Job 17 - Chuj San Sebastian Bible

¹ Caw wal teb'il xoj tzwij wic' tzwab'i, wan xo slajw c'och in q'uinal, lista xo yaj yet'l chaml in stan̈wni.

² Ax eb' 'anma', oyn 'och eb' 'ayn 'a smasnil tiempo; 'ay eb' tzin laj b'uchni, tzlaj ya'nc eb' cus in c'ojol.

³ Palta ach tic Dios ach, 'ac' a b'a wu'uj, ¿mach wal junc 'oj stac' ya'n sb'a wu'uj? cojxn ach tztac' o'oj.

⁴ Ach 'ix ac' sat snab'en jun tzo'n̈ 'anma tic, sec wach' matz in yac' ganar eb'.

⁵ Toto yuj tas tz'ajx 'a junc mach, tzya'n stu nab'enal 'a junc swach'c'ojol, ax yunnal b'aq'uin̈, 'oj yab' eb' syal yuj jun cha.

⁶ Ach 'ix ac' yal eb' 'anma tu paxti'al 'ayin, 'ix laj tzub'n 'och eb' 'a in sat.

⁷ Caw wal sacmoynac xoj wiln yuj in yailal, ax smasnil tas tzin na'a, lajn xoj yilx 'icha tas 'ay 'a 'aj 'ay wewen.

⁸ A yic tzyiln eb' 'anma wach' sb'eyb'al yuj tas tzin 'aj tic, caw wal tzsat sc'ojl eb' yilni; caw wal tzcot yowl eb', maysch'olnil in b'eyb'al snan eb'.

⁹ A eb' wach' snab'en, wach' 'oj 'aj 'el'ch eb', a tas tojl tzb'o eb', 'oj niwtjoc chan̈ eb' yet'oc.

¹⁰ Palta ax ticnec, paxtinan̈c pax wab'i', a tzwutj wab'ni to may xon wal junc mach 'a e cal tic to 'ay sjelnal spaxtini.

¹¹ Caw wal b'el-li yec' junjn c'u 'a wib'an̈, ax smasnil tas cob' nab'il in b'oni, c'uxn 'ix juw 'eli.

¹² Ax tic, a 'ac'wal a chi tzeyalch c'ual, ax yic q'uic'q'uinl cha, tzeyalni to jab'xoj sacb'i.

¹³ An tic, cojxnto tzin tan̈wj in chami, ax in c'och teln in way 'a scal q'uic'q'uinal.

¹⁴ A yet'l chaml 'aj 'oj in c'och cha, yet' pax no a'ay, a chi 'oj walch in mamoc, in nunoc, wanb'oc.

¹⁵ ¿'Ajtil 'ay tas tzcob' wa'ch yipc in c'ojl cha? A tas yipc'ojlal yaj wu'uj, ¿'ajtil 'ay chinec?

¹⁶ ¿Tom 'oj c'och jun tzo'n̈ chi wet' 'a 'aj 'ay yet'l chamel, sec wach' junxn̈ej 'oj can jun tzo'n̈ chi wet' 'a yol lu'um? xchi Job.