Job 11 - Chuj San Sebastian Bible

¹ Xlajw cha, 'ix ta'w pax win Zofar, atn win 'aj Naamat:

² A smasnil jun tzo'n̈ a paxti tic, smoj wal spacx eb' 'ayach, palta man̈ yujoc til wal tas tz'el alni, ax a b'oxcan muc'uc.

³ Am wal a nani to yuj til wal tas tz'el aln tic, ax qui can an̈ tic 'a sictacl on̈. Am tzotj a nani to man̈x 'a mach tztac' spacn jun tzo'n a b'uchwal paxti cha.

⁴ Ach tic, cob' tzal 'a Dios to tojl a nab'en 'a sat, palta mun ach tzal 'ixta'.

⁵ Comnoc wal 'ay tz'aj spaxtin Dios, tzpacn jun tzo'n̈ chi 'ayach.

⁶ Tzach sch'oxn 'a jun tzo'n̈ jelnal c'ultac yaji, atn jun tzo'n̈ caw 'ajltac snachj 'eli. Toto 'ixta', 'oj ojcoc 'eli, to mantzac yac' Dios a yailal 'icha wal tas smoj a chani.

⁷ Am wal tzotj a nani, to 'oj ojcoc 'el sjelnal Dios to c'ultac yaji, atn jun Dios tztac' yuj smasnil.

⁸ ¿Tas wal 'oj otc ojcan 'el jun jelnal cha? A jun cha, yel xo wal najt yajb't 'a satcha'an̈. Yel xo wal xab' yajb't 'a yaln̈ lum xab' olan.

⁹ Yel xo pax niwquil 'a yib'n̈ lum lum tic, 'ec'b'al slewnal sat 'a yib'n̈ a mar.

¹⁰ Toto a Dios tzach 'awtni yic tzach sb'eyc'ojlani, ¿mach wal junc 'oj stac' stenn 'och wa'an?

¹¹ Yojc Dios mach tzyac' 'es, tzyil jantcn̈ej smaysch'olnilal eb' 'anma'. ¿Mto matz yil tza na ach tic?

¹² 'Icha matz tac yalj junc 'anma 'a junc no calte'al b'uru, 'ixta pax junc mach may snab'en 'icha ach tic, ¿tom 'ay 'oj 'aj sjaw snab'en?

¹³ Toto ach tic tza tojlb'tzej a nab'en, al a yailal 'a Dios.

¹⁴ Toto 'ay a mul 'aych 'a eb'an̈, wach' to tzej 'el a b'a 'a yalan̈; man̈ e'ch jun tzo'n̈ maysch'olnil chi 'a yol atut.

¹⁵ To 'ixta', caw wal wach' elx 'a sat Dios, man̈x 'a jac a q'uixwc'ojlal; tzaljc'ojlal 'oj a canxi, man̈x 'a tas 'oj a xib'tni;

¹⁶ ax a'n sat a c'ojl 'a yailal x'ec' 'a eb'an̈; jab'jnal 'oj sat 'a a c'ojol, 'icha tz'aj stup chan̈ a b'eymal a'.

¹⁷ Toto tza na a b'a, wach'xam 'icha to ach can 'a q'uic'q'uinl yuj a yailal tic, palta ax ticnec, 'icha to 'oj sacb' pax 'el 'a eb'an̈. Caw tzaljc'ojlal 'oj a canxi, 'icha wal to chimc'ul 'aj 'aych pax 'eq'ui.

¹⁸ 'Oj a canx 'a junc'ojlal, yujto 'ay jun tas 'aych yipc a c'ojol; a Dios 'oj a tan̈wni, ax a way 'a tzaljc'ojlal.

¹⁹ 'Oj elj 'a tzaljc'ojlal, man̈x 'a mach 'oj a xib'tni. Til pax wal eb' 'anma 'oj jawc 'ayach, ax yoch eb' a wach'c'ojloc.

²⁰ Palta ax eb' maysch'olnil snab'en, 'oj cob' sayc' eb' mach 'oj colwjoc 'a 'a, palta caw nab'a xoj. Man̈x 'oj 'ilchjoc 'aj wach' scoln sb'a eb', axn̈ej schamlil eb' 'aj 'oj ya'ch snab'en, xchi win Zofar.