Job 29 - Chuj San Sebastian Bible

Snajnac cot Job chajtl yilx 'a yic yalan̈

¹ Syamn 'och Job yaln jun 'ejm xo 'ixtic:

² Comnoc wal tztac' in c'ochx 'icha wal waj xon 'a yic jun tiempoal 'a yaln̈taxi, yic caw wal tan̈b'iln yuj Dios.

³ A tzin tzictajni, yuj cha wach' wec' 'a scal q'uic'q'uinal.

⁴ A yic quelm in winac, caw wal checl scolwj Dios wet'oc, yet' 'a tas 'ay 'a yol wet'ul.

⁵ A 'a jun tiempoal cha, a Dios tztac' yuj smasnil, 'ayt 'ec' wet'oc, ax eb' wunnal, oyn 'och eb' 'a in tz'ey.

⁶ Caw wal tzyac' sobra slech no 'in wacax, ax eb' te wawb'en olivo 'a cal q'ue'en, caw tzyac' sobra yaceiteal te'.

⁷ A yic 'ay yamnil tz'och 'a yol chon̈ab', caw wal sayb'il in xila 'aj tzin 'emwocan.

⁸ A yic tzin yiln eb' quelmtac winac, tzyij 'el sb'a eb' 'a yol in b'e, ax eb' 'ichmtac winac, tzlaj q'ue wan lin̈n eb' yic tzin yiln eb'.

⁹ A eb' niwc winc 'ay yopiso, tz'och wan eb' spaxtin wu'uj, tzlaj sch'oxnc eb' senya yic sictac tz'aj eb'.

¹⁰ A eb' niwc yajl cha, caw c'un xoj spaxtin eb', 'icha to tzlaj can tzayn yac' eb' 'a yol sjom.

¹¹ A yic tzyab'n eb' 'anma in paxtini, caw wach' tzlaj yal eb' 'a in patic, tzch'oxn eb' swach' nab'enal 'ayin.

¹² Yujto an tic, in laj colwj 'a eb' meb'a 'unn chamnc smam, yet' 'a eb' may xon jac tas 'ay 'a 'a, atn eb' may xon mach tzcolni.

¹³ A eb' tzlajw 'ejm yuj meb'a'il, xyal eb' yuj diosal 'ayin; ax eb' 'ix 'ix chamnc yichmil, tzalj eb' 'ix yujto tzin colwj 'a eb'.

¹⁴ A tojlal yet' yiclumal, a chi wic yaji; 'icha to in pichl yajch 'a junjn c'u.

¹⁵ 'Ix in quetz b'ey eb' matz uj yilni yet' eb' coxo, in colwj 'a eb'.

¹⁶ 'Icha to mamb'il waj 'a eb' 'ay tas sc'a'l tz'och yu'uj, tzin colwj pax in b'onyaj eb' chuc chon̈b'al yic 'ay tas tznib'j eb' sb'o'yaji.

¹⁷ Xwij 'el yopiso eb' 'ixtm 'anma', xin coln eb' 'aych 'a yol sc'ab' eb'.

¹⁸ 'Ix waln 'ixtc yet' in nab'en: An tic, til wal sc'ul 'oj wila', lajn sb'isl 'icha yarenail sti a mar. Caw wal 'ichmal 'oj waj in cham 'elt 'a yol wet'ul.

¹⁹ Lajn in 'icha junc te te 'awb'il 'a sti junc a', ax sc'ab' sja'l wal schan chicb'chan̈ tz'em 'a 'ac'wal.

²⁰ A 'in b'inab'ilal, 'oj alb'tan̈xn̈ej, may b'a'n̈ 'oj 'och wan yalxi, xin chi.

²¹ A yic tzin paxtin 'a scal 'anma', caw wal sictac tz'aj eb' smaclni yab' tas tzwala yet' tas nab'enal tzwac' 'a eb'.

²² Ax yic tzlajw in paxtin cha, toc 'ay mach tzc'anb'n yab' junc xo tas 'ayin; caw wal wach' jun tzo'n̈ in paxti chi tzyab' eb'.

²³ Caw wal tznib'j eb' yab' tas tzwala, 'icha wal qui nib'n ya'n n̈ab' 'a yic cuaresmail.

²⁴ A yic tzin tzewji, tzwaln junc chi yab' eb', 'ijn wal matz chaj eb' yab' 'ayin toto yel. Caw tz'och q'ueln eb' 'a in sat, toto yel tzin tzalj yet' eb'.

²⁵ 'Ix wa'ch wopiso 'a scal eb', an tzwala tas yowlal tzb'o eb', 'icha tzyac' junc rey tzb'ab'lj yuj eb' soldado, 'ixta xwutj in b'a 'a eb'. A yic 'ay scusc'ojlal eb', an tzwac' sniwnal sc'ojl eb'.