Jn 2 - Chuj San Sebastian Bible

A jun nupnel 'a chon̈b' Caná

¹ Schab'jil xo slajw jun cha, 'ix 'och jun nupnel 'a chon̈b' Caná 'a yol yic Galilea. Ax snun Jesús 'ix c'och ta'.

² 'Ix c'och pax Jesús yet' eb' scuywum, yujto 'awtb'il eb'.

³ Ax jun yal uva ma'ix 'e'ch 'a eb' 'anma cha. Yuj cha, xyaln snun Jesús 'a 'ixtic: —'Ix lajw jun yal uva tic, xchi.

⁴ —Nunin, ¿tas yuj a 'ayn tzala? Mantzac c'och stiempoal in ch'oxn 'el in poder 'a eb' 'anma', xchi Jesús.

⁵ Palta 'ix yaln snun chi 'ixtc 'a eb' tz'a'w servil cha: —Jantcn̈ej tas 'oj yal Jesús 'ayex, tze b'on̈ej, xchi 'a eb'.

⁶ Ata 'ayc' waque b'el yet'l a', 'ayam otcoc ch'ub' a tz'em 'a yojl jun jun. Ata tzq'uet a a tzc'an eb' yic tzb'icn 'el eb' jun tzo'n̈ tas, 'icha yaj sb'eyb'al eb' israel cha.

⁷ 'Ix yaln Jesús 'ixtc 'a eb' tz'a'w servil cha: —'A'c b'ut'joc jun tzo'n̈ yet'l a tic yet' a a', xchi 'a eb'. Ax yic xlajw sb'ut'ji,

⁸ 'ix yaln pax Jesús 'a eb' 'ixtic: —Al ticnec, lechc q'uet jab'oc, tzeya'n 'a win tz'a'n cuenta nupnel tic, xchi 'a eb'. Yuj cha, xya'n eb' 'a winac.

⁹ Ax yic xya'lni win yu'n jab' a cha, tox 'ix 'och yal uvail. Man̈ yojcoc winac, 'aj 'ix cot jun yal uva cha. Palta ax eb' tz'a'w servil cha, yojc eb', yujto a eb' 'ix lechn q'uet jun a cha. Ax win 'ix 'awtn cot jun win tznupn cha.

¹⁰ 'Ix yaln win 'a win 'ixtic: —A sley eb' 'anma', a jun yal uva wach', a tzyac' eb' 'u'xoc b'ab'el. Ax 'a slajub', a jun yal uva tzyal wal yu'xi, a tzyac' eb'. Palta ach tic, xa mol jun yal uva wach'. Ax ticnec wanto a'n 'elt 'u'xoc, xchi win tz'a'n cuenta cha.

¹¹ A jun milagro tic, sch'ox Jesús 'a chon̈b' Caná 'a yol yic Galilea. B'ab'l milagro jun chi 'ix sch'oxli. 'Ixta xyutj sch'oxni, to niwn spoder. Ax eb' scuywum, caw xya'ch eb' sc'ojl 'a 'a.

¹² Xlajw xoj cha, x'at Jesús 'a chon̈b' Capernaum. 'Ix 'at pax snun, eb' yu'tac, yet' pax eb' scuywum yet'oc, ata xcan eb' jaye c'u.

Eb' pechb'il 'elt 'a yatut Dios

¹³ Wan sjapx jun sq'uin̈ yic snanb'il cot yel eb' israel 'a libre. Yuj cha, 'ix c'och Jesús 'a Jerusalén.

¹⁴ 'Ix c'och 'a yamq'uil yatut Dios. 'Ix yilni, 'ay eb' tzchon̈w wacax. 'Ay eb' tzchon̈w calnelu. 'Ay eb' tzchon̈w parama. 'Ay pax eb' jelm tumn wocn 'ejm ta'.

¹⁵ Ax yic 'ix yilni, 'ix sb'on jun ch'an̈ stz'umoc. 'Ix spechn 'elt eb' smasnil 'a yamq'uil yatut Dios, yet' scalnelu, yet' swacax. 'Ix sma'n pax 'elt tzicnjoc stumn eb' jelm tumn 'a sat smexa. Sma'n telwc pax jun tzo'n̈ smexa eb'.

¹⁶ 'Ix yaln 'a eb' tzchon̈w parama 'ixtic: —¡'Ijec 'el jun tzo'n̈ noc' tic! A jun yatut in Mam tic, man̈ eya'ch plasil, xchi 'a eb'.

¹⁷ Ax eb' scuywum, 'ix snan cot eb' tas tzyal 'a Ch'an̈ U'un̈, 'a 'aj tzyal 'ixtic: Caw pitz'n 'och 'a in c'ojl in ya'iln atut, xchi.

¹⁸ Ax ewin 'aj Judea chi 'ix aln 'ixtc 'a 'a: —¿Tas junc milagro tza ch'ox 'ayn̈ on̈, sec cojc on̈ to 'ay aln ec a b'on jun tzo'n̈ tic? xchi ewinac.

¹⁹ Yuj cha, xyaln 'ixtc 'a ewinac: —Toto tze mac' lan̈chjoc jun yatut Dios tic, ax 'a yoxl c'u, ax sb'ox can wuj jun 'ejm xo, xchi 'a ewinac.

²⁰ Yuj cha, xyaln pax ewin 'aj Judea chi 'ixtc 'a 'a: —A jun yatut Dios tic, 46 ab'il ya'jnac eb' yet'oc sb'o yuj eb'. Ach xo tic, ¿tom 'oj b'o oj 'a 'oxe c'u cha? xchi ewin 'a 'a.

²¹ A jun caw yatut Dios 'ix yal snan ewinac. Ticni a sniwnal 'ix yala.

²² Yuj cha, a yic 'ix pitzw pax 'a scal eb' chamnac, 'ixta to b'i'an, 'ix snan cot eb' scuywum tas 'ix yala. Yujto at wal ta 'ix ya'ch eb' 'a sc'ojol, yuj tas tz'ib'b'il can 'a Ch'an̈ U'un̈, yet' 'a tas yaljnac can Jesús 'a eb'.

A Jesús yojc snab'en junjn 'anma'

²³ A yic 'ayc' Jesús 'a Jerusalén yuj jun q'uin̈ cha, til wal eb' xya'ch sc'ojl 'a 'a, yujto xyil eb' jun tzo'n̈ milagro 'ix ch'oxo.

²⁴ Palta ma'ix ya'ch Jesús yipc sc'ojl eb', yujto yojc xon snab'en smasnil 'anma'.

²⁵ Man̈ yowlalc tzat alx 'a 'a, tas snab'en junc mach. Toxn yojtac tas 'ay 'a qui nab'en junjn on̈.