Job 30 - Chuj San Sebastian Bible

¹ Palta ax ticnec, a eb' quelmtac winac ton̈j tzin stzetzj eb', a 'a yic yaln̈tax cha, man̈ smojc xin chaj 'och wan smam eb' yet' e no in tz'i tztan̈wni in calnelu.

² A eb' cha, man̈x 'a tz'och yip eb' wu'uj, yujto wan xo laj yel yip eb'.

³ Yuj meb'a'il yet' yuj wejel, tzsayn 'at sb'a eb' 'a lum cusltac lu'um; ax sch'an̈l yib' te tzjoy q'uet eb' sc'ux ta'.

⁴ Tzlaj sayn eb' slo te 'itj caw c'a 'a scal waymtac; tzlaj saync eb' sc'ux yib' te meslab'.

⁵ A eb' cha, pechb'il 'el eb' yuj eb' yit chon̈ab'. Tz'el yaw eb' 'anma', tz'at eb' 'a spatc eb', 'icha tz'aj spechx junc 'elc'um;

⁶ ax 'a yoltc n̈aq'uen xcan cajn eb'. 'Ay eb' xlaj can 'a sat c'acap, 'ay pax eb' xlaj can 'a sat q'ue'en.

⁷ 'Ix laj 'awj chan̈ eb' 'a cal c'ultac, xlaj syamn sb'a eb' 'a yaln̈ yen̈l te q'uixte'.

⁸ A jun tzo'n̈ 'anma cha, may xon jac tztac' yuj eb', quistal 'anma smam eb', pechb'il 'el eb' 'a scal yit 'anma'il.

⁹ Ax ticnec, tzin laj sb'uch eb' yunnal eb', tzin laj yetz'tanc eb'.

¹⁰ Caw wal tzin syaj eb', yuj cha tz'el eb' 'a in tz'ey, tzlaj tzub'n 'och eb' 'a in sat.

¹¹ Palta ax ticnec, ya' sb'a to xyij 'el Dios sat 'ayin, xin ya'n can 'och 'a yailal, caw wal man̈x 'a xon jac wel'ch 'a sat eb'.

¹² A eb' 'anma tzchichn 'och 'ayin, tzjaw wal ch'ucn eb' 'a in tz'ey yic tzin 'em yuj eb' snani, tzyamn 'och eb' yac' owl wet'oc, tznib'j eb' to tzin cham muc'uc.

¹³ Tzmac eb' yol in b'e, yic tzin ya'n lajwc eb' snani; toc 'ay mach tztenn 'och wan eb'.

¹⁴ 'Icha to 'ay junc oln 'aj x'oxt eb' 'a yich smuroal chon̈ab', mto 'icha tzyac' 'ic'n̈ab', 'ixta x'aj sjaw tza'njoc eb' 'ayin,

¹⁵ 'ixta wal x'aj sjaw xiwc'ojlal 'ayin. Ax in b'inab'ilal, 'ix 'at 'elc 'icha s'at 'ic'. A smasnil tas 'ay 'ayin, 'ix satchan̈ 'icha tzyac' 'asun.

¹⁶ A ticnec wan in chami, tas to yuj pitzn in; man̈xtzac 'och wan in yailal tic.

¹⁷ A 'in yailal tic, c'uxn tz'och syal 'a yol in b'aquil; toxn matz 'och wan syail tz'ec' 'ac'wal.

¹⁸ A Dios, 'icha wal to x'och b'ann 'a yib' in jaj, yet' wal yip sc'ab' sut'n 'och in pichl 'a in jaj, tzin stzicb'tan̈ni.

¹⁹ In sjuln 'ejm 'a scal b'iq'uich, 'icha xoj wal pococ mto 'icha q'uen stan̈il c'ac', 'ixta xoj wilx 'a sat.

²⁰ Tzcob' in c'an a colwal ach in Diosal, palta toc tzach ta'w 'ayin. Tzcob' wal in b'a 'ayach, toc tza chaj ab' tas tzwala.

²¹ Tu tzotj a nab'en 'ayin, tzin a pech b'ey yet' yowl a c'ojol.

²² Tzin a'n yutz'c chan̈ 'ic', ax 'ic'n̈ab' tzin ac' tzicb'tan̈noc.

²³ Wojc xo to wan in e'n 'at 'a chamel, atn jun lugar 'aj 'oj c'och smasnil 'anma pitznto ticnec.

²⁴ Palta an tic, in cob' colwjoc 'a eb' meb'a', in colwj 'a eb' wan scham yuj meb'a'il.

²⁵ In laj 'oc' yet' eb' 'aych 'a syailal, 'ix 'o'ch pax in c'ojl 'a eb' may jac tas 'ay 'a 'a.

²⁶ Yuj cha, a tzaljc'ojlal xin tan̈wj sjawi, ax x'aji, a in cusc'ojlal xjawi; xin tan̈wj sjaw sacq'uinl 'a wib'an̈, ax x'aji, a q'uic'q'uinl 'ix jawi.

²⁷ Caw wal tz'ib'x in pixn yuj xiwc'ojlal, toc 'ayt jac 'iljel yu'uj; caw wal tan̈b'iln yuj yailal.

²⁸ 'Ix jaw wal cusc'ojlal 'a wib'an̈, 'icha wal to man̈xtzac wil sacq'uinlal yoc c'u; wal 'a sat smasnil eb' 'anma', xcob' in q'ue wan in c'an colwal.

²⁹ Caw wal cusltac xoj yel waw 'icha no 'ocs 'a 'ac'wal, mto 'icha no chulpop.

³⁰ A 'in niwnal tic, caw wal tzchiwj smasnil yuj c'ac', 'ix q'uic'b' pax 'el in tz'umal.

³¹ A 'a yic yaln̈taxi, tzlaj in yuc in arpa, tzwutz'n pax in 'amay, ax ticnec, cojxn 'oc'l tzin c'an in b'o yuj yailal.