Job 19 - Chuj San Sebastian Bible

¹ Yuj cha, xta'w pax Job, xyaln 'ixtic:

² ¿B'a'n̈ wal 'oj eyactc in e tzuntzn yet' in yailal tic, caw wal tzin eyac' lajwc yet' jun tzo'n̈ e paxti tzeyal 'ayn tic?

³ 'Ayxn̈ej 'och eyaln tu paxti 'ayin, ¿tom matz eyec q'uixwc e b'a yuj tas tzeyal 'ayn tic?

⁴ Q'uinloc to yel 'ay in mul cha, mun 'oj jawc in yailal yu'uj.

⁵ Ax tic, caw wal tzcob' eyij chan̈ e b'a 'ayin, yuj in yailal tic tzeyaln 'och 'a in sat to may in ch'olnil.

⁶ Palta comnoc tzeyojquej 'eli, to a Dios 'ixtc tzin 'utni, a x'a'n 'ejm jun yal tic 'aj in can t'un̈an.

⁷ Tzcob' 'el waw, tzwaln 'ixtic: Wan wixtxi, xcob' in chioc, palta may xon mach tzta'w 'ayin, tzcob' wal in b'a, palta may mach tzin b'onyaji.

⁸ A Dios a 'ix macn yol in b'e, yuj cha, man̈xtzac stac' in b'eyq'ui, 'icha wal to scal q'uic'q'uinl tzin b'eyc' yu'uj.

⁹ 'Ix yij 'ec' in ricoal, xya'n sat 'ejm in b'inab'ilal.

¹⁰ In yac' lajwc 'ejm wal si'mb'il, ax tas 'aych yipc in c'ojol, c'uxn xlajw 'el 'icha tzyac' junc te te tztacj yet' sch'an̈lyib'.

¹¹ 'Ix ya' cot wal yowl sc'ojl 'a wib'an̈, 'icha wal junc 'ajc'ojl yajch 'a 'a, 'ixta wal in yutej.

¹² Smasnil eb' soldado ajun yet'oc, 'ix 'och oyn eb' 'ayin, 'ix 'och oyn eb' 'a spatc watut yic tzin smiln eb' snani.

¹³ A Dios 'ix 'i'n 'el eb' wu'tac 'a in tz'ey yet' smasnil eb' in wach'c'ojol, 'icha xoj wal comn 'anma tzin yutj can eb'.

¹⁴ A eb' wican yet' eb' in wach'c'ojol, in yactjcan eb' in ch'ocoj, 'ix ya'n eb' sat sc'ojl 'ayin.

¹⁵ Ax eb' cajn 'a watut yet' smasnil eb' 'ix wa'mal servil, chuc 'anmal wilx 'a sat eb', man̈xtzac in nachj cot yuj eb'.

¹⁶ Toto tzwawtj cot junc eb' in checb' cha, toc tzta'w to eb' 'ayin, wach'xam tzcob' in tewc 'och 'a 'a.

¹⁷ Toto tzin c'och 'a stz'ey 'ix wistzil, caw wal tu sjab' xob' in ti tzyab' 'ix, ax eb' wican caw wal tzin syaj eb'.

¹⁸ 'Ixta pax eb' 'unn 'a b'esan, tzin schacl eb', a yic tzin laj yiln eb', tzin sb'uchn eb'.

¹⁹ A eb' caw wach' waj yet'oc, in spatquilj can 'el eb', a eb' caw wal tzin tzalj yet'oc, 'ix meltzj 'och eb' 'ajc'ojlal 'ayin.

²⁰ A in tz'umal, tox 'ix tacj 'och 'a spatc in b'aquil, teb'il xoj pitzn in tzwab'i.

²¹ Ex in wach'c'ojol, 'o'ch cab' e c'ojl 'ayin, yujto a Dios 'ix 'a'n 'och in yailal.

²² ¿Tas yuj tza'nexn̈ej wu'uj tzin 'eq'ui? 'Icha wal yajch tza'n Dios wu'uj. ¿Tom man̈ colb'loc tzin eyac' cus tic?

²³ Comnoc wal 'ay junc mach tz'ib'n can jun tzo'n̈ in paxti tic 'a junc u'un̈, mto 'a q'uen q'ue'en.

²⁴ 'Ayc wal mach tz'ib'n can 'och yet' q'uen cincel 'a junc q'ue'en mto 'a q'uen plomo, sec tzcan jun tzo'n̈ chi 'a jun 'ejmn̈ej.

²⁵ Wojtac to a jun mach tzin colni, pitzan, ax 'a slajb' c'ual, 'oj jawc in wul yi' chan̈ 'a sat lum tic.

²⁶ Wach'xam tzlajw 'el in tz'umal tic, palta 'oj wilch Dios yet' in niwnal tic.

²⁷ 'Oj wilch wal yet' in sat, caw an 'oj wila', man̈toc chuc mach 'oj 'ilnoc. Caw wal an tzin nib'j wilchi.

²⁸ Ax tic, 'in tzeyal wuj 'ixtic: ¿Tas wal tzcutjec qui tzuntzni? yujto mun a tz'i'n cot jun tzo'n̈ yailal tic 'a yib'an̈, xe chi.

²⁹ Palta xiwn̈ec 'a jun q'uen espada, atn q'uen tzc'anlb'ej Dios yuj yowl sc'ojl 'a tas man̈ tojloc, 'ojquejec 'eli to a Dios 'oj qui b'eyc'ojlanec, xchi Job.