Jn 8 - Chuj San Sebastian Bible

¹ Ax Jesús, 'ix 'at 'a tzaln Olivo.

² Ax yic sacb'i, 'ix 'atx 'a yatut Dios jun 'ejm xo. Yic 'ix c'och ta', c'uxn xlaj c'och eb' 'anma 'a stz'ey. Ax Jesús, 'ix 'em wocan, syamn 'och scuywj 'a eb'.

³ Ax ewin cuywjum 'a ley yic Moisés, yet' ewin fariseo, 'ix yij 'at ewin jun 'ix 'a 'a. 'Ix yamchj 'ix yuj ewinac yic wan smuln 'ix. Xya'n 'och ewin 'ix 'a yojltac Jesús, yet' 'a yojltac eb' 'ayc' yet'oc.

⁴ Xyaln ewin 'ixtc 'a 'a: —Mamin, a jun 'ix tic, wan smulni yic 'ix yamchj cuj on̈.

⁵ A ley yic Moisés tzalni, a eb' 'ix tzb'on 'ixtic, yowlal tzjulx cham eb' yet' q'uen q'ue'en. Al ach ¿tas xa chi jun xo? xchi ewin 'a 'a.

⁶ Palta ton̈j xcob' stz'ac ewin sc'anb'c 'ixta', yic tzya'lni prowal ewinac, yujto tznib'j ewin tzyac' queja. Ax Jesús ton̈j 'ix 'em n̈ojan. 'Ix stz'ib'n can 'ejm jun tzo'n̈ tas 'a sat lum yet' yune sc'ab'.

⁷ 'Ix sc'anb'n pax wal ewin 'ixtc 'a jun 'ejm xo: ¿Tas wal xa chi yuj jun tic jun? xchi pax ewinac. Yuj cha, 'ix q'uex lin̈an, 'ix yaln 'a ewin 'ixtic: —Toto 'ay junc ex caw may jac e mul, b'ab'l juljec 'och junc q'uen 'a 'ix, schi 'a ewinac.

⁸ Xlajw yaln jun tzo'n̈ cha, 'ix 'emx n̈ojn jun 'ejm xo. 'Ix stz'ib'n can pax 'ejm jun tzo'n̈ xo tas 'a sat lum cha.

⁹ A yic 'ix yab'n ewin jun tic, 'ix laj snan sb'a junjn eb', 'ayn̈j smul eb'. Yuj cha, junjnal xlaj pax ewinac. A ewin 'ichmtac winac, a ewin xlaj b'ab'l paxi. Ax ewin quelmtac, tza'nto xlaj pax eb'. Ax Jesús sch'ocj xoj xcan 'a 'aj lin̈n 'ec' jun 'ix cha.

¹⁰ Xlajw cha, 'ix yi'n chan̈ Jesús sat. 'Ix yilni sch'ocj xoj jun 'ix chi 'aycni. Yuj cha, xyaln 'a 'ix 'ixtic: —Ach 'ix, ¿'ajtc 'ay ewin ach 'a'n queja cha? ¿Man̈x 'a mach am tz'a'n 'och junc tas 'a eb'n̈ ticnec? xchi 'a 'ix.

¹¹ —May Mamin, man̈x 'a mach, xchi 'ix. —An̈jtona 'in, may tas tzwa'ch 'a eb'an̈. Yuj cha, 'ixic. Man̈x a say a mulc jun 'ejm xo, xchi Jesús 'a 'ix.]

A Jesús 'a'm sacq'uinal

¹² 'Ix yaln pax Jesús 'ixtc 'a scal eb' 'anma cha: —An tic, 'icha sacq'uinl waj 'a eb' 'anma 'ay 'a yolyib'n̈q'uinl tic. A eb' tz'och in cuywumoc, 'oj wac' sacq'uinl 'a spixn eb'. Yuj jun sacq'uinl cha, 'oj scha eb' sq'uinl 'a jun 'ejmn̈ej. Man̈x 'oj b'ey eb' 'a scal q'uic'q'uinal, xchi Jesús.

¹³ Ax ewin fariseo 'ix aln 'a 'ixtic: —Ach tic, mun tzala to 'ay opiso. Yuj cha, caw may yel'ch jab' ec chi cob' wan aln cha, xchi ewin 'a 'a.

¹⁴ Yuj cha, xyaln pax 'ixtc 'a ewinac: —Wach'xam mun tzwala to 'ay wopiso, palta caw yel tzwala. Yujto an tic, caw wojtac 'aj cotnc in. Anjtona', wojtac 'aj 'oj in c'ochxi. Ax xo tic, man̈ eyojcoc 'aj cotnc in, yet' 'a 'aj 'oj in c'ochxi.

¹⁵ Ax tic, ton̈j tze comn b'eyc'ojlej junc mach muc'uc. Aln tic, may mach tzin b'eyc'ojlej.

¹⁶ Palta q'uinloc 'ay mach tzin nib'j tzin b'eyc'ojlej. Toto 'ixta', caw tojln̈ej tzwutj in b'eyc'ojlani. Yujto man̈ in ocn̈ej tzin b'eyc'ojlej. Palta a 'in Mam 'aych wet'oc, yujto a checjnacn coti.

¹⁷ A jun ley 'aycn 'ayn̈ec, a tzalni toto 'ay chawn̈ testigo lajn tas tzyala, yowlal tzqui chajec cab' tas tzyal eb'.

¹⁸ Palta 'in 'ay chawn̈ testigo tzaln wu'uj. An ton tic testigo 'in, testigo pax in Mam wet'oc, yujto a checjnacn coti, xchi 'a ewinac.

¹⁹ —Palta ¿'ajtil 'ay a Mam chi jun? xchi ewin 'a 'a. Yuj cha, xyaln pax 'ixtc 'a ewinac: —Ax tic, man̈ eyojcoc mach in. Man̈ eyojcoc pax in Mam cha. Octom eyojtac mach in, toto 'ixta', eyojc pax in Mam cha, xchi 'a ewinac.

²⁰ A 'a yamq'uil yatut Dios 'a stz'ey jun chalab' ofrenda, ata xyal Jesús jun tzo'n̈ tic. Ata 'ix cuywj 'a eb' 'anma'. May junc mach 'ix yamni, yujto mantzac jaw stiempoal schami.

A 'aj tzc'och Jesús,*r* ma'oj stac' scomn c'och eb' 'anma'

²¹ 'Ix yaln Jesús 'a ewin 'ixtic: —An tic, 'oj in 'ati. Ax xo tic 'oj cob' in e sayq'ui, palta a 'a scal e mul 'oj e chami. Yuj cha, ma'oj stac' e comn c'och 'a 'aj 'oj in c'och cha, xchi.

²² Yuj cha, xlaj yalnc ewin 'aj Judea chi 'ixtic: —Tecn to 'oj smil sb'a am winac. Yuj cha, xyaln winac to ma'oj stac' qui c'ochc 'a 'aj tzc'och cha, xchi ewinac.

²³ 'Ix yaln pax Jesús chi 'ixtc 'a ewinac: —Ax tic, 'aj sat lum ex, yujto yic ex yolyib'n̈q'uinl tic. Aln tic, man̈ in yico'oc yolyib'n̈q'uinl tic, to 'aj satchan̈ in.

²⁴ Yuj cha, xwaln 'ayex to a 'a scal e mul 'oj e chami. Toto matz eya'ch 'a e c'ojol, to an ton 'icha xwala, toto 'ixta', a 'a scal e mul chi 'oj e chami, xchi.

²⁵ —¿Machch cob' jun? xchi pax ewin 'a 'a. —Palta 'in waljnacx 'ayx 'a yaln̈taxi, mach in.

²⁶ Til to wal tastc 'oj wal eyu'uj, yic 'oj ex in b'eyc'ojloc. A jun checjnacn coti, caw yel tzyala. A tas yaljnac 'ayin, an̈j tzwal 'a eb' 'anma 'a yolyib'n̈q'uinl tic, xchi 'a ewinac.

²⁷ Palta ma'ix nachj 'el yuj ewinac, toto wan yaln yuj qui Mam Dios.

²⁸ Yuj cha, 'ix yaln pax 'a ewin 'ixtic: —At yic 'oj in e t'un̈nc q'ue'i, ax snachj 'el eyu'uj, to an 'Ochnc in 'Anma'il. Atta 'oj eyojcoc 'eli to may tas mun tzin b'o in ch'ocoj. An̈j jun tzo'n̈ cuynb'il yaljnac in Mam 'ayin, an̈j tzwala.

²⁹ A jun checjnacn cot cha, a 'aych wet'oc. A 'in Mam cha, ma'in yactj can in ch'ocoj, yujto an̈j tas tznib'ej, an̈j tzin b'o 'a smasnil tiempo, xchi 'a ewinac.

³⁰ Ax yic 'ix yaln jun tzo'n̈ tic, til wal eb' xya'ch sc'ojl 'a 'a.

A eb' yic Dios*r* yet' eb' ya'mal servil maysch'olnil

³¹ 'Ix yaln Jesús 'ixtc 'a eb' israel xya'ch sc'ojl 'a 'a: —Toto smasnil tiempo tzeya'ch e nab'en 'a tas tzwala, wal yel in cuywum ex.

³² Toto 'ixta', 'oj eyojcoc 'el spaxti Dios caw yel. Yuj jun spaxti yel cha, 'oj eyijx 'elt 'a libre, xchi Jesús 'a eb'.

³³ Palta xyaln pax eb' 'ixtc 'a 'a: —An̈ tic on̈, yin̈tl on̈ pax Abraham et' on̈. May jun 'ejmoc on̈ 'och ya'malc servil junc 'anma 'on̈. Yuj cha, ¿tas yuj tzal to 'oj quijx 'el 'a libre chi 'on̈? xchi eb'.

³⁴ —Wal yel tzwal 'ayex, tzann̈j eb' an̈ja sayn smul, caw 'aych eb' ya'malc servil maysch'olnil.

³⁵ Q'uinloc 'ay junc mach 'aych ya'malc servil junc 'anma ticnec. A jun cha, may yaln yic yet' eb' yunnal jun 'anma chi 'a jun 'ejmn̈ej. Palta a junc caw yunnal junc 'anma cha, toxn to 'ay yaln yic yet' 'a jun 'ejmn̈ej.

³⁶ Yuj cha, toto an tzex in colcn 'el 'a yaln̈ e mul, caw yel 'oj eyelcn 'a libre, yujto Yunnaln Dios.

³⁷ An tic, wojc xoni to yin̈tl ex Abraham wet'oc. Palta 'in tze nib'j tzin e mil chamoc, yujto a tas tzwal 'ayex, may yel'ch 'a e sat.

³⁸ A tas wiljnac yet' in Mam, a tzwal 'ayex. Ax xo tic, chuc jun e mam wan e b'on tas tzyal 'ayex, xchi Jesús 'a eb'.

³⁹ —Palta atn Abraham, a mamb'il yaj 'ayn̈ on̈, xchi eb' 'a 'a. —Octom yel yin̈tlex Abraham cha. Toto 'ixta', wan e b'eylb'an 'icha 'e'nc cha.

⁴⁰ A jun tzo'n̈ tas yel yaljnac Dios 'ayin, an̈j tzwal 'ayex. Palta 'in tze nib'j tzin e mil chamoc. Ax Abraham cha, may jun 'ejmoc sb'ojnac 'ixta'.

⁴¹ Ax tic, a tas tzb'o jun e mam, an̈j tze b'o yet'oc, xchi Jesús 'a eb'. —Palta an̈ tic on̈, man̈ mitz' 'unnoc caj on̈. Junn̈j qui mam on̈, atn Dios, xchi eb' 'a 'a.

⁴² —Octom yel a Dios chi e mam. Toto 'ixta', 'ay e chamc'ojlal 'ayin, yujto a 'a Dios chi cotnc in, in jaw 'a tic. Man̈ munoc tzin jawi, yujto a Dios checjnacn coti.

⁴³ ¿Tas yuj matz nachj 'el eyu'uj, tas tzwal 'ayex? Tecn to matz yal e c'ojl tze chaj eyab' in paxti tic.

⁴⁴ Ax tic, a jun e mam, atn win diablo. Yuj cha, an̈j 'a win tzeya'ch e nab'en. An̈j tas tznib'j winac, an̈j tze b'o'o. Yictax sb'o yolyib'n̈q'uinl tic, ma'm cham 'anma xon win ta'. May jac yel'ch junc tas yel 'a winac, yujto may junc yel tzyal winac. A yic tzya'n win junc 'es, a 'a snab'en win tzcoti, yujto caw 'a'm 'es winac. A 'a winac, ata tzpitzw 'el smasnil 'es.

⁴⁵ Aln tic, caw yel jun tzo'n̈ tas tzwal 'ayex, palta matz e chaj eyab'i'.

⁴⁶ ¿Mach junc ex 'oj stac' e ch'oxn 'el jac in mul? Caw yel jun tzo'n̈ tas tzwal 'ayx tic. Yuj cha, ¿tas yuj matz e chaj eyab'i'?

⁴⁷ A eb' yic Dios, tzya'ch eb' schicn 'a spaxti'. Palta ax xo tic, man̈ ex yico'oc Dios. Yuj cha, matz yal e c'ojl tzeya'ch e chicn 'a 'a, xchi Jesús 'a eb'.

Yic mantzac 'alj Abraham 'ayc' xon Jesús

⁴⁸ 'Ix yaln pax ewin 'aj Judea chi 'ixtc 'a Jesús: —'Ilt nab'n jun, yel tzcal on̈. Tecnto 'aj Samaria ach. Tecnto 'aych junc demonio 'ayach, xchi ewin 'a 'a.

⁴⁹ —Ma'ay, may junc demonio 'aych 'ayin. To wan in yiclni tas tzyal in Mam. Palta ax xo tic, ton̈j tzex b'uchwj 'ayin.

⁵⁰ An tic matz in nib'j 'ay wel'chi. Palta 'ay jun tzalni to 'ay wel'ch 'a sat. A jun chi tzb'eyc'ojlani, mach yel tzyala.

⁵¹ Wal yel tzwal 'ayex, a eb' tzyiclni tas tzwala, may b'a'n̈ 'oj cham eb', xchi Jesús 'a ewinac.

⁵² —A ticnec, caw cojc on̈, to 'aych jun demonio chi 'ayach. A win Abraham yet' jantcn̈ej eb' schecb' Dios pecti', c'uxn chamnc eb' smasnil. Ach xo tic tzal 'ixtic: Toto 'ay eb' tzyiclni tas tzwala, may b'a'n̈ 'oj cham eb', xa chi cob'i'.

⁵³ ¿Tom 'ec'b'al el'ch 'a yib'n̈ qui mam quichmec Abraham cha? Yet' pax 'a ewin schecb' Dios chi pecti', ¿tom 'ec'b'al pax el'ch 'a yib'n̈ ewinac? 'In chamnc ewin chi smasnil. ¿Machch cob' a nanc ticnec? xchi ewin 'a 'a.

⁵⁴ Yuj cha, xyaln pax 'ixtc 'a ewinac: —Toto mun tzwij chan̈ in b'a, may jac wel'chi. Palta a 'in Mam tzalni, to 'ay wel'chi. A 'in Mam cha, a tzeyalch e Diosaloc,

⁵⁵ palta niwnoc tzeyal 'ixta', yujto man̈ eyojcoc. Aln tic, caw wojc Dios cha. Q'uinloc tzwala to man̈ wojcoc. To 'ixta', caw tzwac' 'es 'icha 'ex. Palta caw yel wojtac, yujto a tas tzyala, a tzin yiclej.

⁵⁶ A qui mam quichmec Abraham, tzaljnac yujto alxnac 'a 'a, to 'oj yil in jawi. In yiln toni, yuj cha, caw tzaljnac, xchi 'a ewinac.

⁵⁷ ¿Tom a c'umjnac a b'a yet' Abraham cha? Palta 'in caw 'ayt a c'och a cincuenta ab'il, xchi ewin 'a 'a.

⁵⁸ —Wal yel tzwal 'ayex, yic mantzac 'alj Abraham cha, toxn 'ayn xon 'eq'ui, xchi Jesús 'a ewinac.

⁵⁹ Xlajw cha, 'ix laj si'nc chan̈ ewin q'ue'en, snib'n ewin sjul chamoc. Ax Jesús 'ix sc'ub'j 'el sb'a 'a ewinac. 'Ix 'elt 'a yamq'uil yatut Dios cha.