Jn 4 - Chuj San Sebastian Bible

A Jesús yet' jun 'ix 'aj Samaria

¹ 'Ix yab'n eb' fariseo yab'xil to 'ec'b'al sb'isl eb' scuywum Jesús 'a yib'n̈ eb' yic Juan. 'Ec'b'al pax eb' x'ajx bautisar yu'uj.

² Palta man̈oc Jesús xcaw 'a'n bautisar eb', a eb' scuywum.

³ Yic 'ix yab'n Jesús to yojc eb' fariseo jun cha, 'ix meltzj 'a Judea, 'ix 'atx 'a Galilea.

⁴ Yowlal a 'a yol yic Samaria tz'eq'ui yic tz'at cha.

⁵ Yuj cha, yic wan yec' Jesús 'a yol yic Samaria cha, 'ix c'och 'a chon̈b' Sicar. Ata 'ay jun chon̈b' chi 'a stz'ey jun lum ya'jnac can Jacob 'a jun yunnal José sb'i.

⁶ Ata 'ay jun a joyb'il can yuj Jacob. Ax Jesús, tecn chimc'ul 'ix c'och ta'. Yujto 'ix c'unb' sb'eyi, yuj cha, 'ix 'em wocn 'a sti jun a cha.

^7-8 Ax eb' scuywum, 'ix 'at eb' sman jac yic schimc'ul 'a jun chon̈b' 'ay 'a sla'nil jun a cha. Ax yic tox 'ix 'at eb', 'ix c'och jun 'ix 'ix 'aj Samaria 'at yic' q'uet ya'al. 'Ix yaln Jesús 'a 'ix 'ixtic: —'Ac' wal wuc' jac al tic, xchi 'a 'ix.

⁹ —Ach tic, 'in israel ach. ¿Tas yuj tza c'an a a tic 'ayin? ¿Tom man̈ ojcoc to 'aj Samaria in? xchi 'ix 'a Jesús. 'Ixta xyutj 'ix yaln 'a 'a, yujto a eb' israel, may 'ajtil tzc'umj xon sb'a eb' yet' eb' 'aj Samaria cha.

¹⁰ Xlajw cha, xyaln pax Jesús 'ixtc 'a 'ix: —Tzin c'an wuc' jac a 'ayach, palta man̈ ojcoc mach in. Man̈ ojcoc pax tas tznib'j Dios tzyac'a. Comnoc ojtac. Toto 'ixta', ach xo tic, xa c'an 'ayin, an xo xwac' jun a tz'a'n a q'uinal, xchi Jesús 'a 'ix.

¹¹ —Ach winac, 'in may a lechlab' tzac' lechnc q'uet a'. Caw xab' yaj 'ejm a'. ¿'Ajm til 'oj ec' jun a 'oj ac' 'a'nc in q'uinl cha?

¹² A qui mam 'ichm Jacob on̈, a 'u'jnac a yet' eb' yunnal 'a tic, yet' jun tzo'n̈ scajb'en noc'. A yic schami, xcan jun a tic 'ayn̈ on̈. Ach xo tic, ¿tom 'ec'b'al opiso 'a Jacob cha? xchi 'ix 'a 'a.

¹³ Yuj cha, xyaln pax Jesús 'ixtc 'a 'ix: —Tzann̈j mach tz'u'n jun a tic, tz'ochx stacn̈til eb' jun 'ejm xo.

¹⁴ Palta ax eb' tz'u'n jun a tzwac'a, man̈x b'a'n̈ 'oj cot stacn̈til eb' jun 'ejm xo. Yujto a jun a tzwac' tic, 'oj 'aj sjaj a 'a eb', ax ya'n a sq'uinl eb' 'a jun 'ejmn̈ej, xchi Jesús 'a 'ix.

¹⁵ —'Ac' jun a chi 'ayn 'an, sec man̈x 'oj tacjoc in ti'. Toto 'ixta', man̈x yowlalc tzwul wic' q'uet jun a tic, xchi 'ix.

¹⁶ —'Ixic, 'at 'ij cot win echmil, tzex jaw 'a tic, xchi Jesús 'a 'ix.

¹⁷ Palta may wichmil, xchi 'ix. —Yel ton tzala may echmil ticnec.

¹⁸ Palta 'in own̈ xo echmil 'aj ach 'eq'ui. Ax jun 'aj 'aych 'ec' pax ticnec, man̈ echmiloc toni. Yuj cha, yel ton tzal 'ayin may echmil, xchi Jesús 'a 'ix.

¹⁹ Xlajw yab'n 'ix jun tzo'n̈ cha, xyaln pax 'ix 'a 'ixtic: —Ach winac, schecb' ach Dios tzwab'i.

²⁰ A eb' qui mam quichm an̈ 'aj Samaria on̈ tic on̈, a 'a jun witz tic wul yaljnac sb'a eb' 'a Dios. Palta ax xo israel ex tic, tzeyal 'ixtic: A 'a Jerusalén, ata yowlal tz'at calc qui b'a 'a Dios, xe chi, xchi 'ix.

²¹ 'Ix yaln pax Jesús 'a 'ix: —Ach 'ix, 'a'ch a c'ojl 'a tas 'oj wal 'ayach. 'Ay jun tiempoal 'oj jawoc, man̈xoc 'a jun witz tic 'oj wul eyal e b'a 'a qui Mam Dios, an̈jtona', man̈x yowlalc 'oj e 'at 'a Jerusalén.

²² Ax 'aj Samaria ex tic, tzcob' eyal e b'a 'a Dios, palta man̈ eyojcoc Dios cha. Aln̈ an̈ israel on̈ tic on̈, caw cojc qui Diosal 'aj tzcal qui b'a on̈. A 'a qui cal on̈, ata 'oj 'eltc jun Colwjum.

²³ 'Ay eb' a 'a qui Mam Dios tzyal sb'a wal 'a yel. Al ticnec, tox 'ix jaw stiempoal 'oj yal sb'a eb' 'a caw yel, 'a 'esal. Yujto a qui Mam Dios, tznib'ej to 'ixta tzyutj eb' yaln sb'a 'a 'a.

²⁴ A Dios Espíritu, yuj cha, toto 'ay mach tzyal sb'a 'a 'a, yowlal tzyal sb'a eb' wal 'a yel, 'a 'esal, xchi Jesús 'a 'ix.

²⁵ 'Ix yaln pax 'ix 'a 'ixtic: —Aln tic, wojtac 'ay jun Mesías sb'i, tzyal 'el'chi atn Cristo 'oj jawoc. A yic 'oj jawc jun cha, tojln̈ej 'oj yutc yaln smasnil tas, xchi 'ix 'a 'a.

²⁶ —An ton tic wan in paxtin 'aych tic, xchi Jesús 'a 'ix.

²⁷ Wal slajw yaln Jesús jun tzo'n̈ cha, 'ix c'ochx eb' scuywum. Caw 'ix sat sc'ojl eb' yilni, to wan spaxtin Jesús yet' jun 'ix cha. Palta may junc eb' 'ix c'anb'n 'a 'a, tas tznib'j tzc'anb'j 'a 'ix, tas yuj tzpaxtin yet' 'ix.

²⁸ Ax jun 'ix cha, 'ix yactn can sch'ub' 'a sti a cha. X'at yalnc 'ix 'a eb' 'anma 'ay 'a yol chon̈b' cha. 'Ix yaln 'ix 'a eb' 'ixtic:

²⁹ —'Ay jun winac, c'uxn yojtac tastc tzin b'o'o, yictax in cottch 'a yune'al. C'uxn xyal win 'ayn smasnil. Coyc wet'oc, 'at quilc nab'an. Tope laj to a jun Mesías, xchi 'ix 'a eb'.

³⁰ Yuj cha, 'ix 'elt eb' 'a yol chon̈b' cha. Xjaw eb' 'a 'aj 'ayc' Jesús.

³¹ Yic mantzac c'och eb', 'ix yaln eb' scuywum 'ixtc 'a 'a: —Mamin, wan̈ jab'oc, xchi eb'.

³² —'Ay wo'och, palta man̈ eyojcoc, xchi 'a eb'.

³³ Yuj cha, xlaj sc'anb'noc 'ec' eb' 'a scal: —¿Tom 'ay mach xwul 'a'noc yoch cha? xchi eb'.

³⁴ Palta xyaln pax 'ixtc 'a eb': —Caw tzin nib'j tzin b'o tas tznib'j jun checjnacn coti, masnto tzin laj smunljel ya'jnac 'ayin. A yic tzin b'on jun cha, 'icha to ata tzin wa'i.

³⁵ Ax tic, tzeyal 'ixtic: Chan̈e to 'uj sjaw stiempoal jach'oj, xe chi. Palta an tzwal 'ayex: 'Iltec, tox 'ix jaw stiempoal jach'oj. Palta wan waln yuj eb' tot 'oj in chani.

³⁶ 'Ay eb' 'e'nc xo munljoc 'a scal eb', 'icha junc 'awm 'in̈at. 'Ay pax eb' tzmunlj 'icha junc jach'm 'a scal eb', sec 'oj scha eb' 'anma chi sq'uinl 'a jun 'ejmn̈ej. Ax eb' tzmunlj cha, c'uxn 'oj scha eb' spac jun smunljel cha, sec wach' lajnn̈ej 'oj tzaljc eb' munljum chi smasnil.

³⁷ Yujto yel tzyal jun 'ab'x tic: 'Ay eb' 'awum. Chuc pax eb' jach'um, xchi.

³⁸ An tic, ex in checb't munljoc 'a scal eb' 'anma 'icha junc jach'um. Palta man̈oc ex ex b'ab'l munlj 'a scal eb'. Chuc eb' b'ab'l munljnac 'a scal eb' 'icha junc 'awum. Ax xo tic, 'icha to 'oj e jach' smunljel eb' cha, xchi Jesús 'a eb'.

³⁹ A 'a jun chon̈b' 'ay 'a yol yic Samaria cha, til wal eb' xya'ch sc'ojl 'a Jesús, yujto xyal jun 'ix chi 'ixtc 'a scal eb': C'uxn yojtac tastc tzin b'o'o, yictax in cottch 'a yune'al, 'ix yal 'ayn smasnil, xchi 'ix 'a eb'.

⁴⁰ Yuj cha, 'ix wul tewc 'och eb' 'a Jesús sec tz'och wan yet' eb'. Chab' c'u 'ix 'och wan yet' eb'.

⁴¹ Til to wal eb' xya'ch sc'ojl 'a 'a, yic xyab'n eb' tas 'ix yala.

⁴² Yuj cha, xyaln eb' 'a jun 'ix chi 'ixtic: —A 'a b'ab'el, 'ix ca'ch qui c'ojl 'a Jesús oj on̈, yuj tas 'ix al 'ayn̈ on̈. Ax ticnec, caw a Jesús 'ix aln 'ayn̈ on̈. Yuj cha, xqui wach' 'a'n 'och qui c'ojl 'a ticnec on̈. Caw cojc on̈, to a Jesús cha, caw yel qui Colmalec qui masnil 'a yolyib'n̈q'uinl tic, atn jun tan̈b'il sjaw cujec, xchi eb' 'a 'ix.

B'oxnc win yunnal win capitan̈

⁴³ Xlajwn̈ej chab' c'u cha, 'ix 'atx Jesús yic tz'at 'a Galilea.

⁴⁴ Yujto yaljnacx cani, chajtlto may yel'ch junc schecb' Dios 'a sat eb' yit chon̈ab'.

⁴⁵ Yic xc'och 'a Galilea cha, caw tzaljc'ojlal schaj eb' 'anma sc'och ta', yujto xit' yil eb' q'uin̈ 'a Jerusalén, atn snanb'il cot yel eb' israel 'a libre. Ata yiljnac eb', to til wal tas xit' sb'ojnac Jesús chi ta'.

⁴⁶ Ax Jesús 'ix c'ochx 'a chon̈b' Caná, 'a yol yic Galilea cha. Ata 'ec' ya'jnac 'och jun a yal uvail. Ax 'a chon̈b' Capernaum, ata 'ay jun win capitan̈ caw ya'ay jun yunnal.

⁴⁷ 'Ix yab'n winac, to 'ix cotx Jesús 'a Judea, 'ix c'ochx 'a Galilea cha. Yuj cha, x'at sc'umnoc winac. 'Ix tew 'och wal win 'a 'a, sec toq'ue tz'at Jesús yet' win 'a yatut, tz'at ya'n b'oxc sc'ojl jun yunnal win cha, yujto caw jab'xoj schami.

⁴⁸ Palta xyaln Jesús 'ixtc 'a winac: —Q'uinloc matz eyil jun tzo'n̈ milagro, jun tzo'n̈ tzch'oxn 'el in poder, toto 'ixta', matz eya'ch e c'ojl 'ayin, xchi 'a winac.

⁴⁹ Palta xyaln pax win capitan̈ chi 'ixtc 'a 'a: —Mamin, caw con̈ wet' muc'uc, ya' sb'a pitznto jun wunnal cha, xchi win 'a 'a.

⁵⁰ —Paxan̈, ma'oj cham jun onnal cha, xchi 'a winac. —'Ix ya'n 'och win sc'ojl 'a tas 'ix yal Jesús, yuj cha, 'ix pax winac.

⁵¹ Wan s'atx win 'a yol b'e, 'ix chan sb'a win yet' eb' smajn tzmunlj 'a 'a. 'Ix yaln eb' 'ixtc 'a winac: —Tox 'ix jaw sc'ojl jun onnal cha, xchi eb' 'a winac.

⁵² —¿Janc' wal jun 'ix b'ox sc'ojol? xchi winac. —At xo 'ew b'ox sc'ojol, a 'a yic 'a la una sicb' jun c'ac' chi 'a 'a, xchi eb' 'a winac.

⁵³ Yuj cha, 'ix snan cot winac, to 'ixta yorail xyal Jesús 'a win 'a yewial cha. Yic yaln 'ixtic: Ma'oj cham jun onnal cha, xchi 'a winac. Yuj cha, xya'n 'och win sc'ojl 'a Jesús, yet' jantcn̈ej eb' 'ay yet' 'a yol yatut cha.

⁵⁴ A jun tic, schab'l milagro 'ix sch'ox Jesús yic 'ix cot 'a Judea, 'ix c'ochx 'a Galilea.