Jn 20 - Chuj San Sebastian Bible

Pitzwnac pax Jesús

¹ Ax 'a yic domingo, 'ayt wal sacb'i, 'ix 'at María Magdalena 'a 'aj xmucx can 'och sniwnal Jesús cha. Ax yic xc'ochi, 'ix yilni 'elnc xo smac q'uen q'uen cha.

² Yuj cha, caw carela x'at 'ix. Ax 'a Simón Pedro xc'ochi. 'Ayc' pax junx scuywum Jesús, atn jun caw chamc'ojlb'il yu'uj. 'Ix yaln 'ix 'a eb' 'ixtic: —Caw 'ix 'ijx 'elt sniwnal Cajlilec 'a 'aj mucb'il can 'ochi. ¿'Ajm wal 'ix yij 'at ewinac? xchi 'ix 'a eb'.

³ Xlajwn̈ej yab'n Pedro chi yet' junx scuywum Jesús cha, 'ix 'at eb', x'at yilnc eb' 'a q'uen q'uen cha.

⁴ Caw carela x'at eb' schawn̈il. Ax Pedro jab'jnal 'ix cani. Yuj cha, a junx cuywum chi 'ix b'ab'l c'och muc'uc.

⁵ 'Ix 'och t'an̈n 'a yojl q'ue'en. 'Ix yilni cojxn jun tzo'n̈ te nip lan̈n can 'elta. Palta ma'ix 'och 'a yojol.

⁶ Ax Simón Pedro cha, tza'nto xc'och yu'uj. 'Ix 'och mu'c 'a yojl q'ue'en. 'Ix yilni lan̈n 'ec' jun tzo'n̈ te nip cha.

⁷ Yet' junx te b'ac'b'il 'och 'a sjolm Jesús cha, chulb'il can b'ec'an, najttac c'otn can coti.

⁸ Xlajw cha, 'ix 'och pax junx cuywum chi 'ix b'ab'l c'och cha. Yic 'ix yiln jun cha, 'ixta to b'i'an, 'ix ya'n 'och 'a sc'ojol.

⁹ At 'ijnoc wal ya'n 'och eb' 'a sc'ojl cha, to yel xpitzw pax Jesús. Yujto ma'ix nachj 'el yuj eb' tas tz'ib'b'il can 'a Ch'an̈ U'un̈, chajtlto yowlal 'oj pitzwc pax Jesús 'a scal eb' chamnac.

¹⁰ Xlajw cha, 'ix paxx can junjn eb' 'a yatut.

Sch'oxjnac sb'a Jesús 'a María Magdalena

¹¹ Ax María Magdalena, 'ix can 'ix 'a stz'ey jun q'uen cha. Ma'ix 'och 'ix 'a yojol. Wan yoc' 'ix, 'ix 'och t'an̈n 'ix 'a yojl q'ue'en.

¹² Ax xyilni, 'ay 'elt chawn̈ ángel 'a yojl q'ue'en. Caw sac spichl eb', wocn 'ejm eb' 'a 'aj 'ix 'ec' sniwnal Jesús, jun 'a sjolmtac, jun 'a yoctac.

¹³ 'Ix sc'anb'n 'elt eb' 'a 'ix 'ixtic: —Ach 'ix, ¿tas yuj tzach 'oq'ui? xchi 'elt eb'. —Yujto 'ix 'ijx 'el sniwnal Wajlil 'a tic. ¿'Ajm wal 'ix yij 'at eb'? xchi 'ix 'a eb'.

¹⁴ Wanto slajw yaln 'ix jun cha, 'ix sutmj 'at q'ueln 'ix 'a spatic. Ax xyiln 'ix, 'ayc' Jesús. Palta ma'ix yilch 'ix toto a'.

¹⁵ Yuj cha, sc'anb'n 'a 'ix 'ixtic: —Ach 'ix, ¿tas yuj tzach 'oq'ui? ¿Mach tza sayq'ui? xchi 'a 'ix. Palta snan 'ix, to a win tzmunlj 'a te 'awb'ente chi lin̈n 'ec' ta'. Yuj cha, xyaln 'ix 'ixtc 'a 'a: —Ach winac, toto ach xwul ec' 'elt sniwnal Jesús tic, al 'ayin, 'aj xit' a'cni, sec 'oj wi'ti, xchi 'ix 'a 'a.

¹⁶ —María, xchi Jesús chi 'a 'ix. —Yuj cha, 'ix sutmj 'at q'ueln 'ix 'a 'a. 'Ix paxtin 'ix 'a hebreo: —Raboni, xchi 'ix. Tzyal 'el'chi, ach in Cuymal.

¹⁷ —Man̈ in a yama', yujto mantzac in pax q'ue 'a 'aj 'ay in Mam. Palta 'ixic, 'at al 'a eb' wu'tac, yet' 'a eb' wanb' smasnil, chajtlto 'oj in pax q'ue 'a 'aj 'ay in Mam. A in Mam cha, e Mam pax wet'oc. A in Diosal, e Diosal pax wet'oc, xchi Jesús 'a 'ix.

¹⁸ Yuj cha, ax 'ix María Magdalena cha, x'at yaln 'ix 'ixtc 'a eb' scuywum Jesús cha: —Caw 'ix wil Cajlilec, xchi 'ix 'a eb'. 'Ix yaln pax 'ix 'a eb', tastc 'ix yal 'a 'ix.

Sch'oxjnac sb'a Jesús 'a eb' scuywum

¹⁹ An̈ja 'a jun domingo chi 'a sq'uic'b'alil, 'ix syam sb'a eb' scuywum Jesús. Caw sin̈n̈i xyutj eb' sch'apn jun n̈a cha, yujto tzxiw eb' 'a ewin 'aj Judea cha. Ax xyiln eb', 'ayx 'ec' Jesús 'a scal eb'. 'Ix yaln 'a eb' 'ixtic: —Junc'ojlal cab' eyaji, xchi 'a eb'.

²⁰ Xlajw cha, xch'oxn yol sc'ab' 'a eb', yet' scostil. Ax eb' scuywum cha, caw 'ix tzalj eb' yiln Cajlil cha.

²¹ 'Ix yaln pax jun 'ejm xo 'ixtc 'a eb': —Junc'ojlal cab' eyaji. 'Icha in yutj qui Mam Dios in schecn coti, 'ixta tzex wutj ex in checn can 'ati, xchi 'a eb'.

²² Xlajw yaln jun tzo'n̈ tic, 'ix yutz'n 'at yic' 'a yib'n̈ eb'. 'Ix yaln 'ixtic: —Chajec can Yespíritu Dios.

²³ Toto 'ay eb' tzeyac' niwnc'ojlal yuj smul, an̈jtona Dios 'oj yac' niwnc'ojlal 'a eb' jun xo. Toto 'ay eb' matz eyac' niwnc'ojlal yuj smul cha, 'oj cann̈j smul eb' chi 'a yib'an̈, xchi Jesús 'a eb'.

Yiljnac Tomás Cajlil

²⁴ Palta 'ay jun yitb'eym eb' scuywum Jesús, Tomás sb'i, tzcuch pax Tiyx 'anma'. Man̈ 'ayc 'ec' yet' eb' yic yec' Jesús chi ta'.

²⁵ Yuj cha, xyaln eb' yit cuywumal chi 'a 'ixtic: —An̈ tic on̈, 'ix quil Cajlilec chi on̈, xchi eb'. —'A... 'oj wila', toto tzwil 'aj x'och q'uen lawx 'a yol sc'ab', tzwa'n 'och yune in c'ab' 'a yolnil 'aj x'och q'uen cha, tzwa'n pax 'och in c'ab' 'a yolnil scostil, cojn 'ixta', 'oj stac' wa'n 'och 'a in c'ojol, to caw a Jesús cha, xchi 'a eb'.

²⁶ Yucb'ixial xo, 'ix syamn pax sb'a eb' jun 'ejm xo 'a yol n̈a cha. 'Ayx 'ec' Tomás chi yet' eb'. Caw sin̈n̈i yaj sch'apx te n̈a cha, palta ax xyiln eb', 'ayx 'ec' Jesús 'a scal eb'. 'Ix yaln 'a eb' 'ixtic: —Junc'ojlal cab' eyaji, xchi.

²⁷ Xlajwn̈ej cha, xyaln 'ixtc 'a Tomás: —'Ilt in c'ab' tic, 'a'ch yune a c'ab' 'a yolnil tic. Tza'n pax 'och a c'ab' 'a yolnil in costl tic. 'A'ch a c'ojl 'ayin, man̈x a chab'c'ojloc a b'a, xchi Jesús.

²⁸ Xlajw cha, xyaln pax Tomás chi 'a 'ixtic: —Ach ton tic Wajlil ach, in Diosal ach, xchi 'a 'a.

²⁹ —Tomás, xa'ch a c'ojl 'ayin, yujto in ela. Ax eb' matz in 'ilni, palta toto tzya'ch eb' sc'ojl 'ayin, yel xo wach' yic eb', xchi Jesús.

A yopiso ch'an̈ un̈ tic

³⁰ Til to wal milagro sch'ox Jesús 'a eb' scuywum cha, palta ma'ix tz'ib'x can smasnil 'a ch'an̈ un̈ tic.

³¹ 'Ix tz'ib'x can jun tzo'n̈ tic, sec 'oj eya'ch 'a e c'ojol, to a Jesús atn Cristo, Yunnal Dios. Toto 'oj eya'ch 'a e c'ojol, 'oj e cha e q'uinl 'a jun 'ejmn̈ej 'a 'a.