Job 24 - Chuj San Sebastian Bible

¹ A Dios tztac' yuj smasnil. ¿Tas yuj matz yac' 'ab'xoc 'aja sc'ul tzb'eyc'ojlwi sec wach' tztan̈wx yuj eb' swach'c'ojl 'a jun c'u cha?

² A eb' maysch'olnil snab'en, tzt'un̈ eb' yechl slu'um, tzlaj 'och eb' 'el'j calnelu, sec tzniwtj sb'isl yic eb' cha.

³ Tzlaj yi'nc 'ec' eb' sb'uru eb' meb'a 'unn chamnc smam, tzto'n 'ec' eb' swacx eb' 'ix 'ix chamnc yichmil yuj smajnb'ilc stumn eb'.

⁴ Ax eb' meb'a tzc'ann jac colwal 'a eb' 'anma tzb'ey 'a b'e, tzlaj 'ijxoc 'el eb' 'a yol b'e chi yuj eb'; tzlaj sc'ub'n 'el sb'a smasnil eb' 'emmquilal yec' yuj eb'.

⁵ A eb' meb'a cha, lajnxoj eb' 'icha no calte'al b'uru 'a cusltac lu'um, teb'il tz'ilchj jac tas tzc'ux eb'. A 'a lum cusltac lum chi 'oj say eb' tas tzyac' sc'ux yunnal.

⁶ A 'a scal yoc strigo eb' chuc 'anma'il, ata tz'at sic' eb' jac schon strigo, ax 'a scal yawb'en uva eb' maysch'olnil snab'en, ata tz'at smitz'c eb' jac sat uva cha.

⁷ A eb' meb'a cha, toc 'ay spichl eb' 'aychi yic tzway eb' 'a 'ac'wal, toc 'ay jac tas tzpotch eb' yuj si'ic.

⁸ Ax yic tzya'n n̈ab', caw tzlojx 'el eb' 'a calcte', tzlaj cob' yecnc 'och sb'a eb' 'a yich eb' q'uen niwc q'ue'en.

⁹ A eb' maysch'olnil snab'en cha, tzlaj yi'cn 'ec' eb' stz'ulc 'unn eb' 'ix 'ix chamnc yichmil yuj smajnub'l junc tas tzmajnj eb'.

¹⁰ Teb'il 'aych ja'jb'oc spichl eb' tzlaj 'ec' eb'. Tz'ec' eb' cuchj trigo, palta wan scham pax eb' yuj wejel.

¹¹ 'Aych eb' syuc q'uen niwc q'uen 'aj tz'elt aceite, tzlaj ste'nc 'el eb' yalil te uva, palta tzcham pax eb' yuj tacn̈ti'al.

¹² A eb' tzlajwi, til wal yel yaw eb', wan laj scham eb' 'a scal eb' 'anma', palta matz yab' Dios slesl eb'.

¹³ 'Ay eb' matz nib'n jun b'e yic sacq'uinal, toxn matz b'eylb'ej eb' jac stojlal.

¹⁴ A junc ma'm cham 'anma', caw tzseb' q'ue wa'an, tz'at smilnc junc meb'a 'anma', ax yic tzq'uic'b' can pax 'ejmi, tzya'n 'och sb'a 'elc'mal.

¹⁵ A eb' tzb'on 'ajmulal, tan̈b'il sq'uic'b' yuj eb', tzmacn eb' sat sec may mach tz'iln eb' snani.

¹⁶ Ax eb' 'elc'um, a 'a 'ac'wl tz'och eb' 'elc'l 'a te n̈a, ax 'a c'ual, ton̈j tzmacn̈aj sb'a eb'; matz nib'j eb' yil sacq'uinal.

¹⁷ A sacq'uinl cha, caw tzxiw eb' 'a 'a; ax q'uic'q'uinal, caw wal tzalj eb' yet'oc, yujto ata tzxiw jun tzo'n̈ xo eb' 'anma'.

¹⁸ A eb' 'anma maysch'olnil snab'en, yajn̈ej ax yec' eb' 'icha a b'eymal a', ax slum eb', 'oj catb'tzax cani, man̈x 'a mach 'oj munljoc 'och 'aj 'ay yawb'en uva eb'.

¹⁹ 'Icha tz'aj sat 'ejm q'uen chew yulb'x yuj yoc c'u; 'ixta tz'aj eb' maysch'olnil sat 'ejm 'a 'aj tzmucxi.

²⁰ Tz'atcn eb' 'a satc'ojlal yuj snun; ax no ay tzchin schib'jal eb', toc 'ayt mach 'oj nanc cot eb'. A eb' maysch'olnil snab'en cha, lajn wal tz'aj yem eb' 'icha junc te te tzch'acx 'ejmi.

²¹ A eb' 'ix 'ix may yune' yet' eb' 'ix chamnc yichmil, caw wal tz'ixtx eb' 'ix yuj eb', may xon 'aj tzcolwj jac eb' 'a eb' 'ix.

²² Tz'ijx 'at eb' 'ay yip chi yuj spoder Dios. A wal yic tzch'oxn Dios chi spoder, toc 'ayt junc mach ma'oj xiw 'a chamel.

²³ Toto tz'el 'a sc'ojl Dios to pitzn eb' tu tzyutj sb'a cha, palta q'uelnn̈ej 'och 'a tas tzlaj sb'o eb'.

²⁴ Caw yajn̈ej tzniwtj chan̈ eb' maysch'olnil snab'en, an̈jtona', yajn̈j wal cha tzsatx can 'ejm eb'. Tzcham eb' 'icha tzyac' jun tzo'n̈ xo eb' 'anma'. Tzto'x 'el eb' 'icha te c'ultc tzto'x q'uet 'a yol lu'um, mto 'icha tzyac' 'ixm schon trigo tzpolxi.

²⁵ Toto man̈ 'ichaoc tzwal tic, man̈ 'ixta'oc yaji ¿mach wal junc tztac' sch'oxni mto tzyala to 'es jun tzo'n̈ wan waln tic? xchi win Job.