Jn 5 - Chuj San Sebastian Bible

B'oxnc win sicb'nac 'eli

¹ Xlajw cha, 'ix 'atx Jesús 'a Jerusalén, x'at yilnoc jun sq'uin̈ eb' yit israelal.

² A 'a yol jun chon̈b' cha, ata 'ay jun tanque Betesda sb'i 'a hebreo, atn sti eb' israel. A 'a sti jun tanque cha, ata 'ay o'e n̈a may yich. 'Ayc' jun tanque chi 'a sla'nil jun puerta 'aj tzb'ey no calnelu.

³ Til wal eb' palta yaj 'ayc' 'a yojol. 'Ay eb' matz uj yilni. 'Ay eb' coxo. 'Ay pax eb' sicb'nac 'eli. [To tztan̈wj eb' yib'x jun a cha.

⁴ Yujto 'ay 'aj tzwulc' 'emt jun ángel 'a jun a cha, tzwul ya'n 'ib'xoc a'. An̈j junc tzb'ab'l 'ejm 'a yojl a', an̈j tzb'ox can sc'ojl yuj tzann̈j tas palta yaj 'a 'a.]

⁵ Ata 'ay jun winac, 38 ab'il xo sjuw cani.

⁶ Ax yic x'ec' Jesús, 'ix yilni c'otn 'ec' winac. Yojc Jesús chajtlto najtl xo tiempo 'ixta yaj winac. Yuj cha, 'ix sc'anb'n 'a win 'ixtic: —¿Tzam a nib'j tzach b'oxi? xchi 'a winac.

⁷ —Comnoc wal tztac' Mamin, palta a yic tz'ib'x jun a tic, may mach tzcolwj in ya'n 'ejm jac 'a yojl a'. 'A junjn 'ejem, mun tzcob' wa'lc in 'at 'a yojl a', palta chucx eb' tzb'ab'l 'ejm pax mu'c 'ayin, xchi win 'a Jesús.

⁸ Yuj cha, xyaln Jesús 'ixtc 'a winac: —Q'uen̈ wa'an, 'ij chan̈ a waynub'. B'eyan̈, xchi 'a winac.

⁹ Yajn̈j wal cha, 'ix b'ox sc'ojl winac. 'Ix yi'n chan̈ win swaynub', 'ix b'ey winac. Palta sc'ul 'iljelal jun c'u cha.

¹⁰ Yuj cha, 'ay jaywn̈ ewin 'aj Judea xaln 'ixtc 'a win xb'ox cha: —A ticnec, caw sc'ul 'iljelal. Caw may sleyl tza cuchb't a waynub' tic, xchi ewin 'a winac.

¹¹ —A jun in 'a'n b'oxoc, a 'ix aln 'ayn 'ixtic: 'Ij chan̈ a waynub', b'eyan̈, xchi 'ayin, xchi winac.

¹² Yuj cha, 'ix sc'anb'n ewin 'ixtc 'a winac: —¿Mach jun chi 'ix aln 'aych cha, tze'n chan̈ a waynub', yic tzach b'ey cha? xchi ewinac.

¹³ Palta man̈ yojcoc winac tas sb'i jun chi x'a'n b'oxc winac, yujto til wal 'anma 'ayc' ta'. Yuj cha, ma'ix yil winac 'aj xc'och Jesús 'a scal eb' 'anma chi muc'uc.

¹⁴ At 'a jun 'ejm xo, 'ix sc'umn sb'a Jesús yet' win 'a yamq'uil yatut Dios, 'ix yaln 'ixtc 'a winac: —'Ab'i, a ticnec 'ix b'ox a c'ojol. Man̈x a b'o junc maysch'olnil, sec man̈x 'oj jawc jun niwn yailal 'a eb'an̈, xchi 'a winac.

¹⁵ Yuj cha, 'ix 'atx win 'at yal 'a ewin 'aj Judea cha, chajtlto a Jesús chi x'a'n b'oxc winac.

¹⁶ Yuj cha, caw x'och ewin 'ajc'ojlal 'a Jesús cha. ['Ix cob' snib'c ewin smil chamoc,] yujto sc'ul 'iljelal 'ix sb'o jun tzo'n̈ cha.

¹⁷ Palta xyaln Jesús chi 'a ewin 'ixtic: —A 'in Mam, may 'aj tz'och wan smunlji. Yuj cha, an̈jan̈ej in munlj pax an tic, xchi 'a ewinac.

¹⁸ Yic xyaln Jesús jun tzo'n̈ cha, yel xo wal caw snib'j ewin smil chamoc. Man̈ yujocn̈ej matz yiclj sc'ul 'iljelal, palta yujto 'ix yal Dios Smamoc. 'Ix yaln paxi to caw lajn yet' Dios.

A Yopiso Yunnal Dios

¹⁹ 'Ix yaln pax Jesús 'a ewin 'ixtic: —Wal yel tzwal 'ayex, an Yunnaln Dios tic, may tas tztac' in b'on in ch'ocoj. Cojn tas tzwil sb'on in Mam, an̈j tzin b'o'o. Jantcn̈ej tas tzb'o in Mam cha, a tzin b'o paxi.

²⁰ A 'in Mam cha, tzin schamc'ojlej an Yunnaln tic. Jantcn̈ej tas tzb'o'o, tzch'oxn̈j pax 'ayin. 'Ayt wal jun tzo'n̈ xo tas 'oj sch'oxo', sec 'oj sat e c'ojl eyilni.

²¹ Yujto a 'in Mam cha, tztac' ya'n pitzwc pax eb' chamnac, tzya'n sq'uinl eb'. 'Ixta pax in an Yunnaln tic, toto 'ay eb' tzin nib'j tzwac' sq'uinal, 'oj wac'a'.

²² A 'in Mam, matz b'eyc'ojlej junc 'anma'. Palta an Yunnaln tic, an ya'jnac wopiso in b'eyc'ojlan eb' smasnil.

²³ 'Ixta yutjnac in Mam ya'n wopiso an Yunnaln tic, sec wach' lajn wel'ch yet' in Mam chi 'a sat smasnil 'anma'. Toto 'ay eb' may wel'ch 'a sat, an̈jtona', may yel'ch pax in Mam 'a sat eb', yujto a checjnacn coti.

²⁴ Wal yel tzwal 'ayex, a eb' tz'ab'n in paxti', tzya'n 'och eb' sc'ojl 'a jun checjnacn coti, atn eb' chi 'ay sq'uinl 'a jun 'ejmn̈ej. Man̈x 'oj 'at eb' 'a yailal, yujto tox 'ix 'el eb' 'a yol sc'ab' chamel, 'ix schaj eb' sq'uinal.

²⁵ Wal yel tzwal 'ayex, a ticnec, tox 'ix jaw stiempoal yab'n eb' chamnc in jaj an Yunnaln Dios tic. A eb' tzyiclni, atn eb' 'oj scha sq'uinal.

²⁶ Yujto a 'in Mam, 'ay spoder ya'n sq'uinl eb' 'anma'. Ya'jnac can pax jun spoder chi 'ayn an Yunnaln tic. Yuj cha, an̈jtona 'in, tztac' wa'n pax sq'uinl eb'.

²⁷ Ya'jnac can pax in poder in b'eyc'ojlan smasnil 'anma', yujto 'Ochnc in 'Anma'il.

²⁸ Man̈ eyac' sat e c'ojl yuj jun tzo'n̈ tzwal 'ayx tic. Yujto 'ay jun tiempoal 'oj jawoc, a wal eb' mucb'ilx xo, 'oj yab' eb' in jaj,

²⁹ ax sq'ue paxt eb'. A eb' wach' 'e'nc 'a yolyib'n̈q'uinl tic, 'oj pitzwc pax eb', ax schan eb' sq'uinl 'a jun 'ejmn̈ej. Ax eb' maysch'olnil 'ec' yutjnac sb'a, 'oj pitzwc pax eb' jun xo, palta 'oj 'atcn eb' 'a yailal 'a jun 'ejmn̈ej.

Yaljnac Jesucristo tas yopiso

³⁰ An tic, may junc tas tztac' in b'on in ch'ocoj. 'Icha tzyal in Mam 'ayin, 'ixta tzwutj in b'eyc'ojlani. Caw wach'n̈j tzwutj in b'eyc'ojlani, yujto matz in b'o 'icha tzin nib'j an tic, palta an̈j 'icha tznib'j jun checjnacn coti, atn in Mam.

³¹ Toto mun tzwala to 'ay wopiso, may yel'ch jun wic chi tzwala.

³² Palta 'ay junx tzalni tas wopiso. A jun cha, wojtac to caw yel tzyal wu'uj.

³³ Ax tic, xit' eya' c'anb'xoc 'a Juan Bautista tas wopiso. A tas yaljnac wu'uj, caw yel tzyala.

³⁴ Palta an tic, matz wa'ch yipc in c'ojol tas tzyal junc 'anma wu'uj. Ton̈j tzwac' e na coti, tas yaljnac Juan 'ayex, sec toq'ue 'oj e colchji.

³⁵ A Juan cha, 'icha junc tziclab'il taj caw 'ay yoc, 'ixta yeq'ui. Yuj cha, ex tzalj jaye c'u yet'oc.

³⁶ Palta 'ay junx 'ec'b'al yel'ch 'a yib'n̈ Juan cha. A tzch'oxn 'eli tas wopiso. Yujto a jun tzo'n̈ tas tzyac' in Mam in b'o', a tzin b'o'o. 'Ixta tz'aj scheclj 'eli, to a 'in Mam chi checjnacn coti.

³⁷ A 'in Mam cha, a checjnacn coti, a tzyac' testigoal sb'a wu'uj. Ax tic, may jun 'ejmoc xeyab' sjaj spaxtini. May 'aj xeyil jun 'ejmoc.

³⁸ Ma'ix eya'ch e nab'en 'a spaxti', yujto matz eya'ch e c'ojl 'ayn an checb'iln cot yuj tic.

³⁹ Yelc'ojlal tze cuy ton Ch'an̈ Un̈ tz'ib'b'il cani, yujto tze na'a, to ata 'oj 'ilchjoc e q'uinl 'a jun 'ejmn̈ej. Palta wach'xam tzyal Ch'an̈ Un̈ chi wab'xil,

⁴⁰ matz e nib'j tzex jaw 'ayin, yic tze chan e q'uinl cha.

⁴¹ Matz in nib'j to 'ay wel'ch 'a sat eb' 'anma'.

⁴² Ax xo tic, wojtac tas yaj e nab'en, to may e chamc'ojlal 'a Dios.

⁴³ An tic, checb'iln cot yuj in Mam, palta 'in matz eya'ch e c'ojl 'ayin. Toto 'ay junc xo mach mun 'oj jawc 'a yol yico', atn 'a jun chi 'oj eya'ch e c'ojol.

⁴⁴ Toto an̈j 'a e sat junjn ex tze nib'j 'ay eyel'chi, toto matz e nib'j 'ay eyel'ch 'a sat Dios jun caw yel, ¿tom 'oj stac' eya'n 'och e c'ojl 'a 'a?

⁴⁵ Xe natlaji, to an 'oj ex wac' queja 'a in Mam. Yujto 'ay junx 'oj eya'n queja 'a 'a, atn Moisés, jun tzeya'ch cob' yipc e c'ojol.

⁴⁶ Octom xeya'ch e c'ojl 'a tas stz'ib'jnac can Moisés cha. Toto 'ixta', xeya'ch e c'ojl 'ayin, yujto a tz'ib'jnac can wab'xil.

⁴⁷ Toto matz eya'ch e c'ojl 'a tas stz'ib'jnac can cha, ¿tast wal 'oj eyutc eya'n 'och e c'ojl 'a tas tzwal 'ayex? xchi Jesús 'a ewin 'aj Judea cha.