Jn 12 - Chuj San Sebastian Bible

Sucb'il 'och su'q'ui sjab' 'a Jesús

¹ Ob'xoc to yoch q'uin̈ 'a Jerusalén, atn q'uin̈ yic snanb'il cot yel eb' israel 'a libre, 'ix c'ochx Jesús 'a Betania. Ata 'ay yatut Lázaro, win pitzwnac pax yu'uj.

² Yic 'ix c'och Jesús ta', 'ix ya'n eb' jun niwn wal yet'oc. 'Ix wa pax Lázaro yet' eb'. Ax 'ix Marta, a 'ix x'a'n servil eb'.

³ Ax 'ix María yet' 'ix mel-l litro yal su'q'ui sjab', nardo sb'i. A jun cha, caw chan̈ stojol. 'Ix c'och 'ix 'a Jesús. 'Ix stob'n 'och 'ix 'a yoc. Xlajwn̈ej cha, 'ix sucn tacj 'ix yet' xil sjolom. Caw c'uxn 'ix pucb't sjab' 'a yol jun n̈a cha.

⁴ 'Ay jun scuywum Jesús Judas sb'i, yunnal Simón 'aj Queriot. Atn win 'oj 'a'nc 'och Jesús 'a yol sc'ab' chamel. 'Ix yaln win 'ixtic:

⁵ —A jun yal su'q'ui sjab' tic, 'aym 'oxe'oc ciente c'ul munljelal stojol. Octom xqui chon̈ec, xca'nec stojl 'a eb' meb'a', xchi cob' winac.

⁶ Palta yes winac. Matz na win jac eb' meb'a cha, yujto a win molm tumn yaji. Yuj cha, a win tzcob' nib'nc molnc stojl cha, sec tzyij can 'el win jac yic 'a 'a, yujto toxn 'elc'm xon winac.

⁷ Ax Jesús, a 'ix aln 'ixtc 'a winac: —'Actj a tzuntzn 'ix, yujto a jun yal su'q'ui sjab' tic, molb'il yuj 'ix. 'Aycto xya'n 'och 'ix 'ayin, sec lista xo waji ax in mucxi.

⁸ A eb' meb'a' 'ayc'n̈ej eb' eyet'oc. An xo tic, man̈toc 'aynn̈ej 'ec' eyet'oc, xchi 'a winac.

A eb' tznib'j milnc Lázaro

⁹ Til wal eb' israel 'ix 'ab'ni to 'ayc' Jesús 'a Betania. Yuj cha, x'at yilnc eb'. Man̈ cojnoc Jesús chi tznib'j eb' yila'. Tznib'j pax eb' yil Lázaro, yujto 'ix 'ajx pitzwc pax 'a scal eb' chamnc yu'uj.

^10-11 Yuj Lázaro cha, til wal eb' israel 'ix ya'ch sc'ojl 'a Jesús. Man̈xtzac ya'ch eb' snab'en 'a eb' ya'mal 'och sti eb' 'a Dios. Yuj cha, 'ix slajtin sb'a eb' sat ya'mal 'och sti eb' 'anma cha, snib'n eb' smil cham Lázaro cha.

C'ochnc Jesús 'a Jerusalén

¹² Til wal 'anma 'ix c'och 'a Jerusalén yuj q'uin̈ yic snanb'il cot yel eb' israel 'a libre. Ax 'a junx c'u, 'ix yab'n eb' to wan sc'och Jesús ta'.

¹³ Yuj cha, til wal eb' xtzu'n 'emt xil te q'uib'. 'Ix yi'n 'at eb' x'at schanc eb' Jesús. 'Ix laj yalnc chan̈ eb' 'ixtic: —Yuj wal dios. Calc wach' paxti 'a jun checb'il cot yuj Cajlilec. Calc wach' paxti 'a qui Reyl an̈ israel on̈c tic, xchi eb'.

¹⁴ Ax Jesús, 'ix 'ilchj jun no b'uru yu'uj. 'Ix q'ue 'a yib'n̈ no 'icha yaj stz'ib'x 'a Ch'an̈ U'un̈, 'a 'aj tzyal 'ixtic:

¹⁵ Ex 'aj chon̈b' Sión, man̈ ex xiwoc. 'Iltec wal sjaw e reyl 'ayex. 'Ay q'ue 'a yib'n̈ jun no quelm b'uru, xchi 'a Ch'an̈.

¹⁶ A 'a jun c'u cha, ma'ix nachj 'el jun tzo'n̈ tic yuj eb' scuywum Jesús. At yic tox 'ix 'ijx pax q'ue Jesús chi 'a satcha'an̈, atta 'ix sna cot eb', to a yab'xil Jesús tz'ib'b'il can 'a Ch'an̈ Un̈ cha, caw 'ix 'el'ch 'icha yaj yalx cani.

¹⁷ A jun tzo'n̈ eb' 'ayc' yet' Jesús, yic yawtn 'elt Lázaro 'a 'aj mucb'il 'ochi, yic xpitzw paxi, 'ix laj yalnc 'el eb' tas yiljnac eb'.

¹⁸ Yuj cha, 'ix 'at eb' 'anma 'at scha Jesús, yujto xlaj yab' eb' yab'xil jun milagro chi 'ix sb'o'o.

¹⁹ Ax ewin fariseo, 'ix laj yalnc ewin 'ixtic: —Man̈x 'a tas tztac' qui b'onec ticnec. 'Iltec eb' 'anma', c'uxn tzlaj 'och eb' yet' winac, xchi ewinac.

Eb' griego tznib'j 'ilnc Jesús

²⁰ 'Ay jun tzo'n̈ eb' griego 'ix c'och 'a jun q'uin̈ cha, yic tzyaln sb'a eb' 'a Dios.

²¹ A eb' cha, 'ix c'och eb' 'a Felipe 'aj Betsaida 'a yol yic Galilea. 'Ix yaln eb' 'a 'ixtic: —Ach winac, tzqui nib'j tzquil Jesús on̈, xchi eb'.

²² Yuj cha, 'ix 'at Felipe chi 'at yal 'a Andrés. 'Ixta to b'i'an, 'ix yi'n 'at sb'a eb' schawn̈il 'at yal 'a Jesús.

²³ Ax Jesús cha, 'ix yaln 'ixtc 'a eb'. —An tic, 'Ochnc in 'Anma'il, a ticnec, wan sjaw yorail scheclj 'eli, chajtlto caw niwn wel'chi.

²⁴ Wal yel tzwal 'ayex, q'uinloc 'ay junc 'in̈t trigo tzcan 'a yib'n̈ lu'um. Ton̈j tzcann̈j 'ixta'. Toto tzmucxi, 'icha to tzchami, palta a yic tzpaq'ui, caw niwn sat tzyac'a.

²⁵ A eb' an̈j wal sq'uinl 'ay yel'ch 'a 'a, 'oj lajwc can 'ec' sq'uinl eb' cha. A pax eb' may yel'ch sq'uinl 'a yolyib'n̈q'uinl tic 'a 'a, atn wal eb' chi 'oj scha sq'uinl 'a jun 'ejmn̈ej.

²⁶ Toto 'ay mach tznib'j tzin 'a'n servil, yowlal tzb'eylb'ej in b'eyb'al tic. A eb' tzin 'a'n servil cha, 'oj 'aj eb' wet' 'a 'aj 'ayn 'eq'ui. Toto 'ay eb' tzin 'a'n servil, ax in Mam 'oj 'a'nc spac 'a eb', caw niwn yel'ch 'oj 'aj 'a sat.

²⁷ A ticnec, caw tz'och pitz'n cusc'ojlal 'a in pixan. ¿Palta tas 'oj wutc walni? ¿Tom 'oj wal 'ixtc 'a Dios: Mamin, coln 'elt 'a yol sc'ab' jun yailal 'oj jawc 'a wib'n̈ tic, tom 'oj in chioc? Palta yuj wal jun tic 'ayn cot yu'uj.

²⁸ Mamin, checlj cab' 'eli, chajtlto caw niwn el'chi, xchi Jesús. Xlajw cha, 'ix yab'n eb' yoch jun paxti 'a satcha'an̈, 'ix yaln 'ixtic: —Tox xin ch'oxo chajtlto niwn wel'chi. Al ticnec, 'oj in ch'ox pax jun 'ejm xo, xchi.

Yaljnac Jesús yuj schamlil

²⁹ Ax eb' 'anma 'ayc' ta', 'ix yab'n eb' jun cha. Yuj cha, 'ay eb' 'ix aln 'ixtic: Tecn to a c'u tzc'an̈i, xchi jaywn̈ eb'. 'Ay pax eb' 'ix alni: —Tecn ángel jun tz'awj 'emt 'a Jesús tic, xchi eb'.

³⁰ Yuj cha, 'ix yaln Jesús 'ixtc 'a eb': —Man̈ wujoc 'ix alx 'emt jun tzo'n̈ tic, palta eyu'uj.

³¹ A ticnec, a eb' 'ay 'a yolyib'n̈q'uinl tic 'oj b'eyc'ojlaxc eb'. Ax win tz'a'n yajlil 'a yolyib'n̈q'uinl tic, 'oj can 'a yaln̈ wu'uj.

³² Aln tic, a yic 'oj wajx q'ue'i, 'oj wi' cot smasnil 'anma 'ayin, xchi Jesús.

³³ 'Ixta xyutj yalni, chajtlto 'ixta 'oj 'aj schami.

³⁴ Ax eb' 'anma', 'ix yaln eb' 'ixtc 'a 'a: —A 'a ch'an̈ ley 'aycn 'ayn̈ec, ata xcab' on̈, chajtlto a Cristo 'ayc'n̈ej 'a smasnil tiempo. Yuj cha, ¿tas yuj tzala, to a jun 'Ochnc 'Anma'il, yowlal 'oj 'ajxc q'ue'i? ¿Mach jun 'Ochnc 'Anmal tzal cha? xchi eb' 'a 'a.

³⁵ Yuj cha, xyaln pax 'a eb' 'ixtic: —An tzwac' sacq'uinl 'a e pixan, 'ayn 'ec' 'a e cal ticnec, palta jab'xoj wal tiempo 'ayn 'eq'ui. Caw tze b'o e b'eyb'al, ya' sb'a 'aynto 'ec' jacx eyet'oc. Toto ma'ay, 'oj somchjc 'el e nab'en. 'Icha junc mach tzb'eyc' 'a q'uic'q'uinal, matz uj yiln 'aj tz'ati, 'ixta 'oj eyaji.

³⁶ An tic, 'aj sacq'uinl in, yuj cha, 'a'c 'och e c'ojl 'ayin, ya' sb'a 'aynto 'ec' eyet'oc, sec 'oj wac' sacq'uinl 'a e pixn 'a jun 'ejmn̈ej, xchi Jesús 'a eb'. Xlajw xoj yaln jun tzo'n̈ tic, 'ix yi'n 'el sb'a. Sc'ub'n 'el sb'a 'a eb'.

May wal eb' israel*r* ya'jnac 'och sc'ojl 'a Jesús

³⁷ Wach'xam til wal milagro sch'oxjnac Jesús 'a eb' israel, palta may wal eb' 'ix ya'ch sc'ojl 'a 'a.

³⁸ 'Ixta x'aj 'el'ch tas yaljnac can win Isaías, atn jun schecb' Dios, yic yaln can 'ixtic: Ach Cajlil, ¿toc 'ay mach xchan 'ab'nc tas 'ix calcn 'el on̈? ¿Tom 'ay mach x'ojcan 'el a poder ch'oxb'il o'oj? xchi Isaías chi 'a Ch'an̈ U'un̈.

³⁹ Yuj cha, ma'ix stac' ya'n 'och eb' 'a sc'ojol. Ya'jnac Dios yal-l Isaías junx tic 'ixtic:

⁴⁰ 'Icha to tzin mac sat eb', tzin wach' 'a'n pitb'oc 'eb', sec wach', 'icha to matz yil eb', matz nachj 'el yuj eb', sec man̈xtzac sjel xon eb' jac snab'en. Yuj cha, ma'oj wac' lajwc smul eb', xchi Dios, xchi can Isaías cha.

⁴¹ Yaljnac can Isaías jun tzo'n̈ tic, yujto yiljnac swach'l Jesús. Yuj cha, atn yab'xil tic yaljnac.

⁴² Wach'xam yaljnac can 'ixta', palta 'ay eb' israel 'ix ya'ch sc'ojl 'a Jesús cha. An̈jtona eb' yajal, niwn eb' 'ix ya'ch 'a sc'ojol. Palta matz ch'oxl sb'a eb', yujto tzxiw eb' yuj ewin fariseo, toq'ue tzpech 'elt ewin eb' 'a yol scapiya.

⁴³ 'Ixta xyutj sb'a eb', yujto ton̈j tznib'j eb' an̈j 'a sat 'anma 'ay yel'ch eb'. Matz na eb', toto 'ay yel'ch eb' 'a sat Dios.

Yuj Jesús ax sb'eyc'ojlax eb' 'anma'

⁴⁴ Ax Jesús, caw 'ip xyal 'elt 'ixtc 'a scal eb' 'anma': —A eb' tzya'ch sc'ojl 'ayin, man̈ocn̈ej 'ayn tzya'ch eb' sc'ojol, tzya'ch pax eb' sc'ojl 'a in Mam checjnacn coti.

⁴⁵ A eb' tzin 'ilni, wan yiln pax eb' jun mach checjnacn coti.

⁴⁶ An tic, in jaw wul wac' sacq'uinl 'a spixn eb' 'anma 'a yolyib'n̈q'uinl tic, sec wach' a eb' tzya'ch sc'ojl 'ayin, man̈x 'a q'uic'q'uinl 'a spixn eb'.

⁴⁷ A eb' tz'ab'n in paxti', toto matz yiclj eb', man̈oc in 'oj wa'ch yailal 'a yib'n̈ eb'. Yujto man̈ yujoc wa'n 'och syailal eb' 'anma', in jaw 'a yolyib'n̈q'uinl tic, palta yuj wul wa'n colchjoc eb', in jawi.

⁴⁸ A eb' may wel'ch 'a sat, eb' matz yiclni in paxti', toxn 'ayc' xon jun 'oj 'a'nc 'och syailal eb', atn in paxti tzwalcn tic. Yuj in paxti tic, 'oj 'ajxc 'och syailal eb' 'a slajb' c'ual.

⁴⁹ Yujto man̈ munoc tzin paxtin in ch'ocj 'a yol wico'. A 'in Mam checjnacn coti, a aljnac schecnb'il 'ayin tas tzwul wala'.

⁵⁰ Wojtac, yuj schecnb'il cha, tztac' schan eb' 'anma sq'uinl 'a jun 'ejmn̈ej. Yuj cha, 'icha yaj yaln in Mam 'ayin; 'ixta tzwutj walni, xchi Jesús.