Job 18 - Chuj San Sebastian Bible

¹ Ax Bildad win 'aj Súah, xyaln win 'ixtic:

² ¿B'a'n̈ 'oj ochwan a paxtini? Toto 'oj nachjoc 'el o'oj, an̈ xo tic on̈, 'oj calx quic on̈.

³ ¿Tas yuj tzon̈ al noc'l on̈, 'icha wal to man̈x jac qui nab'en 'a a sat?

⁴ ¿Tas yuj tza chal lajwc a b'a yuj a chichnc'ojlal? Am wal a nani to yuj 'ixta tzotj a b'a cha, ax scan lum lum tic 'a sictaquil, mto 'oj jelmjoc q'uen niwc q'uen 'a yet'ul.

⁵ A tas 'aych yipc sc'ojl junc mach tu sb'eyb'al, 'oj satcn 'ejm 'icha tzyac' junc cantil tztup sc'aq'uil, man̈xtzac chacb'i.

⁶ 'Oj tup pax scantil chi 'a yol yatut; man̈x 'a sacq'uinl 'ayc' 'a 'a.

⁷ A yoc caw 'ay yip ticnec, 'oj 'el yip, ax jun tzo'n̈ nab'en cob' tzyala, a 'oj sutmjoc 'och 'a 'a.

⁸ 'Oj 'ajxoc 'ejm ch'an̈yal 'a yol sb'e, ax scan sut'n jun yal chi 'a 'a.

⁹ 'Oj b'o 'ejm junc lasu sot'snub'l tz'aj 'a yol sb'e, ax jun sot'snub'l chi 'oj can 'a sjaj yoc.

¹⁰ A jun ch'an̈yal cha, c'ultac 'oj 'aj 'ejm 'a yol sb'e, ax yic 'oj 'ec' ta', ax scan sut'n 'a 'a.

¹¹ Tzanxn̈ej 'aj 'oj 'ec'oc, 'ay xoj smay schami, tza'n 'och eb' tzpechn b'ey chi yuj tzyab'i.

¹² Caw 'oj 'el yip yuj wejel, ax yailal, q'ueln xo 'och 'a 'a, yic tzjaw 'a yib'an̈.

¹³ A yailal, a tzc'anlb'ej chamel, jab'jnal tzlajw 'ejm sniwnal junc maysch'olnil chi yu'uj.

¹⁴ 'Oj 'ijxoc 'el 'a scal sjunc'ojlal 'a yol yatut, ax sjucx 'at 'a yojltac xiwc'ojlal, atn chamel.

¹⁵ A yatut cha, chucx mach 'oj cajnoc. Ax smasnil tas 'ay 'a 'a, 'oj tzicxoc can 'och azufre 'a 'a.

¹⁶ Lajn 'oj 'aj 'icha junc te te tacn̈ xo sch'an̈lyib', tacn̈ xo pax sc'ab'.

¹⁷ Ax sat 'ejm yalx snanb'il cot 'a sat lum tic, man̈x b'a'n̈ 'oj b'inaxc sb'i.

¹⁸ 'Oj 'ijxoc 'el 'a scal sacq'uinal, ax sjulx can 'at 'a scal q'uic'q'uinal, 'oj 'ijxoc 'el 'a yolyib'n̈q'uinl tic.

¹⁹ Man̈x 'a yin̈tl 'oj can 'a scal eb' yit chon̈ab', man̈x 'a junc yin̈tl chi 'oj can sjelc 'a yatut cha.

²⁰ A yic 'oj 'ab'xoc yab'xil yuj eb' 'anma', 'oj xiw chan̈ eb' cajn 'a stojlal 'aj tzq'uel c'u, yet' eb' cajn 'a stojlal 'aj tz'em c'u.

²¹ 'Ixta wal 'oj 'aj slajw 'ec' sq'uinl junc mach to maysch'olnil tzyutj sb'a, atn junc mach may yel'ch Dios 'a sat, xchi Bildad.