Job 2 - Chuj San Sebastian Bible

¹ A yic xc'och sc'ul sch'oxn pax sb'a eb' ángel 'a yojltac Jehová, an̈jtona', xc'och pax win 'ajc'ojol 'a scal eb'.

² 'Ix sc'anb'n Jehová 'a win 'ixtic: —¿'Ajtil ach coti? xchi 'a winac. 'Ix yaln win 'ixtc 'a Jehová: —In cot 'a yolyib'n̈q'uinal, yujto tz'ec' woymtej lum lu'um, xchi winac.

³ Yuj cha, xyaln Jehová 'ixtc 'a winac: ¿May am 'aj 'ix 'elcn win in checb' Job? May junc xo mach lajn snab'en yet' win 'a yolyib'n̈q'uinal, caw wal yiclum win 'ayin, tojl sb'eyb'al, 'ay xiwc'ojlal, may 'aj tzb'o win tas maysch'olnil. O'oj 'ix in satn 'el smasnil tas 'a winac, palta man̈ yujoc cha, sjun win snab'en, xchi Dios.

⁴ 'Ix ta'w win 'ajc'ojl chi 'ixtc 'a Jehová: —A junc 'anma to man̈oc 'a sniwnal tz'och yailal, toc 'ay tas tzna'a, tzyaln̈j sc'ojl tzsat 'ejm smasnil tas 'a 'a, cojn toto tzcolchj cani, may tas tzna'a.

⁵ Palta q'uinloc tza'ch syailal win Job 'a sniwnal, 'oj ela', checlton ma'oj a b'uchx yuj winac, xchi.

⁶ 'Ix yaln Jehová 'ixtc 'a winac: —'Ixta cab' tz'aj 'an. 'Ilto tas tzotj a b'a yet' sniwnal winac, cojn b'i'an may aln ec a milni, xchi Dios 'a winac.

⁷ Cojn cha, x'elt win mu'c 'a yojltac Jehová, 'ix ya'n 'och syailal win Job. 'Ix 'elt jun tzo'n̈ yab'il 'a sniwnal winac, 'a yoc masnto 'a sjolom.

⁸ Yuj cha, 'ix 'at win Job, ax 'a 'aj b'uln 'ec' nan̈l q'uen stan̈il c'ac', ata x'at 'em wocn 'a yib'n̈ jun tan̈ cha, xyi'n cot jab' sc'axpil chen, sn̈ichb'tan̈n 'ec' 'a sniwnal cha.

⁹ Palta ax 'ix yistzil winac, 'ix yaln 'ix 'a win 'ixtic: —¿Tas cob' yuj an̈ja wach' tzotj a nab'en? B'uchwjan̈ 'a Dios, tztac' cab' a chami, xchi 'ix.

¹⁰ Yuj cha, xyaln win 'ixtic: —Ach 'ix, a wal tzwab'i, lajn a paxtin yet' eb' 'ix 'ix may xon jac snab'en. An̈ tic, tox xqui chaj smasnil syaxilal Dios. ¿Tom at wal yailal ma'oj qui cha'? xchi winac. Wach'xam 'aych syailal Job, palta may tas tu 'ix yal 'a spatc Dios.

'Ay 'oxwn̈ swach'c'ojl Job xjawi

¹¹ 'Ay 'oxwn̈ swach'c'ojl Job, atn eb' tic: Win Elifaz cajn 'a yol yic Temán, win Bildad cajn 'a yol yic Súah, yet' win Zofar cajn 'a yol yic Naamat. 'Ix yab' eb' speclal to 'ay jun tzo'n̈ yailal chi xjaw 'a yib'n̈ winac, yuj cha, xya'n 'och eb' 'a sc'ojl scot wul yac' sniwnal sc'ojol, yic tzmol cus eb' yet' winac.

¹² 'Ayt wal sjaw eb', xyiln cot eb' win Job 'a najat, teb'il xyilch eb' win yuj syailal cha, yuj cha, syamn 'och eb' yoc' yuj winac. Caw tzcus eb', xlaj stzilnjat eb' spichul, sjob'n chan̈ eb' pococ 'a cha'an̈, ax 'a sjolm eb' xlaj 'emx lu'um.

¹³ Ax yic xjaw eb' 'a stz'ey winac, 'ix 'em wocn eb' 'a sat lum yet'oc, uque c'u uque 'ac'wl xcann̈j eb' yet' win ta', may xon junc eb' tzpaxtini, yujto caw wal ow ya'n syailal win tzyil eb'.