Job 23 - Chuj San Sebastian Bible

¹ 'Ix ta'w pax Job, xyaln 'ixtic:

² A ticnec an̈ja to yel waw yuj in yailal, wach'xam caw wal tzin c'acwi, palta an̈ja ya'n 'och Dios in yailal.

³ Comnoc wal tztac' wojcan 'eli 'aj tztac' in chan in b'a yet'oc; 'ayc wal tz'aj wojcan 'eli tas tzin 'aj in c'och 'a sdespacho.

⁴ To 'ixta', tzwal in yailal tic 'a 'a, yujto til wal tas tzin nib'j wala'.

⁵ Toto 'ay tas 'oj yal 'ayin, wojc xo tas 'oj wutc in ta'w 'a 'a.

⁶ Ma'oj sc'anlb'oc am yip yic tzin stenn 'och wa'an, palta tecn ton̈j 'oj yab' tas 'oj wala'.

⁷ 'Oj yojcoc am 'eli to yel tas tzwala, ax yaln am b'i'an to may in mul, 'ixta am 'oj waj wel 'a libre yuj 'a jun 'ejmn̈ej.

⁸ ¿Q'uinloc tz'at in sayc' Dios 'a 'aj tzq'uel c'u, toc 'oj 'ilchjoc wuj ta'? ¿q'uinloc tz'at in sayc' pax 'a 'aj tz'em c'u, an̈jtona ma'oj 'ilchjoc pax wuj ta'?

⁹ ¿Q'uinloc tz'at in sayc' 'a stojlal norte, toc tz'ilchj wuj ta'? ¿q'uinloc tz'at in sayc' pax 'a stojlal sur, toc tzch'ox sb'a 'ayn ta'?

¹⁰ Palta yojtac chajtl yilx in b'eyb'al. A yic 'oj lajwc wajx prowal yu'uj, ax in b'ocn 'icha q'uen oro tz'ec' 'a scal c'ac'.

¹¹ An tic, a jun b'eyb'al 'aj ch'oxb'iln yu'uj, an̈jta tzin b'eyi, may 'aj tzin jel in b'eyb'al.

¹² 'Ix in yicljn̈ej sley, 'ec'b'al xo wal yel'ch schecnb'il 'ayn 'a yib'n̈ tas tzin c'uxu.

¹³ Toto 'ay tas tznib'j Dios tzb'o'o, toc 'ay mach tztac' stenn 'och wa'an, tzb'on̈j 'icha tas tzna cha.

¹⁴ A tas snalb'ej sb'on 'a in patic, tzb'on̈ej; 'ayt pax jun tzo'n̈ xo tas nab'il yu'uj, quen man̈ lajnoc yet' jun tzo'n̈ tic.

¹⁵ Yuj cha, caw wal tzin xiw 'a 'a, cojn wal yic tzin nan coti, caw tzin 'ib'x chan̈ yuj xiwlal.

¹⁶ A Dios, tztac' yuj smasnil, yu'uj caw wal tz'el wip yuj xiwc'ojlal.

¹⁷ Palta man̈ sictacoc tzin 'aj yuj q'uic'q'uinal, wach'xam man̈xtzac stac' wiln yu'uj.