.

²⁹ Toto a Dios may tas tzyala, ¿mach wal junc tztac' ya'n 'och 'a yib'an̈? Q'uinloc pax tzcub'j 'el sb'a Dios 'a eb', ¿mach wal junc 'oj stac' yilni? A Dios lajnn̈ej yel'ch yopiso 'a yib'n̈ junjn nacion̈ yet' 'a yib'n̈ junjn 'anma'.

³⁰ A tztenn 'ec' snib'b'en junc mach tu snab'en, sec matz yac' yajlil 'a yib'n̈ eb' chon̈ab', yujto ton̈j tz'ixtx eb' yu'uj.

³¹ Ach tic mamin Job, toc 'ix al 'a Dios 'ixtic: 'Ix 'och wal in mul, ax ticnec man̈x 'oj in b'o'.

³² Ch'ox cot in mul matz in na cot cha. Toto 'ay 'aj tu xlaj wutej, ax ticnec, man̈x 'oj in b'o jun 'ejm xo, comnoc xa chi.

³³ Toto ach tic matz a chaj ab' tas tzyal Dios, ¿tom tza na to 'oj yac' Dios spac 'aych 'icha wal tza nib'ej? Ach 'oj a na' tas tzotj a b'a, man̈oc in 'oj wal 'ayach; al cab'i', tas nab'il o'oj.

³⁴ A eb' jeln tz'ab'n tas tzwal tic, 'oj yal eb' 'ixtic:

³⁵ A Job tic, ton̈j scomn alj jun tzo'n̈ spaxti', toc 'ay xon jac yel'ch tas xyala.

³⁶ Comnoc wal tzcham sb'eyc'ojlaxi, ax cab' spac tz'ajx 'a 'a, lajn cab' 'icha yic junc mach maysch'olnil.

³⁷ A Job tic, man̈ cojnoc to 'ay smul, palta to caw tenmtac xyutj sb'a; q'ueln on̈c wal 'och 'a 'a, 'ix b'uchwj 'a Dios, 'ix sten sb'a yet'oc, 'oj schic eb', xchi Eliú 'a Job.