Job 22 - Chuj San Sebastian Bible

A yoxc'ajil c'umjb'a

¹ Xlajw cha, xta'w win Elifaz, 'ix yaln win 'ixtic:

² Toc 'ay tas 'oj yic' Dios 'a spatc junc 'anma', toxn̈ej to caw jelan.

³ Q'uinloc caw tojl tzotj a b'a, mto may a mul, ¿tom 'ay tas 'oj yic' Dios jun tztac' yuj smasnil 'a a patquil?

⁴ Man̈ yujoc a yiclumal mto yuj a wach'il tzach ya'n cuenta Dios yet' yailal,

⁵ palta yel xo wal niwn a mul 'a sat, man̈x alchjb'enoc a mul cha.

⁶ Yujto xlaj a c'anc' spichl eb' meb'a 'anma smajnub'loc junc tas tzac' smajnc cha.

^7-8 Wach'xam b'inab'il ach, to ec smasnil lum lum tic, palta a mach 'ay stacn̈ti'al ¿tom 'ay tas xac' yuc'? A mach 'ay swejel, ¿tom xac' wa'oc?

⁹ A eb' 'ix 'ix chamnc yichmil, 'ix ac' meltzjoc eb' 'ix 'a 'ichn̈jta', toc 'ay jac tas xac' 'a eb' 'ix. Ax eb' meb'a 'unn chamnc smam, 'ix laj e'c tas 'ay 'a eb'.

¹⁰ Atn yuj cha, tz'och 'oyn maysch'olnil 'ayach, tzach somchj chan̈ yuj tas 'ay smay.

¹¹ Coynto scal q'uic'q'uinl xoj 'aj 'aych 'eq'ui, man̈xtzac stac' eln xon jab'oc; 'icha to a a 'elmal a wan ach yi'n 'ati.

¹² A Dios, ata 'ay 'a yib'n̈ satcha'an̈; ax c'anal, caw wal najtto tzcan 'a sat lum tic.

¹³ Ach tic tzcob' ala', ¿toc tztac' on̈ yiln Dios yuj tas tzqui b'o'o, yujto oyn 'och 'asn yen̈loc? xa chi.

¹⁴ Tzaln paxi, matz yil Dios, yujto 'ajm tz'ec' b'eyc'oc 'a sti 'el satchan̈ cha, 'oyn 'och 'asn 'a 'a, toc tzyila, xa chi.

¹⁵ ¿Tom tza nib'j tzach 'och tza'n yuj sb'eyb'al eb' pecti 'anma maysch'olnil sb'eyb'al?

¹⁶ A eb' cha, seb' chamnc eb' mu'c 'icha tzyac' junc mach tz'ijx 'at yuj a 'elmal a'.

¹⁷ Xlaj yal eb' 'ixtc 'a Dios tztac' yuj smasnil: Man̈ on̈ a tzuntzoc, toc 'ay tas 'oj ec' 'a qui patquil on̈, xchi eb'.

¹⁸ Palta b'i'an, a x'a'n b'ut'joc 'el yol yatut eb' yet' smasnil tas 'ay 'a eb'. An tic, ma'oj in b'eylb'oc sb'eyb'al eb' maysch'olnil snab'en cha.

¹⁹ A yic 'oj yilnc eb' wach' snab'en slajw 'ejm eb' maysch'olnil sb'eyb'al, caw 'oj tzaljoc eb'. Ax laj stzewj eb',

²⁰ yic 'oj yilnc eb' stz'a 'ejm smasnil sricoal eb' tu sb'eyb'al cha.

²¹ ¿Tas yuj matz ach 'ochx 'a junc'ojlal yet' Dios, sec wach' 'oj ya'x a ricoal jun 'ejm xo?

²² Comnoc tza chaj ab' tas tzyala, tza moln can spaxti chi 'a a nab'en.

²³ Toto tzej 'ejm a b'a 'a Dios jun tztac' yuj smasnil, tzach meltzj pax 'a 'a, 'oj ejx pax chan̈ yu'uj, ax yel smasnil yailal chi 'a yol atut.

²⁴ Man̈x a nib'c 'och q'uen oro, 'icha cab' xoj yilx pococ, 'ixta cab' eln 'och q'ue'en, mto 'icha xoj cab' eb' q'uen q'uen 'a yol sb'e a'.

²⁵ A Dios tztac' yuj smasnil, a 'oj 'ochx et'oc, ax sniwtj pax tas 'ay 'ayach, til wal 'oj 'aj q'uen plata chi 'aych jun 'ejm xo.

²⁶ Caw wal 'oj a tzalj pax yet' Dios cha, 'oj a'ch pax yipc a c'ojol.

²⁷ Toto 'ay tas 'oj a c'an 'a 'a, 'oj yab'i', ax ya'n 'ayach, tza'n 'el'choc pax a ti tza'cn 'a 'a.

²⁸ Ax tas 'oj laj a b'o', caw wach' 'oj 'el'choc smasnil; 'oj yac' sacq'uinl 'a eb'n̈ 'aj tzach 'eq'ui.

²⁹ A Dios 'oj 'i'nc can 'ejm eb' tzyij chan̈ sb'a, ax scolwj yet' eb' 'emmquilal yeq'ui.

³⁰ A tzcolwj 'a eb' may smul, 'oj a colx yu'uj, toto may a mul 'a sat, xchi Elifaz.