Job 13 - Chuj San Sebastian Bible

¹ Smasnil jun tzo'n̈ tic, caw xcham wal in maclni wila', xcham in maclni pax wab'i'.

² A tas eyojc ax tic, wojc pax jun xo; man̈toc yel xo 'emnc in c'ojlani.

³ Palta tzin nib'j tzin paxtin yet' Dios, atn jun tztac' yuj smasnil, a yet' tzin nib'j tzin tej in b'a.

⁴ Ax tic, yuj eya'm 'esal tze c'ub'n 'el tas yel; lajn ex yet' junc 'a'm remel, to may jac tzb'o yu'uj.

⁵ Comnoc sictac tzex 'aji, toto 'ixta', caw wal 'ay e nab'en.

⁶ Chajec eyab' tas 'oj wala', 'oj wal 'ayex tas nab'il wu'uj.

⁷ ¿Am tzeyutj e nani to 'oj stac' e colwj 'a Dios yet' eya'm 'esal? ¿Am tzeyutj e nani to 'ay tas 'oj yac' ganar 'a spatic?

⁸ ¿Tom 'oj stac' eya'n e b'a yuj Dios, yic tzcob' eya'lnoc e colni?

⁹ Palta q'uinloc tzex sb'eyc'ojlej Dios, ¿tas 'oj eyutc e b'a? ¿tom 'oj stac' eyixtn paxti 'icha tzeyutj junc 'anma'?

¹⁰ Wach'xam c'ultac tzeya'ch e b'a yet' Dios, palta 'oj ex stumc wal si'mb'il.

¹¹ A Dios caw niwn yel'chi, yujn̈ej smay ax eyib'x yuj xiwlal.

¹² A jun tzo'n̈ cuynb'il yic eb' qui mam quicham 'in a tze c'anlb'ej, a jun tzo'n̈ cha may yopiso, lajn 'icha q'uen stan̈il c'ac'; lajn pax 'icha to lum tzca'ch smuroalc qui chon̈ab'.

¹³ A ticnec sictac tzex 'aji, to 'oj in paxtini, toxn̈ej tzcot 'a wib'n̈ yuj tas 'oj wal tic.

¹⁴ ¿Tas wal tzwac' ganar tzcob' in colnc 'el in q'uinal? Yel xo wach' tzwac' in b'a 'a yol sc'ab' jun 'ay smay.

¹⁵ Wach'xam yuj cha tzin smiln cham Dios, palta 'oj wa'chn̈ej Dios yipc in c'ojol, 'oj in col in b'a 'a yojltac.

¹⁶ Lemb'il pax ata 'oj wac' ganar in colnb'il, yujto a junc maysch'olnil snab'en, matz te'wtzej sb'a sc'och 'a yojltac Dios.

¹⁷ Tzcham wal e maclni eyab' tas 'oj wala', sec 'oj eyab' wal si'mb'il.

¹⁸ A ticnec, tox xin na'a tas tzwutj in coln in b'a, yujto wojtac to wach' 'oj wel'chi.

¹⁹ Toto 'ay mach tzalni to caw 'ay in mul, wach' cab' tzin 'och wan walni, tztac' cab' in cham b'i'an.

²⁰ Ach in Diosal, cojn chab' tas tzin c'an 'ayach, 'ixta to b'i'an tztac' in c'och 'a ojltac.

²¹ 'Actj a'n 'och in yailal, tzactn in a xib'tn yet' tas caw 'ay smay.

²² 'Awjan̈ 'ayin, 'oj in ta'w 'ayach; mto an tzin b'ab'l 'awj 'ayach, ta'wan̈ pax 'ayin.

²³ Al 'ayin 'ajtil xlaj 'och in mul, 'ajtil 'ay tas tu xwutej. 'Ajtil 'ay chi 'aj in 'ec' 'a yib'an̈.

²⁴ ¿Tas yuj tza c'ub'j 'el a b'a 'ayin? ¿Tas yuj 'icha junc 'ajc'ojol, 'ixta tzin otej?

²⁵ Lajn in 'icha junc xilte tz'at yuj 'ic', mto 'icha junc te tacn̈ 'ac, yuj cha, ¿tas yuj tzin a xib'tej? ¿tas yuj an̈ja in a pechn b'eyc'oc?

²⁶ Caw wal ya tas tzal 'ayn tzwab'i, tza c'anb'n cot 'ayin, 'aj xlaj 'och in paltail 'a yic quelm in 'unin.

²⁷ Xa'n 'ajxc 'och q'uen cadena 'a woc, q'ueln ach 'och 'ayin 'aj tzin laj 'eq'ui, checln̈ej 'aj wach' wec' o'oj.

²⁸ A 'in niwnal tic, wan sjuw 'icha junc pichl 'ayx 'och yijal; mto 'icha junc tas wan xo sc'a'i.