Job 12 - Chuj San Sebastian Bible

¹ Yuj cha, xta'w pax Job, xyaln 'ixtic:

² A wal tzwutj wab'ni caw wal cojxn ex 'ojtnac smasnil tas 'a scal eb' 'anma', ax yic 'oj e chami, ax sat 'ejm smasnil jelnal.

³ Palta 'in an tic, 'ay pax in nab'en jun xo, man̈toc yel xo wal may jac tas wojc eyet'oc. A jun tzo'n̈ xeyal tic ¿mach wal junc man̈ 'ojtnacoc?

⁴ Ex in wach'c'ojol, wach'xam an tic may in mul, may pax in paltail; wach'xam xyab' pax Dios waln in b'a 'a yic yaln̈ cha, palta ax ticnec, ton̈j tzin e tzetzej.

⁵ A eb' may jac tas tzjaw 'a yib'an̈, tzpatquilj can 'el eb' junc mach 'oltac yaj yuj syailal; toc 'ay yel'ch junc chi 'a eb', wach'xam tztelw jun 'oltac cha.

⁶ A eb' 'elc'um, caw wal tzaljc'ojlal yaj eb' 'a yatut. A eb' tzlaj 'och smul 'a Dios, toc 'ay tz'i'n eb', a yip eb' an̈j 'ay yel'ch 'a sat eb'.

⁷ C'anb'jec 'a e no noc' tz'ec' 'a sat lu'um yet' 'a e no ch'ic tz'ec' jen̈n̈oc 'a satcha'an̈, 'oj ex scuy e no'.

⁸ Tze c'anb'n pax 'a e no noc' tzjuc sb'a 'a sat lu'um yet' 'a e no chay 'ay 'a yol a mar, yic tzex scuyn e no' 'a jelnal.

⁹ Smasnil jun tzo'n̈ noc' tic, yojc e no' to a Jehová b'ojnac eb',

¹⁰ yujto yol sc'ab'n̈ej 'ay sq'uinl smasnil tas pitzan. A tz'a'n sq'uinl smasnil 'anma'.

¹¹ A yol qui ti', a tz'ab'lni tas tzqui c'uxu, 'ixta pax yaj qui chiquin, a tz'ab'ni tom wach' tas tzalxi, mto ma'ay.

¹² A eb' 'ichmtac winac, caw 'ay snab'en eb', yujto niwn xo yab'lilal tzyil eb'.

¹³ Palta ax Dios caw wal jelan, 'ay spoder, caw 'ay snab'en. Toto 'ay tas tznib'j sb'o', tz'el'chn̈ej yuj 'icha tzyutj snan cha.

¹⁴ A junc tas to a Dios tzsatn 'eli, may junc mach tztac' sb'on pax cha'an̈; ax junc mach tzmacx 'och wan yu'uj, may pax junc mach tztac' scoln 'eli.

¹⁵ Toto tzyal sc'ojl man̈xtzac yac' n̈ab', ax smasnil tas 'ay 'a sat lum tic, c'uxn tztacj 'eli. Q'uinloc tzyal sc'ojl tzjac cot n̈ab', c'uxn tz'atx sat lum lum tic c'acpil yu'uj.

¹⁶ A Dios caw wal 'ay spoder, an̈j tz'a'n ganar. A 'a yol sc'ab' 'ayc' eb' tz'ixtw 'anma', ata 'ayc' pax eb' tz'ixtx cha.

¹⁷ A tz'a'n sat snab'en eb' tzyal jelnal sb'a, ax eb' juez, tz'ochcn eb' man̈ nab'enal yu'uj.

¹⁸ A tz'i'n 'ec' yopiso eb' rey, tzya'n can 'at eb' 'icha presoal 'a junc xo chon̈ab', jitn 'el eb' yic tz'at eb' cha.

¹⁹ A tz'i'n 'el eb' ya'mal 'och sti eb' 'anma 'a yopiso, tzya'n pax 'ajxoc ganar eb' 'ayx tiempo yoch yajlil.

²⁰ Ax eb' 'ichmtac winc yipc'ojlal ya'n junc nab'en, sictac xoj tz'ajcn eb', 'ixta pax eb' 'aych yopiso sb'eyc'ojlwi, tz'ijx 'ec' sjelnal eb' cha.

²¹ A eb' caw 'ay yel'ch 'a sat 'anma', a tz'a'n patquilx can 'el eb'; ax eb' caw wal 'ay yip, a tz'i'n 'el yip eb' cha.

²² A tz'a'n 'ojcax 'el tas c'ultac yaj yu'uj, ax jun tzo'n̈ tas 'ay 'a scal q'uic'q'uinal, a tz'i'n 'elta, ax 'a scal sacq'uinl tzya'x cani.

²³ A tz'a'n q'uib' jun tzo'n̈ nacion̈, a tzsatn pax 'el eb'; a tz'a'n sactzic eb' 'anma cha, a tzmolb'tzan paxt eb'.

²⁴ A tz'i'n 'ec' sjelnal eb' 'aych yajlil 'a junc chon̈ab', yuj cha 'icha to tzsatcn 'ec' eb' 'a cusltac lum 'aj may b'e.

²⁵ Toxn̈ej tzmachlj eb' tz'ec' eb', 'icha to q'uic'q'uinl 'aj 'ay eb', toxn̈ej tztectn 'ec' eb' 'icha 'u'm 'an̈.