Job 16 - Chuj San Sebastian Bible

¹ Xlajw cha, xta'w Job xyaln 'ixtic:

² Til wal 'ejm xwab' yalx jun tzo'n̈ paxti 'icha jun tzo'n̈ wan eyaln 'ayn tic. A tzeyutj eyalni to tzcob' eyac' sniwnal in c'ojol, palta ton̈j tze wach' 'ij cot yailal 'a wib'an̈.

³ ¿Tom may slajb' jun tzo'n̈ e paxti may yel'ch cha? ¿Tas eyaji, yuj cha, an̈j 'ijnoc e pacn 'ayin?

⁴ Q'uinloc to ax tic, 'ixtc eyaj 'icha wal waj tic, an̈jtona 'in, tecn am tztac' waln 'ayx 'icha tzeyutj eyaln 'ayn tic. Ton̈j am tzin yuc in jolm ex in tzetzni, til am wal tas tz'el waln 'ayex.

⁵ Palta an tic matz in b'o 'ixta'. A tas tzwal am 'ayex, atn paxti wach', to tzyac' sniwnal e c'ojl 'a scal eyailal.

⁶ Man̈ yujoc tzin paxtin tic ax sb'ox in c'ojol, an̈jtona', man̈ yujoc sictac tzin 'aji ax yoch wan in yailal tic.

⁷ A Dios a tz'i'n 'el wip, a pax tz'i'n 'el eb' in wach'c'ojl 'a in tz'ey.

⁸ 'Icha to preso waj yu'uj. Til wal tas tzpitz chan̈ eb' 'anma yal 'a in patic, til wal 'es paxti tzlaj ya'ch eb' 'a wib'an̈.

⁹ A Dios 'ix 'och tza'n wu'uj, in ya'n lajwc 'eli, 'ijn wal in smil cham 'icha tzyac' junc no calte'al noc'. Tzcham wal yoch q'ueln 'ayin, 'icha to 'ajc'ojl yajch 'ayin.

¹⁰ Til wal 'anma tzyam sb'a yic tzin laj sb'uchn eb', tzlaj spawnc 'och eb' sc'ab' 'a in ti', caw man̈x 'a yel'ch tzin yutj eb'.

¹¹ A Dios, a in 'a'n 'och 'a yol sc'ab' eb' 'anma tu snab'en, caw wal 'a'm 'es eb'.

¹² 'Ayn 'ec' wal 'a junc'ojlal, 'ix syamn cot Dios yib' in jaj, 'icha to in sc'uychtej, choc' in 'ajcn yu'uj. 'Ix stojlb'tzan 'och sjul-lab' 'ayin.

¹³ Tzanxn̈ej 'aj tzjaw sjul-lab' chi 'ayin, 'icha to tz'ec' sjul-lab' chi 'a yol in niwnal. Man̈x 'a jac sniwnc'ojlal 'ayin, sactzicnac tz'ajcn yol in c'ojl 'a sat lum tzwab'i.

¹⁴ Til wal tzin 'aj in lajw yu'uj, tza'n 'och wuj 'icha tzyac' junc soldado tzjulwji.

¹⁵ Caw wal tzin cus si'mb'il, xwa'n 'och jun tzo'n̈ in n̈achtac pichl yuj cusc'ojlal, ax smasnil tas 'ay 'ayin, c'uxn 'ix lajw 'ejmi.

¹⁶ 'Ix mal in sat woq'ui, 'ix 'och pax 'a yol in sat, toxn̈ej sacmoynac wilni.

¹⁷ Wach'xam may in mul, palta 'ixta 'in 'aji, ax in lesal caw wal wach'n̈ej.

¹⁸ Matz c'ub'x cab' 'el tas tzin 'aj wixtx 'a yolyib'n̈q'uinl tic, comnoc wal tz'ab'x tas tzin c'an 'a in lesal yic tzin b'oyaji.

¹⁹ Palta 'ay jun mach tzwa'ch in testigooc, a 'a satcha'an̈ ata 'ay jun chi 'oj in colni.

²⁰ Ex in wach'c'ojol, 'in ton̈j tzex b'uchwj 'ayin, an xo tic, tzin 'o'n̈j 'a yojltac Dios.

²¹ 'Ayc wal mach tzaln 'a Dios wu'uj, 'icha tzyutj junc mach scoln junc xo yit 'anma'il.

²² An tic, jaye xoj ab'il 'ayn 'eq'ui, ax in 'at 'a chamel, ata' man̈x 'a mach tztac' smeltzji.