Jn 13 - Chuj San Sebastian Bible

Sb'icjnac Jesús yoc eb' scuywum

¹ Q'ui'noc xoj yoch q'uin̈ yic snanb'il cot yel eb' israel 'a libre. Ax Jesús, yojtac to tox 'ix jaw stiempoal yactc can jun yolyib'n̈q'uinl tic, ax spax q'ue 'a qui Mam Dios. A eb' yic 'ayc' 'a yolyib'n̈q'uinl tic, caw chamc'ojlb'il eb' yu'uj. A ticnec 'oj sch'oxo', jantc schamc'ojlal 'a eb'.

^2-4 Ax win Judas, yunnal Simón 'aj Queriot, tox 'ix 'och win diablo 'a spixn winac, sec a win tz'a'n 'och Jesús 'a yol sc'ab' chamel. Palta yojc Jesús to a 'a Dios cotnac, ata 'oj paxx q'ue'i. Yojtac a qui Mam Dios 'a'jnac smasnil tas 'a yol sc'ab'. Ax yic wan swa yet' eb' scuywum, 'ix q'ue lin̈an. 'Ix yi'n 'el jun spotil, sb'a'n 'och jun toaya 'a snan̈al.

⁵ Xlajw cha, 'ix stob'n 'ejm a 'a yol jun palagan. 'Ix syamn 'och sb'icn 'el yoc eb' scuywum cha. Ax jun toaya chi 'aych 'a snan̈l cha, a xyac' sucn tacjoc yoc eb' cha.

⁶ Ax yic wan 'ijn sb'icn 'el yoc Simón Pedro, 'ix yaln Pedro chi 'a 'ixtic: —Mamin, ¿tom 'ijn tza b'icl woc tic tza na'a? xchi.

⁷ —Mantzac nachj 'el o'oj, tas wan in b'oni. Palta c'ojnc'ojnilt 'oj nachjc 'el o'oj, xchi Jesús 'a 'a.

⁸ —Palta may xon b'a'n̈ 'oj wac' a b'icl woc tic, xchi Pedro cha. —Toto matz ac' in b'icl jun, to 'ixta', toxn may aln ec wet'oc, xchi Jesús 'a 'a.

⁹ —Toto 'ixta jun Mamin, man̈ cojnoc woc tic tza b'icli. Tza b'icl pax in c'ab' tic yet' in jolom, xchi Pedro chi 'a 'a.

¹⁰ Palta xyaln pax Jesús 'ixtic: —Q'uinloc 'ay junc mach tot 'ix 'achni, man̈x yowlalc tzb'icx sniwnal smasnil. Cojxn yoc tzb'icxi, yujto mant 'a slumal sniwnal cha. Ax tic, 'icha junc tz'achn cha, 'ixta xo eyaji, yujto tox 'ix b'o e nab'en. Palta man̈ e masnilc xb'o e nab'en, xchi Jesús.

¹¹ Yojc xoni, mach jun 'oj 'a'nc 'och 'a yol sc'ab' chamel. Yuj cha, xyaln 'ixtic: Man̈ e masnilc xb'o e nab'en, xchi.

¹² Xlajw xoj sb'icn 'el yoc eb' cha, 'ix ya'n pax 'och jun spotl cha. 'Ix 'emx wocn yet' eb'. 'Ix yaln pax 'a eb' 'ixtic: —¿Tznachj am 'el eyu'uj, tas yuj 'ixtc tzex wutej?

¹³ An tic, tzin eyal e Cuymaloc, Eyajliloc. Yel ton tzeyala.

¹⁴ Cuywjum in ton 'ayex. Yajl in ton pax 'ayex. Palta 'in xin b'icl eyoc tic. Yuj cha, smoj 'ixta tzlaj eyutc e b'a jun xo.

¹⁵ Xin ch'ox jun tic 'ayex, sec wach' 'icha tzex wutj tic, 'ixta 'oj eyutc e b'a 'ayx jun xo.

¹⁶ Wal yel tzwal 'ayex, may junc moso 'ec'b'al yel'ch 'a yib'n̈ spatron̈. 'Ixta pax eb' checab', may junc eb' 'ec'b'al 'a yib'n̈ jun tzchecn eb' cha.

¹⁷ Toto tznachj 'el jun tzo'n̈ tic eyu'uj, tzeyiclni, caw wach' eyico'.

¹⁸ —Matz wal eyuj e masnil, yujto wojtac, machx sic'b'ilx xo 'el wu'uj. Palta yowlal 'oj 'el'choc tas tz'ib'b'il can 'a Ch'an̈ U'un̈, 'a 'aj tzyal 'ixtic: A jun in wach'c'ojl to junn̈j tzin wa yet'oc, 'ix meltzj 'och 'ajc'ojlal 'ayin, xchi.

¹⁹ 'Aycto tzwaln can jun tzo'n̈ tic 'ayex, sec wach' a yic 'oj jawc jun chi 'a wib'an̈, ax e wach' 'a'n 'och e c'ojl 'ayin, to an ton Cristo in.

²⁰ Wal yel tzwal 'ayex, a mach tzchan eb' in checab', tzyal 'el'chi, an tzin schaj eb'. A eb' tzin chan cha, tzchaj pax eb' jun checjnacn coti, xchi Jesús.

Yaljnac Jesús yuj mach 'oj yamnoc

²¹ Xlajw xoj yaln Jesús jun tzo'n̈ tic, 'ix 'och pitz'n cusc'ojlal 'a spixan. 'Ix yaln 'ixtic: —Wal yel tzwal 'ayex, a 'a e cal tic, ata 'ay jun 'oj wa'n 'och 'a yol sc'ab' chamel, xchi 'a eb'.

²² Ax eb' scuywum cha, 'ix laj yil-lanc 'och sb'a eb', yujto man̈ yojcoc eb' mach junc tzyal cha.

²³ 'Ay jun caw chamc'ojlb'il yu'uj, wocn 'ejm 'a smo'och, yic wan swa eb'.

²⁴ Ax Simón Pedro 'ix yac' jab' senya 'a 'a, sec toq'ue tzc'anb'j 'a Jesús cha, mach junc tzyala.

²⁵ Yuj cha, 'ix swach' nitzn 'ochch sb'a 'a stz'ey. 'Ix sc'anb'n 'a 'ixtic: —Mamin, ¿machm laj jun chi tzal ticnec? xchi.

²⁶ 'Ix yaln Jesús chi 'ixtc 'a 'a: —'Oj in lab'c 'ejm jab' pan tic 'a scal vinagre tic, ax mach 'aj 'oj wac'a', atn jun cha, xchi. —Xlajwn̈ej yaln Jesús jun cha, 'ix slab'n 'ejm jab' pan chi 'a scal jun vinagre cha, 'ix ya'n 'a win Judas, win yunnal Simón 'aj Queriot.

²⁷ Xlajwn̈ej schan win jab' pan cha, 'ix wach' 'och win Satanás 'a winac. Ax Jesús, 'ix yaln 'ixtc 'a winac: —A tas tza nalb'ej a b'oni, tzaln̈ej tza b'on muc'uc, xchi 'a winac.

²⁸ Ax eb' 'aych yet' 'a te mexa cha, may junc eb' xnachj 'el yu'uj, tas yuj 'ixta xyal 'a winac.

²⁹ A win Judas cha, molm tumn yaj win 'a eb'. Yuj cha, 'ay eb' xcob' nanoc, to tzyal Jesús 'a win yuj tas tz'at sman win yuj jun q'uin̈ cha, mto a jac tumn chi tz'at yac' win 'a eb' meb'a snan eb'.

³⁰ Xlajwn̈ej swan win Judas jab' pan cha, 'ix yi'n 'el sb'a 'a scal eb', caw sq'uic'b'alil xo.

Yaljnac Jesús jun 'ac' checnb'il

³¹ Xlajw xoj yi'n 'el sb'a win Judas cha, 'ix yaln pax Jesús 'ixtic: —A ticnec, 'oj checljoc 'eli to caw niwn wel'ch an 'Ochnc in 'Anmal tic. Ax in ch'oxn pax 'eli, chajtlto caw niwn yel'ch Dios.

³² Toto tzin ch'oxo to niwn yel'ch Dios, an̈jtona 'oj sch'oxl paxi, to niwn pax wel'chi. Yajn̈ej ax sch'oxn 'eli, to niwn wel'chi.

³³ Ex chamc'ojlb'il wu'uj, jab'xoj wal tiempo 'ayn 'ec' eyet'oc. 'Oj in e sayq'ui, palta mant 'oj stac' e c'och 'a 'aj 'oj in c'och cha, 'icha wutjnac waln 'a eb' 'aj Judea.

³⁴ 'Ay junx 'ac' checnb'il 'oj walcn 'ayx ticnec: To tzlaj e chamc'ojloc e b'a junjn ex. 'Icha tzex wutj ex in chamc'ojlani, 'ixta tzlaj eyutc e chamc'ojlan e b'a jun xo.

³⁵ Toto tzlaj e chamc'ojloc e b'a junjn ex, 'oj yojcoc 'el eb' 'anma smasnil, to yel in cuywum ex, xchi Jesús 'a eb'.

Yaljnac Jesús to tzyij 'el Pedro 'a yib'an̈

³⁶ Ax Simón Pedro 'ix c'anb'n 'ixtc 'a 'a: —Mamin, ¿'aj wal til 'oj a c'och jun? xchi. —A 'aj 'oj in c'ochi, mant 'oj stac' e c'och wet'oc. C'ojnc'ojnilt 'oj e c'och pax wet' ta', xchi Jesús 'a 'a.

³⁷ —Palta Mamin, ¿tas yuj matz tac' in 'at et' mu'c ticnec jun? Caw lista waj wa'n cham in b'a o'oj, xchi cob' Pedro chi 'a 'a.

³⁸ —'A... ¿tom yel lista aj a'n cham a b'a wu'uj? Wal yel tzwal 'ayach, a yic mantzac 'oc' no 'ajtzo 'a jun 'ac'wl tic, 'ox 'ejm 'oj e'l 'a eb'an̈, chajtlto man̈ in ojcoc, xchi Jesús 'a 'a.