Job 20 - Chuj San Sebastian Bible

¹ 'Ix ta'w pax win Zofar 'aj Naamat, xyaln win 'ixtic:

² Ach Job, an tic man̈xtzac stac' to sictac 'oj waj o'oj; caw tzin nib'j wac' spac a paxti chi muc'uc.

³ Caw wal ya jun tzo'n̈ a paxti 'ix al 'ayn̈ on̈, palta tox xin na'a tas 'oj wutc wa'n spac 'ayach.

⁴ Ach tic, ojc xoni to a yic tax spitzw 'anma 'a sat lum lum tic,

⁵ a eb' maysch'olnil, jab' wal tiempo tzyac' stzaljc'ojlal eb', jun wal rato tzalj eb'.

⁶ Wach'xam caw chan̈ 'aj 'ay eb' 'icha schan̈il yajb't satcha'an̈, mto tzq'ue'ch sjolm eb' 'a 'aj 'ay 'asun,

⁷ 'oj sat 'ejm eb' 'icha tzyac' stza no noc', ax eb' swach'c'ojl eb', man̈ yojcoc eb' 'aj 'oj c'ochcn eb' maysch'olnil cha.

⁸ Ton̈j 'oj satchan̈ eb' 'icha junc tas tzquil 'a qui wayich, man̈x 'a mach 'oj 'ilnc eb'.

⁹ A mach tz'iln xon eb' yet' eb' jun tz'ec' yet' eb', man̈x b'a'n̈ 'oj 'ilxoc eb' yuj eb'.

¹⁰ A tas 'elc'b'il yuj eb', a yunnal eb' 'oj 'a'nc meltzjoc 'a eb' meb'a'.

¹¹ Caw wal te'nto yip eb' yuj quelmal, ax s'atcn eb' 'a yol lum 'a yet'l chamel.

¹² Yujto a maysch'olnil caw wal wach' tzyab' eb', caw tzalj eb' yet'oc',

¹³ tzyab' wal eb' schiloc 'icha junc tas wach' sc'uxxi.

¹⁴ Palta ax 'oj 'aj 'a yol sc'ojl eb', lajn 'oj 'aj 'icha svenenoal sti no chan.

¹⁵ 'Oj xejc q'uet' eb' smasnil ricoal b'uc'b'il 'ejm yu'uj; yujto a Dios 'oj 'i'nc q'uet 'a yol sc'ojl eb' cha.

¹⁶ 'Icha to tz'ub'b'il 'ejm svenenoal no chan chi yuj eb', a jun veneno chi 'oj milnc eb'.

¹⁷ Man̈x 'oj yac' eb' tzaljoc sc'ojl sc'uxn smasnil tas 'ay 'a 'a, atn lech yet' no yal chab' to man̈x yalnb'iloc.

¹⁸ Smasnil tas yijnac 'ec' eb', yowlal 'oj ya'x can meltzjoc eb'; man̈x 'oj stac' ya'n tzaljoc eb' sc'ojl yet' sricoal cha.

¹⁹ Caw wal x'ixtx eb' meb'a yuj eb', man̈x 'a jac tas 'ix can 'a eb'. A eb' tu snab'en cha, smacn 'ec' eb' yico'oc jun tzo'n̈ n̈a to man̈oc eb' b'ojnac.

^20-21 Man̈x 'a jac tas 'ix colchj 'el 'a yol sc'ab' snib'b'en eb' cha, yuj cha, man̈ najtloc 'oj yac' eb' tzaljb'oc sc'ojl yet'oc.

²² A yic tzniwtj tas 'ay 'a eb', a paxta 'oj 'och st'uc eb'; yujto ata 'oj jawc scusc'ojlal eb' yuj eb' yit maysch'olnilal cha.

²³ A yic wan ya'n cob' eb' sgana sc'uxn tas 'ay 'a 'a, yic wan laj swa eb', ax sjacn cot Dios yowl sc'ojl 'a yib'n̈ eb'.

²⁴ Toto cob' tzyac' ganar eb' yel 'a junc espada b'ob'il 'a q'uen hierro; ax junc jul-lab' bronce 'oj 'och 'a eb'.

²⁵ A jun jul-lab' cha, tojln̈ej yec' 'a yol sniwnal eb', tz'ec' 'a seyb' eb', tz'elx c'och 'a yichspatc eb'. A yuj jun cha, ax sniwtj chan̈ xiwc'ojlal 'a scal 'anma'.

²⁶ A q'uic'q'uinal, a 'oj c'ub'nc 'el smasnil tas c'ultac yaj yuj eb'. Ax jun c'ac' may tz'aj stupi, a 'oj n̈usntz'a eb' yet' smasnil tas 'ay 'a 'a.

²⁷ A Dios 'oj checltanc 'el smul eb', a eb' 'anma 'a sat lum tic, a eb' 'oj alnoc to 'ay smul eb'.

²⁸ A yic 'oj jawc yowl sc'ojl Dios 'a yib'n̈ eb', ata 'oj lajw can 'ejm smasnil sricoal eb' cha.

²⁹ Atn wal jun tzo'n̈ tic nab'ilx yuj Dios 'a yib'n̈ eb' maysch'olnil; to yic xo eb' yaj jun tzo'n̈ tic yu'uj, xchi win Zofar.