Job 15 - Chuj San Sebastian Bible

Schac'ajil c'umjb'a

¹ Yuj cha, xta'w Elifaz win 'aj Temán, xyaln win 'ixtic:

² A mach jeln snab'en, man̈ smojc sta'w yet' jun tzo'n̈ paxti may yopiso, mto jun tzo'n̈ paxti ton̈j tzsatcn 'at 'a scal 'ic',

³ man̈toc ton̈j tzcomn paxtini, matz c'anlb'ej paxti may yopiso.

⁴ Ach xo tic tzala to may yel'ch xiwc'ojlal 'a Dios, may yel'ch pax 'emmquilal 'ayach.

⁵ A tas tzal yet' a ti', a tzch'oxn 'el a paltail, yujto tza nib'j tzon̈ cob' extj paxti 'on̈.

⁶ Man̈ a na', to an 'oj wa'ch 'a eb'n̈ yuj a mul, palta mun a a ti chi tzlocn cot 'a eb'an̈.

⁷ Am tzotj a nani, to ach b'ab'l 'anma aj 'a yolyib'n̈q'uinl tic. ¿Tom 'aych xon 'ec' a nani yic xlaj pitzwc chan̈ lum niwc witz?

⁸ ¿Tom ojc ach tic tas c'ultac nab'il yuj Dios? ¿Tom cojn ach jeln ach a nan 'a yolyib'n̈q'uinl tic?

⁹ Am tzotj a nani to cojn ach ojc smasnil jelnal, an̈ xo tic on̈, man̈ cojcoc tzotj a nani.

¹⁰ An̈ tic on̈, caw 'ayx qui nab'en si'mb'il on̈, yujto a eb' 'ichmtac winc 'aj xquij can qui jelnal tic on̈, a eb' cha, b'ab'l 'ichm winc eb' 'a sat a mam.

¹¹ A Dios tznib'j yac' a niwnc'ojlal, an̈ xo tic on̈, caw wach' pax tas tzcal 'aych on̈.

¹² ¿Tas yuj tzej 'el a b'a 'a stz'ey, caw wal tz'elt yol a sat scot owal?

¹³ ¿Tas yuj tzcot owl 'a Dios, comn xoj tzal junc paxti'?

¹⁴ Toc 'ay junc 'anma to caw wach', yic may jac smul tz'ochi.

¹⁵ A Dios matz ya'ch wal yipc sc'ojl eb' ángel, 'ixta pax satcha'an̈, man̈toc yel xo pax wach' yilx 'a sat.

¹⁶ An̈ xo an̈ 'anman̈ec tic, caw yajb'entacn̈ec, yel xo wal a maysch'olnil tzqui b'o'ec, lajn wal maysch'olnil chi 'ayn̈ec 'icha swach'l yu'x a a'.

¹⁷ Yuj cha, comnoc tza maclj ab' tas 'oj wala', a tas wojc xo, a chi 'oj wal ab'i'.

¹⁸ A eb' jeln snab'en, a eb' on̈ cuyn can on̈. A jun tzo'n̈ sjelnal eb' cha, ata cuyb'il can yuj eb' 'a smam yicham.

¹⁹ A eb' 'ichmtac winc cha, atn 'a eb' 'ac'b'il can lum lum tic, may eb' chuc chon̈b'al scalj sb'a yet' eb'.

²⁰ A eb' 'anma caw wal tu sb'eyb'al, c'ochn jab' sq'uinl eb', yailaln̈ej tz'aj yec' tiempo yuj eb'.

²¹ A yic tzyab'n eb' sc'an̈ junc tas, caw tzxiw eb' yu'uj, ax yic cob' may tas tzna eb', a paxta tzjaw maysch'olnil chi 'a yib'n̈ eb'.

²² Man̈x 'oj stac' scoln 'elt sb'a eb' 'a scal q'uic'q'uinal, tecn xo 'och q'uen cuchlub' 'a eb' yic tzmilx eb'.

²³ Ax sniwnal eb' cha, a no 'usj 'oj chinoc. Yojc xon pax eb' to a tas tzjaw 'a yib'n̈ eb' cha, to ma'oj 'ec'oc.

²⁴ A yailal mto xiwc'ojlal cha, a 'oj 'a'nc somchjoc 'el snab'en eb', 'icha tzon̈ 'ajc qui xiw chan̈ yuj junc win rey tzjaw yac' owl quet'oc.

²⁵ 'Ixta wal tz'aj junc mach tzyij chan̈ sb'a 'a Dios to tztac' yuj smasnil, yic tzcob' ste'wtzan sb'a 'a yojltac.

²⁶ 'Icha to cob' 'aych smacl jul-lab' 'a yojltac, yic tz'at ya'nc owl yet' Dios snani.

²⁷ Caw wal tzq'ue b'a'chil 'a sjolom yic tzcob' sb'onc chi 'ixta'.

²⁸ Ax jun chon̈b' chi 'aj cajn cha, 'oj lajwc 'eli, man̈x 'a mach 'oj cajnc smasnil te n̈a. 'Oj can 'a sictaquil, jun b'uln̈ xoj 'oj 'ajcn 'icha c'alem.

²⁹ Man̈ niwnoc tiempo 'oj yac' sgana yet' sricoal, may tas 'oj niwtjoc chan̈ yuj 'a sat lum lum tic.

³⁰ Man̈x 'oj stac' scoln 'el sb'a 'a scal q'uic'q'uinal. Lajn wal 'oj 'aj 'icha junc te sc'ab' te tz'a yuj te c'ac', mto tzma'x 'el snich te yuj 'ic'.

³¹ Man̈x cab' ya'ch yipc sc'ojl tas to may yel'chi, yujto a jun cha, ton̈j tzwach' 'ixtx paxti yu'uj.

³² 'Oj seb' cham muc'uc, 'icha tzyac' junc te wolte tzu'x 'el 'a snun, man̈x 'a b'a'n̈ to 'oj yaxb'oc paxi.

³³ Lajn 'oj 'aj 'icha te sat uva ton̈j tzpucl 'a te snun cha, matz 'e'maxi, mto 'icha tzyac' te snich te olivo ton̈j tzpucli.

³⁴ A eb' 'anma maysch'olnil sb'eyb'al, may yin̈tl eb' 'oj q'uib'cn cha'an̈, ax sricoal eb' xniwtj chan̈ yuj schan tumn 'a c'ultaquil, 'oj tz'a smasnil yet' yatut eb'.

³⁵ A eb' cha, cojn maysch'olnil nab'il yuj eb', tznib'j eb' to tzjaw maysch'olnil chi 'a yib'n̈ junc xo yit 'anma'il; cojn chi 'ayc' 'a snab'en eb', xchi win Elifaz.