Job 33 - Chuj San Sebastian Bible

¹ Yuj cha, a ticnec mamin Job, maclj ab' tas 'oj wala'; tza chan pax ab'i'.

² Yujto a spac a paxti', lista xo yaj 'a yol in ti', yic tzwaln 'ayach.

³ A tas 'oj wal tic, atn stojlal in nab'en, 'oj wal 'aych yet' smasnil in c'ojol.

⁴ A Dios tztac' yuj smasnil, a b'ojnac in, a 'a'jnac 'och wic', yuj cha pitzn in.

⁵ Toto tza nib'j a pac 'ayin, ta'wan̈ 'ayin, 'ac' lista tas tzotj a pacni.

⁶ Lajn on̈ qui chawn̈il 'a sat Dios, yujto a pax 'a lum lum cotn̈c in.

⁷ Yuj cha, may yuj tzach xiw wu'uj, yujto ma'oj wa'ch in b'a yajlil 'ayach.

⁸ Coyn wal 'ixtc 'ix otj aln xwab'i:

⁹ An tic wach' in, may xon in mul, may in paltail, toc 'ay tu tzin b'o'o.

¹⁰ Palta a Dios tzsayq'ui tas tzin 'aj wajx queja, 'icha junc 'ajc'ojl yajch 'a 'a, 'ixta tzin yutej.

¹¹ 'Ix ya'ch cadena 'a woc, q'uelnn̈ej 'och 'ayin 'aj tzin 'eq'ui, xa chi xwab'i.

¹² Palta a tas 'ix al tic, caw man̈ tojloc, yujto a Dios yel xo wal niwn yel'ch 'a quib'n̈ an̈ 'anman̈ tic.

¹³ ¿Tas yuj tzalch 'a sat, chajtlto matz pac tas tzal 'a 'a?

¹⁴ A Dios, til wal nab'enal tzyutj paxtinc sb'a, palta matz nachj 'el cuj an̈ 'anman̈ec tic.

¹⁵ 'Ay 'aj tzpaxtin 'a waychil mto 'a 'ilwalil 'a junc mach, yic waync 'a 'ac'wal.

¹⁶ A Dios tzpaxtin 'a snab'en eb' 'anma', yic tztenn 'och wan eb' 'a tas tzb'o'o, tzya'n 'och eb' 'a xiwc'ojlal.

¹⁷ 'Ixta tzyutj Dios eb', sec tzyij 'el sb'a eb' 'a tas maysch'olnil, yic man̈ comnoc tzyij chan̈ sb'a eb'.

¹⁸ 'Ixta tzyutj scoln 'el eb' 'a yol sc'ab' chamel, sec matz satl eb'.

¹⁹ 'Ay pax 'aj jun, a yet' yailal tzyac' cuenta Dios eb' 'anma', tzyab' wal eb' syal yet' sniwnal.

²⁰ A smasnil tas wach' cob' tz'ajx sc'uxu', ton̈j tzyajli.

²¹ 'Ipn stz'onb' chan̈ sniwnal, c'uxn tzcheclj sb'acl 'a sniwnal smasnil.

²² A jun cha, 'icha to 'ayx 'ec' sniwnal 'a campusan, 'ayx 'och 'a yol sc'ab' chamel.

²³ Palta q'uinloc a 'a scal nan̈loc yángel Dios, ata tzcot junc tzcolwj yet' jun winc cha, tzyaln 'a Dios to wach' sb'eyb'al,

²⁴ tzyalni to tz'o'ch sc'ojl Dios chi 'a 'a, yic tzcoln 'el 'a yol sc'ab' chamel, yujto checl yaj jun mach 'oj mannc can 'eli.

²⁵ 'Ixta 'oj 'aj sb'ox sc'ojol, ax sniwnal caw wal 'oj 'unnb'oc pax jun 'ejm xo, 'icha 'a yic scotch 'a quelmal.

²⁶ A yic 'oj yalnc sb'a 'a Dios, ax ya'n Dios chi swach'c'ojlal 'a yib'an̈; caw tzaljc'ojlal 'oj yil-lac 'och sat yet' Dios, ax Dios chi 'oj 'a'nc 'och 'a wach'c'ojlal yet' jun 'ejm xo.

²⁷ Ax yaln 'a sat eb' 'anma 'ixtic: 'Ix 'och in mul, 'ay tas man̈ tojloc xlaj in b'o', palta ma'ix ya'ch Dios in yailal 'icha wal smoj in chani;

²⁸ a xyutej, to in scol-l 'a yol sc'ab' chamel, yuj cha, tzat wil jab'x sacq'uinl tic, 'oj xchioc.

²⁹ 'Ixtnta tzyutj Dios eb' 'anma', man̈ jun cha'ejmocn̈ej tzyutj 'ixta';

³⁰ yuj scolx 'elt eb' yuj 'a yol sc'ab' chamel, tzya'n yil eb' jacx sacq'uinal.

³¹ Mamin Job, ab' wal tas tzwala; sictac cab' 'aji yic tzin paxtini.

³² Toto 'ay tas tza nib'j ala', tztac' alni; toto 'ay tas tznachj o'oj, ala, tzin nib'ej to may a mul tzcan 'a eb'an̈.

³³ Toto may tas jun, maclj ab' tas 'oj wala', sictacn̈ej tzach 'aji, 'oj ach in cuy 'a jelnal, xchi Eliú.