Jn 14 - Chuj San Sebastian Bible

Yuj Jesús tztac' qui c'ochc 'a Dios

¹ 'Ix yaln Jesús 'a eb' scuywum 'ixtic: —Man̈ eyac' somchjc 'el e nab'en. 'A'c 'och e c'ojl 'a Dios, tzeya'n pax 'och e c'ojl 'ayin.

² A 'a yatut in Mam, til wal lugar 'aj wach' tzon̈ 'ajc cajan. Q'uinloc may tas, tox am 'ix wal 'ayex. A ticnec, to 'oj 'at in b'o eyet'l 'aj 'oj e c'ochi.

³ 'Oj lajwc in b'on can eyet'l chi ta', ax in japx jun 'ejm xo. Ax wul ex wi'nc wet'oc, sec wach' a 'aj 'ayn 'ec' cha, ata 'oj eyaj wet'oc.

⁴ Ax tic, eyojc xoni, 'aj 'oj in c'ochi. Eyojc pax jun b'e 'aj 'oj in 'ati, xchi 'a eb'.

⁵ Ax Tomás 'ix aln 'ixtc 'a 'a: —Palta Mamin, man̈ cojcoc on̈, 'aj 'oj a c'och cha. Yuj cha, ¿tas 'oj cutc cojcan 'el jun b'e chi 'on̈? xchi.

⁶ —A jun b'e tzwal tic, an ton tic. Cojn in tztac' ex wi'n 'at 'a 'aj 'ay qui Mam Dios. An tic yel in, 'aj q'uinl in.

⁷ Octom tzin eyojquej 'eli. To 'ixta', 'oj eyojcoc 'el in Mam. Al ticnec, eyojc xo in Mam cha, yujto tox xeyila, xchi.

⁸ Ax Felipe 'ix aln 'ixtc 'a 'a: —Mamin, ch'ox quil a Mam chi 'on̈, colb'iln̈ej cab' cha, xchi.

⁹ Yuj cha, 'ix yaln pax Jesús 'a 'ixtic: —Felipe, 'in niwn xo tiempo 'ayn 'ec' eyet'oc. ¿Tom mant in ojcoc, mach in? A eb' tzin 'ilni, tzyal 'el'chi wan yiln eb' qui Mam Dios. Yuj cha, ¿tas yuj tzat al 'ayin: Ch'ox quil a Mam chi 'on̈, xa chi?

¹⁰ ¿Tom matz a'ch 'a a c'ojol, to 'ayn 'och 'a qui Mam Dios, 'aych pax 'ayin? A tas tzwala, man̈ munoc tzwal in ch'ocoj. Palta a qui Mam Dios 'aych 'ayin, a wan smunlj wet'oc.

¹¹ 'A'c 'och 'a e c'ojol, chajtlto 'ayn 'och 'a qui Mam Dios, 'aych pax 'ayin. Toto matz in eya'ch 'a e c'ojl yuj tas tzwala, 'a'c 'och e c'ojl 'ayn yuj jun tzo'n̈ milagro tzin ch'oxo.

¹² Wal yel tzwal 'ayex, a eb' tzin 'a'n 'och 'a sc'ojol, 'oj sb'o eb' jun tzo'n̈ tas tzin b'o'o. 'Ay jun tzo'n̈ xo tas 'ec'b'al 'a yib'n̈ jun tzo'n̈ tic 'oj b'o yuj eb', yujto 'oj in pax 'a 'aj 'ay qui Mam Dios.

¹³ Tzann̈j tas 'oj e c'an 'a Dios 'a in b'i, 'oj in b'o 'ayex. 'Ixta 'oj in b'o an Yunnaln Dios tic, sec wach' 'oj checljc 'el wu'uj, to caw niwn yel'ch qui Mam Dios.

¹⁴ Tzann̈j tas 'oj e c'an 'a Dios 'a in b'i, 'oj in b'o 'ayex.

Yaljnac Jesús yuj Yespíritu Dios

¹⁵ Toto tzin e chamc'ojlej, yicljec jun tzo'n̈ in checnb'il.

¹⁶ An tic, 'oj in c'an 'a qui Mam Dios, ax 'oj checnc cot junx 'oj colwjoc eyet'oc, atn Yespíritu caw yel. A 'oj can eyet' 'a jun 'ejmn̈ej.

¹⁷ A eb' yic xon yolyib'n̈q'uinl tic, ma'oj stac' schan eb' jun tic, yujto matz tac' yiln eb', man̈ yojcoc eb'. Ax xo tic, eyojc xo Yespíritu tic, yujto 'ayc' xon eyet'oc. A 'oj 'ochcn 'ayx 'a jun 'ejmn̈ej.

¹⁸ An tic, ma'oj ex wactc can e ch'ocoj, 'oj in japx eyet' jun 'ejm xo.

¹⁹ Jab'xoj wal tiempo, 'ixta to b'i'an, man̈x b'a'n̈ 'oj in yil eb' 'anma'. Ax xo tic, 'oj in eyila'. Yujto pitzn in 'a jun 'ejmn̈ej, yuj cha, pitzn ex pax 'a jun 'ejmn̈ej jun xo.

²⁰ A 'a jun c'u yic 'oj 'ochcn Espíritu 'ayex, atta 'oj nachjoc 'el eyu'uj, chajtlto 'ayn 'och 'a qui Mam Dios, 'aych pax 'ayin. Ax snachj pax 'el eyu'uj, chajtlto 'ayx 'och 'ayin, 'ayn pax 'och 'ayex.

²¹ A eb' 'aych snab'en 'a jun tzo'n̈ in checnb'il, tzyiclni paxi, atn eb' chi 'ay schamc'ojlal 'ayin. A eb' 'ay schamc'ojlal 'ayin, ax in Mam 'oj chamc'ojlanc eb'. An̈jtona 'in, 'oj in chamc'ojloc pax eb'. Ax in ch'oxn in b'a 'a eb' 'a 'esal, schi Jesús 'a eb'.

²² 'Ay junx Judas sb'i, palta man̈oc Judas 'aj Queriot, a 'ix aln 'ixtc 'a Jesús: —Mamin, ¿tas yuj cojn 'ayn̈ on̈, an̈jta 'oj a ch'ox a b'a? ¿Tas yuj ma'oj a ch'ox a b'a 'a eb' yic yolyib'n̈q'uinl tic? xchi 'a Jesús.

²³ Yuj cha, 'ix yaln pax 'a 'ixtic: —A eb' 'ay schamc'ojlal 'ayin, tzyiclni eb' tas tzwala. Yuj cha, ax in Mam, tzchamc'ojlan pax eb', ax woch cajn yet' in Mam chi 'a eb'.

²⁴ Ax eb' matz in chamc'ojlani, matz yiclj xon eb' tas tzwala. A jun tzo'n̈ paxti tzwal 'ayx tic, man̈ wico'oc, yic qui Mam Dios, atn jun checjnacn coti.

²⁵ Tzwalcn jun tzo'n̈ tic 'ayex, ya' sb'a 'aynto 'ec' eyet'oc.

²⁶ A qui Mam Dios 'oj checnc cot Yespíritu 'ayx in jeloc. A 'oj colwjoc eyet'oc. 'Oj ex scuy 'a smasnil tas. 'Oj yac' e na cot jantcn̈ej tas waljnacx 'ayex.

²⁷ A ticnec, tzwa'cn junc'ojlal 'a e pixan. Atn wal in junc'ojlal tic tzwa'cn 'ayex. Man̈ 'icha'oc jac junc'ojlal tz'ilchj 'a yolyib'n̈q'uinl tic, man̈ 'ixta'oc wic tic tzwa'cn 'ayex. Man̈ eyac' somchjoc 'el e nab'en, man̈ ex xiwoc.

²⁸ Tox 'ix wal eyab'i', to 'oj in paxi, palta 'oj in japxi, ax in can eyet'oc. Toto yel tzin e chamc'ojlej, toto 'ixta', tzex tzalji, yic 'oj eyab'ni, to 'oj in pax 'a qui Mam Dios. Yujto caw 'ec'b'al xo yel'ch 'a wib'an̈.

²⁹ 'Aycto, tzwaln can jun tzo'n̈ tic 'ayex, sec wach' a yic 'oj jawc 'icha tzwal tic, ax in e wach' 'a'n 'och 'a e c'ojol.

³⁰ Man̈x niwnoc tas 'oj wal 'ayex, yujto wan sjaw win syajlil yolyib'n̈q'uinl tic. A win cha, may yaln win yic 'ayin.

³¹ Palta 'ixta 'oj 'ajoc, sec 'oj yojcoc 'el eb' 'anma smasnil, to 'ay in chamc'ojlal 'a qui Mam Dios, tzin yiclni smasnil schecnb'il tzyac' 'ayin. Al ticnec jun, q'uen̈ec lin̈an, coyec, xchi Jesús 'a eb'.