Job 27 - Chuj San Sebastian Bible

¹ Scha aln pax Job 'ixtic:

² Tzwac' in ti 'a sat Dios tztac' yuj smasnil, jun matz in b'onyaji, to a tzin 'a'n cusoc,

³ ya' sb'a tzat yac' Dios wip yic tzwi'n jac wic',

⁴ may xon wal 'aj 'oj wal tas man̈ yeloc, may junc 'es paxti' 'oj wala'.

⁵ Ya' sb'a pitzn in to, may b'a'n̈ 'oj wala' to yel tas tzeyala; ma'oj in chach 'a wib'an̈ to yuj in mul 'ixta tzin 'aji.

⁶ An tic, ma'oj wactc walni to tojl in nab'en, yujto wojc si'mb'il to may in mul.

⁷ Smasnil eb' tz'och 'ajc'ojlal 'ayin, lajn cab' tz'aj sjaw yailal 'a yib'n̈ eb' 'icha tz'aj sjaw yailal 'a yib'n̈ eb' maysch'olnil sb'eyb'al, yet' eb' man̈ tojloc snab'en.

⁸ ¿Tas to junc 'aych yipc sc'ojl eb' maysch'olnil sb'eyb'al yic tzyi'n 'ec' Dios sq'uinl eb'?

⁹ A yic 'ayx 'och syailal eb', man̈x 'oj scha Dios yab' tas 'oj yal eb'.

¹⁰ Yujto may 'aj 'ix yij eb' stzaljc'ojlal 'a spatquil Dios tztac' yuj smasnil, may xon 'aj xyal sb'a eb' 'a 'a.

¹¹ Ax ticnec jun, 'oj in ch'ox eyil spoder Dios, atn tas nab'il yuj jun mach to tztac' yuj smasnil.

¹² Toto ax tic, eyiljnacx smasnil jun tzo'n̈ cha, ¿tas yuj man̈toc tojl tzeyutj eyalni?

¹³ Atn jun yailal tic tzyac' Dios tztac' yuj smasnil, spacc 'a eb' maysch'olnil sb'eyb'al yet' 'a eb' tu snab'en.

¹⁴ Wach'xam niwn yunnal eb', palta 'oj cham eb' 'unnab'il chi 'a scal owal, mto a wejl 'oj milnc eb'.

¹⁵ A eb' ma'oj chamoc, a yab'il 'oj milnc eb', 'oj can yistl eb', toc 'ay eb' 'ix 'oj 'oc' yuj ewinac.

¹⁶ A eb' tu sb'eyb'al cha, wach'xam til wal q'uen plata tzmontoej eb' 'icha lum lu'um, mto til wal spichl eb' b'uln 'eq'ui,

¹⁷ palta am eb' tojl snab'en, a eb' 'oj 'a'nc 'och jun tzo'n̈ pichl cha; am eb' wach' snab'en, a eb' 'oj 'ica'anc q'uen plata cha.

¹⁸ A yatut eb' maysch'olnil snab'en cha, lajn 'icha sjoxl 'ixm sat 'ixm 'aj tz'elt no ch'unam 'ij, caw wal c'un spoji, mto 'icha jac pat xilte 'ay q'ue 'a yib'an̈.

¹⁹ A eb' maysch'olnil snab'en, 'oj 'ec' teln eb' sway 'a jun slajb' 'ac'wl yet' smasnil sricoal, ax yic 'oj 'elx swayn̈ eb', man̈x 'a xon jac tas 'ay 'a eb'.

²⁰ A jun tzo'n̈ tas 'aj tzxiw eb', a 'oj jawc 'a yib'n̈ eb' 'icha a 'elmal a', 'icha tz'aj yijx 'at junc tas yuj 'ic'n̈ab' 'a yic 'ac'wal.

²¹ 'Icha tzyac' junc tas tz'ec' smac' 'elt 'ic' tzcot 'a stojlal 'aj tzq'uel c'u, 'ixta 'oj 'aj yijx 'el eb' 'a yatut.

²² 'Oj 'ijxocn̈ej 'at eb' wach'xam tzat cob' ya'lc eb' s'at 'eloc, palta man̈x 'a niwnc'ojlal 'a eb'.

²³ A jun 'ic' cha, caw wal 'oj jommoc, ax xub'n sc'an̈ s'at 'a spatc eb'.