Job 28 - Chuj San Sebastian Bible

Alj wach' paxti yuj jelnal

¹ A q'uen plata, 'ay sminasil q'uen 'aj tz'elta, ax q'uen oro, 'ay pax yet'l q'uen 'aj tzb'o'i.

² A q'uen hierro, ata tz'elt q'uen 'a scal lum lu'um, ax q'uen q'ue'en, a yic tzn̈usx q'ue'en, ata tz'elt can q'uen cobre.

³ A eb' 'anma', man̈x 'a xiwc'ojlal eb' 'a q'uic'q'uinal. Tz'ejm eb' 'a yol junc xab' 'a yol lu'um, ax 'a xab'l yich lum lum cha, ata tzlaj sayc' eb' q'uen q'uen cha.

⁴ Tzlaj sjacn eb' jun tzo'n̈ minas 'aj man̈xtzac 'ec' 'anma', 'a jun tzo'n̈ lugar najt yaj 'a stz'ey chon̈ab'. 'Aych lasu 'a snan̈l eb', tzlaj t'un̈n 'ec' eb'.

⁵ A 'a sat lu'um, ata tzpac' chan̈ tas tzc'uxxi, ax 'a yaln̈ lu'um, may stzol-l yaji, 'icha to wotquixtac yaj yuj c'ac'.

⁶ Ata tz'ilchj q'uen zafiro, yet' q'uen oro caln yaj yet' lu'um.

⁷ A jun b'e yic minas cha, may junc no ch'ic, may pax junc no 'usj 'ojtnac.

⁸ A e no chiwjum noc', man̈xtzac 'ec' e no ta', matz 'ec' pax e no león.

⁹ A eb' winac, tzlaj 'och t'un̈n eb' 'a sat q'ue'en, tzlaj syamnc 'och eb' sjoyn q'uet yich eb' lum niwc witz.

¹⁰ Tzlaj yolnc eb' oln xab' tz'aj yich 'a sat eb' q'uen niwc tenam, axta tzlaj say eb' yil smasnil ricoal.

¹¹ Tzlaj sjoync eb' a spac'b'a', axta tzlaj yic' q'uet eb' tas c'ultac yaj 'a sacq'uinl tic.

¹² Palta ¿'aj wal tzcot jun jelnal cha? ¿tas lugaril 'aj tz'ilchji?

¹³ A jun cha, may junc 'anma 'ojtnac tas yaji; may xon 'aj tz'ilchj jun chi 'a yolyib'n̈q'uinl tic.

¹⁴ Wach'xam tzcob' qui sayc 'ec' 'a xab'l yich a mar, ma'oj 'ilchjoc xon cujec ta'.

¹⁵ Matz tac' qui mannec yet' q'uen oro, mto yet' q'uen plata.

¹⁶ Matz tac' qui tojnec yet' q'uen oro caw wach', mto yet' q'uen cornalina, mto yet' q'uen zafiro.

¹⁷ A jun cha, yel xo wal 'ec'b'al swach'l 'a q'uen oro mto 'a q'uen cristal; matz tac' pax sjelx yet' q'uen oro b'ob'il xo.

¹⁸ A jelnal, yel xo wal nib'b'il 'a yib'n̈ q'uen coral; 'ec'b'al yel'ch 'a yib'n̈ q'uen cristal yet' 'a q'uen perla.

¹⁹ Matz tac' slajb'tzax yet' q'uen crisólito tzcot 'a Etiopía; matz tac' stojx yet' q'uen oro caw wach'.

²⁰ ¿'Ajtil tzcot jelnal chi jun? ¿Tas lugaril 'aj 'ay nab'en cha?

²¹ A jun cha, c'ub'b'il 'el 'a smasnil 'anma', matz tzch'oxx yil e no ch'ic.

²² A yet'l spixn eb' chamnac yet' jun chaml cha, xyal eb' 'ixtic: A jun cha, ton̈j 'ix cab' yab'xil, xchi eb'.

²³ Palta a Dios yojtac 'aj 'ay sb'el jun jelnal cha; cojn 'ojtnac 'aj tz'ilchj yu'uj.

²⁴ Yujto tzyil 'aj tzlajw c'och sti lum lum tic, yojc paxi, tastc 'ay 'a yaln̈ satcha'an̈.

²⁵ A yic xya'n can 'och Dios yip 'ic', yet' pax yic xya'n can 'ejm yechl 'aj tzc'och smacn a a',

²⁶ yic sb'on can sleyl ya'n n̈ab' yet' 'a yic sb'on can sb'el 'aj tzb'ey letz'lo'om yic tzma'n sb'a c'u,

²⁷ ata xyil sjelnal, chajtlto caw niwn yel'chi. Sb'eyc'ojlani, 'ix yilni to wach' tz'ajcn 'ixta'.

²⁸ 'Ix yaln Dios 'ixtc 'a eb' 'anma': Toto niwn wel'ch 'a e sat, atn jelnal cha; toto tzeyij 'el e b'a 'a scal maysch'olnil, caw 'ay e nab'en tzyal cha, xchi Dios, xchi Job.