Job 10 - Chuj San Sebastian Bible

¹ Man̈xtzac in nib'j to pitzn in. 'Oj in checltoc 'el in yailal, ax in paxtin yet' in c'a'lc'ojlal.

² Ax waln 'a Dios 'ixtic: Ach in Diosal, man̈ ala' to 'ay in mul. Toto 'ay in mul cha, al 'ayin 'aj 'ix 'och in mul.

³ 'In ach b'ojnac in, tzlajw cha tzin a patquiln can 'eli, ¿tom wach' tzab'i yic tzin a chacn 'eli, ax yet' eb' maysch'olnil tzach colwji?

⁴ ¿Tom lajn eln junc tas 'icha quiln an̈ 'anman̈ tic on̈?

⁵ ¿Tom lajn 'a q'uinl 'icha jab' qui q'uinl an̈ 'anman̈ tic, yujto chamlb'a caj on̈?

⁶ ¿Tas pax yuj tza nib'j wal to tza say el in mul mto in paltail?

⁷ Wach'xam ojtac to may in mul, palta toc 'ay mach tztac' in scoln 'el 'a yol a c'ab'.

⁸ Ach b'ojnac in, ax ticnec tza nib'j pax tzin a satli.

⁹ Na cot nab'an, to an tic b'ob'iln 'oj 'a lum pococ; ax ticnec ¿tom tzin a'x can 'och pococal muc'uc?

¹⁰ 'Icha tz'aj sb'o no queso yic tzpajb' no lech, 'ixta xotj a b'on in niwnal tic.

¹¹ Ach xac' pitzwc in b'aq'uil yet' in ch'an̈il, xa'n pitzwc 'och in chib'jal, yet' in tz'umal 'a spatquil.

¹² Ach xac' in q'uinal, yujto 'ay a chamc'ojlal 'ayin; in a tan̈wni paxi, yuj cha, pitzn in.

¹³ Palta a ticnec tznachj 'el wu'uj, to 'ay tas c'ultac nab'il 'oj 'a in patic.

¹⁴ Q'ueln ach 'och 'ayin, yic tzelni 'aj tz'och in mul, sec tztac' in a'n cuenta yuj in paltail cha.

¹⁵ Toto 'ay in mul tz'och 'ayach, caw wal 'oltaquin; wach'xam wach' in, palta matz tac' woch 'a ojltac 'a junc'ojlal, yujto caw wal tzin q'uixw in nan cot in yailal.

¹⁶ Toto cob' tzwij chan̈ in b'a, ax am tz'aji, 'icha spechn b'ey no león junc noc' tzyam schib'joc, 'ixta am tzin otej; 'ay smay a b'on junc tas satjub'tac yilx 'a in patquil.

¹⁷ Tza say am jun tzo'n̈ocx a testigo. Caw am tzniwtj scot owl 'ayn 'icha scot b'ulb'noc eb' soldado yac' owal.

¹⁸ ¿Tas yuj ton̈j 'ix ela yic in 'alji? Comnoc a yic mantzac in 'alji in chamcn 'a yol sc'ojl in nun, sec may xon mach in 'ilni.

¹⁹ Comnoc a yic in 'el 'a spatc in nun, in 'at mucxoc can 'a campusan, sec ma'ix checlj 'eli toto 'ay mach 'ix pitzw 'el 'a yolyib'n̈q'uinl tic.

²⁰ Ya' sb'a to man̈ najtoc yoc jab' in q'uinl tic, comnoc tz'el 'a a c'ojl a'n in junc'ojlal. 'Ac' wil jac tzaljc'ojlal,

²¹ ya' sb'a mantzac in meltzj 'a yolyib'n̈q'uinl tic. Toto 'oj in chami, toc 'oj in jaw pax jun 'ejm xo.

²² 'Oj in can 'a jun lugar to man̈x 'a sacq'uinl tz'ilx ta', musn xoj ta 'a smasnil tiempo, 'a 'ajtil to a sacq'uinl tic, a chi q'uic'q'uinl pax yaj ta', xchi win Job.