Job 21 - Chuj San Sebastian Bible

¹ Yuj cha, 'ix ta'w Job, xyaln 'ixtic:

² A wal tas 'aj wan wi'n in niwnc'ojlal eyu'uj, to tze maclj eyab' tas tzwala.

³ 'A'c wal niwnc'ojlal 'ayin ya' sb'a wanto in paxtini, tzlajw cab' in paxtin tic, tzin e tzetzn cab' paxi.

⁴ An tic, man̈oc yet' junc 'anma tzwac' owal; yuj cha, tzwutznan in c'ojol.

⁵ Toto tze maclj wal eyab' tas tzwala, 'oj e xiw cha'an̈, ax e sucb' can 'eli.

⁶ A yic tzin nan cot jun tzo'n̈ cha, caw tzin xiw chan̈ yu'uj, tzchinchni in niwnal xiwi.

⁷ ¿Tas laj wal yuj an̈ja pitzn eb' 'anma tu snab'en tic? Caw wal tz'och eb' 'ichm 'anma'il, til wal pax tas 'ay 'a eb'.

⁸ Tzyil eb' sq'uib'cn yunnal yet' yixchiquin, tz'och wal oyn eb' 'a stz'ey eb'.

⁹ Toc 'ay tas tzna eb', junc'ojlal yaj eb' 'a yet'ul; toc 'ay syailal eb' tz'ajx yuj Dios.

¹⁰ Caw wal wach' sq'uib' squelmtac wacx eb'; toc 'ay yune swacx eb' chi tzchami.

¹¹ Ax yunnal eb', til wal sja'l stajn eb', tzlaj b'atj chan̈ eb' yic tzlaj 'ec' eb', lajn yec' eb' 'icha e no cotc calnelu sja'l stajni.

¹² Ax yic tzlaj 'och son yet' arpa, tinab' mto flauta, caw wal tzq'ue b'atnjoc eb' 'unn chi yuj tzaljc'ojlal.

¹³ Til wal tas 'ay 'a eb' tu snab'en cha yic tzcham eb', caw tzaljc'ojlal tz'aj smucx can eb' 'a campusan.

¹⁴ Tzyaln eb' 'ixtc 'a Dios tztac' yuj smasnil: Man̈ on̈ a tzuntzc on̈, yujto an̈ tic, matz qui nib'j qui b'eylb'oc tas tzyal a ley.

¹⁵ ¿Tas wal 'oj cac' ganar yic tzcob' ach ca'nc servil, yic tzcaln qui b'a 'ayach? xchi eb'.

¹⁶ Palta a eb' maysch'olnil snab'en cha, may junc tas 'ay 'a yol sc'ab' eb' to caw yico', yuj cha, caw matz in nib'j sb'eyb'al eb' cha.

¹⁷ ¿Tom comn xoj tz'ec' sq'uinl eb' maysch'olnil chi 'icha tz'aj stup sc'a'l junc cantil? Toc tzcomn jaw yailal 'a yib'n̈ eb'. Toc tzcomn cot yowl sc'ojl Dios 'a eb'.

¹⁸ ¿Tom comn xoj tzsactzic eb' 'icha tzyac' te 'ac tzma' chan̈ chacxuxm'ic'?

¹⁹ 'Ay mach tzalni, to at eb' 'unnab'il tztojn lajwc smul smam yuj Dios. Palta an tic, tzwala to a eb' maysch'olnil tzyutj sb'a, a eb' smoj stojn lajwc smul cha, sec tznachj 'el yuj eb' to yuj smul eb' 'ixta tz'aj eb'.

²⁰ A eb' maysch'olnil snab'en, smoj wal schan eb' syailal yuj yowl sc'ojl jun Dios tztac' yuj smasnil.

²¹ Yujto jun 'ejmn̈ej tzchamcn eb', toc 'ayt tas wach' yutn eb', wach'xam 'ay tas tzjaw 'a yib'n̈ eb' yunnal eb' cha.

²² Palta ¿mach wal junc tztac' scuywj 'a Dios, atn jun tzb'eyc'ojlan smasnil eb' cajn 'a satcha'an̈?

²³ 'Ay wal mach caw te'nto yip yic tzchami, caw tzalji, toc 'ay tas tzna'a;

²⁴ caw wach' sayn wa sb'a, caw wach'n̈j sc'ojol.

²⁵ 'Ay pax mach caw wal teb'il tz'ec' yu'uj, toxn may jac tas wach' tzc'ux 'a yolyib'n̈q'uinl tic, tzchami.

²⁶ Palta ax 'a yol lum 'aj tzmucx eb' tzcham cha, lajn xoj tz'aj eb' 'anma ta', a no ay tzwa 'a schib'jal eb'.

²⁷ Wojtac tas wan e nan 'a in patic, 'ay jun tzo'n̈ tu nab'enal wan e nani.

²⁸ ¿Tas yuj tze na 'ixtic? ¿'Ajtil laj 'oj can yatut win maysch'olnil tic, win yajl tzyutj sb'a tic? 'in xe chi.

²⁹ ¿Tom may 'aj tzex paxtin yet' eb' 'anma tzlaj b'ey 'a b'e? ¿Tom may 'aj tzeyab' tas tzyal eb'?

³⁰ A yic tzcot yowl sc'ojl Dios, yajn̈ej tzya'n cot yailal, ax eb' maysch'olnil sb'eyb'al, toc 'ay tz'i'n eb'.

³¹ Toc 'ay mach tzaln 'och smul eb' 'a sat, may mach tztac' ya'n spac 'a eb'.

³² Ax yic tz'at eb' mucxoc, tz'och stan̈mal eb' 'aj tzmucx cha.

³³ Caw wal siclab'nac jun lum chi 'aj tzcan eb' chi tzyab'i, til wal eb' tz'och tza'n yuj eb', 'ay pax eb' b'ab'ljnacx yuj eb'.

³⁴ ¿Tas wal 'oj eyutc eya'n sniwnal in c'ojol? A jun tzo'n̈ tas xeyal 'ayn tic, may jac yel'chi, man̈ yelc xon eb', xchi Job.