Job 3 - Chuj San Sebastian Bible

'Ix stzactzj chan̈ Job yuj syailal

^1-2 Xlajw yec' uque c'u cha, 'ix yaln win Job jun tzo'n̈ tu paxti 'a yib'n̈ jun c'u 'aj 'aljnac, xyaln 'ixtic:

³ Caw tzin catb'ej jun 'ac'wl 'aj cuchb'iln chan̈ yuj in nun, tzin catb'ej jun c'ul 'aj 'aljnac in.

⁴ Comnoc a jun c'u cha, 'ix ya'cn 'och sb'a 'ac'wlil, comnoc ton̈j xcan 'ixta yuj Dios, octom wal ma'ix sacb'xon 'eli.

⁵ Comnoc 'ay junc tas q'uic'q'uinl x'ajch 'a yib'an̈ sec xq'uic'b' 'eli, mto a junc q'uic' 'asn tzc'ub'n 'eli, mto pax junc xo tas tz'ec' 'a sat sec x'och xiwc'ojlal 'a jun c'u cha.

⁶ Comnoc q'uic'q'uinln̈ej x'ajcn 'a jun 'ac'wl cha, sec ma'ix 'och jun c'u chi sb'isloc jun tzo'n̈ c'u 'a jun 'uj 'a yol jun ab'il cha.

⁷ Comnoc may tas 'ix uj 'a jun 'ac'wl cha, sec may jun tzo'n̈ 'aw yic tzaljc'ojlal xlaj 'ochi.

⁸ Ax eb' cob' tzyalch sb'a to 'ay tas tztac' yu'uj, comnoc scatb'ej can eb' jun 'ac'wl cha, eb' tztac' ya'n 'och no Leviatán yiclumal.

⁹ Comnoc wal ma'ix q'uel xon sacb'sun 'a yic jun sq'uin̈b'il cha, comnoc ma'ix tan̈wx xon sacb'i, yic sacb' cot yib'cha'an̈.

¹⁰ Caw tzin catb'ej jun 'ac'wl 'aj 'aljnac in, yujto ma'in stench wan 'a yic xc'och stiempoal walji, alto ma'ay, tecn matz wil jun tzo'n̈ yailal tic yet' cusc'ojlal.

¹¹ Octom in cham 'a yol sc'ojl in nun, mto 'a yic in 'alji in chami.

¹² Octom ma'in smec' in nun yic in ya'n chuwoc yic in sq'uib'tzani,

¹³ Comnoc chamnc in, to 'ixta', caw wal tzaljc'ojlal tzin wayi, caw wal tzin 'ilj 'a junc'ojlal.

¹⁴ To 'ixta' junn̈j waj yet' ewin rey, yet' pax eb' niwc yopiso 'e'nc 'a pecti', eb' to b'ojnac chan̈ jun tzo'n̈ niwc n̈a lan̈chjnac xo 'ejmi,

¹⁵ atn eb' niwc yajl xlaj sb'ut' yatut yet' q'uen oro mto plata.

¹⁶ Octom in mucx 'icha junc 'e'lti 'unin, mto 'icha eb' chamnc xoni yic tz'alji.

¹⁷ A 'aj tzmucx eb' maysch'olnil snab'en, ata tzlajw can c'och yixtn eb' 'anma'; a pax ta tz'ilj eb' 'ixtb'il yuj eb'.

¹⁸ A pax ta tz'ilj eb' 'icha preso yaj yuj munljel, man̈x 'aj 'oj 'ab'xoc stumj eb' 'ilm munljel cha.

¹⁹ Atnta 'ayc' eb' niwc winac yet' eb' may wal yel'chi. A pax ta 'ayc' eb' colchjnacx 'el 'a yol sc'ab' spatron̈, lajn xoj yaj eb' smasnil ta'.

²⁰ ¿Tasm yuj tzyac' Dios sacq'uinl 'a yib'n̈ eb' tz'ixtxi? ¿Tasm yuj an̈ja ya'n sacq'uinl 'a yib'n̈ eb' 'aych 'a cusc'ojal?

²¹ 'Ay mach cob' tznib'j cham sb'a, palta matz cham paxi; wach'xam cob' tzsay tas tz'aj scham 'icha qui sayn 'ec' ricoal, palta matz 'ilchj yu'uj.

²² At yic tzc'och junc 'anma chi mucxoc can 'a campusan, atta tzcan 'a tzaljc'ojlal.

²³ ¿Tasm yuj an̈ja ya'n Dios sq'uinl junc 'anma man̈ yojcoc 'aj tzc'ochi, 'icha to macb'il yol sb'e chi yuj Dios?

²⁴ Tzcob' in nib'nc wa in b'a, palta ton̈j tzjaw si'snoc in c'ojl woq'ui, toxn matz 'och wan in c'acw wab'n syail.

²⁵ A smasnil tas tzin xiw sjaw 'ayin, atn wal jun tzo'n̈ chi xjaw 'a wib'an̈.

²⁶ A ticnec, man̈x 'a xon jac 'iljelal wu'uj, man̈x 'a xon jac swach'l waji; man̈x xon jac in junc'ojlal, cojxn yailal tzwila', xchi Job.