Jn 11 - Chuj San Sebastian Bible

A schaml Lázaro

¹ A 'a jun aldea Betania sb'i, ata 'ay jun winc caw ya'ay, Lázaro sb'i winac. 'Ay chawn̈ yanab', jun 'ix tzcuch María, junx 'ix tzcuch Marta. Ata 'ayc' eb' yet'oc.

² A 'ix María cha, a 'ix sucjnac 'och yal su'q'ui sjab' 'a yoc Jesús, sucn tacjoc 'ix yet' xil sjolom. Ax win Lázaro cha, caw ya'ay.

³ Yuj cha, 'ix ya'n 'at eb' yanb' chi sti 'a Jesús, 'ix yaln 'at eb' 'ixtic: —Mamin, a jun a wach'c'ojl 'a tic, caw ya'ay ticnec, xchi eb'.

⁴ Xlajw yab'n Jesús tas 'ix yalb't eb', 'ix yaln 'ixtic: —A jun yab'il cha, ma'oj cham win yuj 'a jun 'ejmn̈ej. 'Ix yamchj win yuj jun yab'il cha, sec 'oj sch'ox Dios to caw niwn yel'chi. Ax scheclj pax 'eli, to caw niwn wel'ch pax an Yunnaln Dios tic, xchi Jesús.

⁵ A Jesús, caw 'ay schamc'ojlal 'a Lázaro cha. 'Ay schamc'ojlal pax 'a María yet' 'a Marta cha.

⁶ Palta ax yic 'ix yab'ni, to caw ya'ay Lázaro, ma'ix 'at muc'uc. Chab' to c'u x'ec' yu'uj.

⁷ Xlajw cha, 'ix yaln 'a eb' scuywum 'ixtic: —Coyc 'a lugar Judea jun 'ejm xo, xchi 'a eb'.

⁸ 'Ix yaln eb' scuywum chi 'ixtc 'a 'a: —Palta Mamin, caw jaye nant c'u xya'lj ewin 'aj Judea chi ach sjuln cham 'a cha. ¿Tom tza nib'j tzach 'at jun 'ejm xo ta'? xchi eb' 'a 'a.

⁹ Yuj cha, xyaln pax 'ixtc 'a eb': —Cojquec, to 'ay lajchwe hora tz'ec' 'a junjn c'u. Toto tzon̈ b'eyc' 'a c'ual, matz on̈ comn telwi, yujto sacq'uinal.

¹⁰ Palta ax eb' tzb'eyc' 'a 'ac'wal, tzcomn telw eb', yujto may sacq'uinl 'a eb', xchi Jesús.

¹¹ Xlajw yaln jun tic, 'ix yaln 'ixtc pax yuj Lázaro: —A jun qui wach'c'ojlec cha, to tzwayi, palta 'oj 'at in pitzl swayn̈ cha, xchi 'a eb'.

¹² —Palta Mamin, toto tzwayi, tecn 'oj b'oxc sc'ojol, xchi eb' scuywum cha.

¹³ Yic xyaln Jesús to tzway Lázaro cha, tznib'j tzch'ox 'a eb', to chamnc xo. Palta snan eb', ton̈j tzwayi.

¹⁴ Yuj cha, tojln̈ej xyutj yaln 'ixtc 'a eb': —Tox 'ix chami.

¹⁵ A ticnec caw tzin tzalji, yujto man̈toc 'ayn 'ec' ta' yic 'ix chami, sec 'oj e wach' 'a'c 'och e c'ojl 'ayin. Al ticnec, coyc 'at quila', xchi 'a eb'.

¹⁶ Ax Tomás, tzcuch pax Tiyx 'anma', 'ix yaln 'ixtc 'a eb' yit cuywumal cha: —Coyc pax 'at ca'c cham qui b'a yet'oc, xchi.

A Jesús 'a'm q'uinl 'a jun 'ejmn̈ej

¹⁷ Ax yic 'ix c'och eb', 'ix yab'n eb' to yoxjil xo smucx Lázaro cha.

¹⁸ A chon̈b' Betania 'aj 'ayc' cha, ata 'ay 'a stz'ey Jerusalén. 'Ay am junc mel-l legua yaj scal.

¹⁹ Yuj cha, til wal eb' israel 'aj Jerusalén xit' 'a'nc sniwnal sc'ojl María yet' Marta, yuj jun snul'j eb' chi xcham cha.

²⁰ Yic 'ix yab'n Marta to wan sc'och Jesús, 'ix 'at schanc 'ix. Ax María ton̈j xcan 'a yol n̈a.

²¹ 'Ix yaln Marta 'ixtc 'a Jesús: —Mamin, octom 'aych 'ec' 'a tic, 'ix cham win in nul'j tic. Toto 'ixta', ma'ix chami.

²² Palta ax ticnec, wojtac tzann̈j tas 'oj a c'an 'a Dios, a 'oj 'a'nc 'ayach, xchi 'ix 'a 'a.

²³ —A jun a nul'j tic, 'oj pitzwc paxi, xchi Jesús 'a 'ix.

²⁴ —N', wojtac. At 'a slajb' c'ual a yic 'oj pitzwc pax eb' chamnac, atta 'oj pitzwc pax yet' eb', xchi 'ix 'a 'a.

²⁵ —An tic, 'a'm in pitzwc pax chamnac, 'aj q'uinl in paxi. Tzann̈j eb' tzin 'a'n 'och 'a sc'ojol, wach'xam 'oj cham eb', palta 'oj pitzwc pax eb'.

²⁶ Jantcn̈ej eb' pitznto, tzin ya'n 'och eb' 'a sc'ojol, may b'a'n̈ 'oj cham eb'. ¿Tzam a'ch jun tic 'a a c'ojol? xchi Jesús 'a 'ix.

²⁷ —N', Mamin caw tzwa'ch 'a in c'ojol, chajtlto Cristo ach, Yunnal ach Dios. Ach tic, tan̈b'il xon a jaw 'a yolyib'n̈q'uinl tic, xchi 'ix 'a 'a.

'O'nc Jesús yuj Lázaro

²⁸ Xlajw yaln 'ix Marta jun tic, 'ix paxi. 'Ix 'at yawtnoc cot 'ix 'ix snul'ej. C'ultac xyal 'a 'ix 'ixtic: —'Ix jaw qui Cuymal, to tzach yawtj 'ati, xchi 'ix.

²⁹ Xlajwn̈ej yab'n 'ix María jun cha, 'ix q'ue lin̈njoc 'ix muc'uc. 'Ix 'at 'a 'aj 'ayc' Jesús cha.

^30-31 Palta 'ay eb' israel 'ayc' yet' 'ix 'a yol yatut cha. 'Ayc' eb' yac' sniwnal sc'ojl 'ix. Ax xyiln eb', 'ix q'ue lin̈njoc 'ix, 'ix 'at 'ix mu'c 'a 'aj xit' scha 'ix Marta cha, yujto mantzac c'och Jesús 'a yol aldea cha. Tza'n xoj x'at eb' israel chi yuj 'ix, yujto snan eb' to tz'at 'ix 'o'c 'a 'aj mucn win snul'j cha.

³² Xlajw sc'och 'ix 'a 'aj 'aycn Jesús cha, 'ix 'em cumn 'ix 'a yojltac. Xyaln 'ix 'ixtc 'a 'a: —Mamin, octom 'aych 'ec' 'a tic yic 'ix cham win in nul'j tic. Toto 'ixta', ma'ix chami, xchi 'ix.

³³ 'Ix yiln Jesús to tz'oc' 'ix, tz'oc' pax eb' israel ajun yet' 'ix cha. Yuj cha, caw x'och pitz'n cuslal 'a spixn yet' eb'.

³⁴ 'Ix sc'anb'n 'ixtc 'a eb': —¿'Ajtil xe muc winac? xchi. —Mamin, coyc 'at quil nab'an, xchi eb' 'a 'a.

³⁵ A Jesús 'ix 'oq'ui.

³⁶ Ax eb' israel chi 'ayc' ta', 'ix laj yalnc eb' 'ixtic: —'In caw chamc'ojlb'il win yu'uj, xchi eb'.

³⁷ 'Ay pax eb' xlaj alni: —Palta a Jesús tic, a 'a'jnac jacwc sat jun win matz uj yilni. ¿Tom matz tac' 'ix colwj 'a win Lázaro tic, sec ma'ix cham winac? xchi eb'.

Pitzwnac pax Lázaro yuj Jesús

³⁸ Ax Jesús, an̈ja pitz'n 'och cusc'ojlal 'a 'a, yic 'ix c'och 'a 'aj mucn winac. A 'a yol jun q'uen olb'il, ata 'aych sniwnal winac. 'Aych can pax jun q'uen smacloc.

³⁹ —'Ijec 'el smac q'uen tic, xchi Jesús. Ax 'ix Marta, 'ix yanb' winac, 'ix yaln 'ix 'ixtc 'a Jesús: —Palta Mamin, yoxjil xo scham winac, tecn 'ayx sjab' win ticnec, xchi 'ix.

⁴⁰ —Tox xwal 'ayach, toto tzin a'ch wal 'a a c'ojol, 'oj el nab'n spoder Dios, xchi 'a 'ix.

⁴¹ 'Ixta to b'i'an, 'ix yi'n 'el eb' q'uen smac chi 'aj 'aycn 'och winac. Ax Jesús, 'ix q'ue q'ueln 'a satcha'an̈, 'ix yaln 'ixtic: —Mamin, yuj wal dios 'ayach, 'ix ab' tas 'ix wala.

⁴² Wojc xoni to smasnil tiempo tzab' tas tzwala. Palta yuj eb' 'anma tic, tzwaln jun tzo'n̈ tic 'ayach, sec wach' 'oj ya'ch eb' 'a sc'ojol, chajtlto ach checjnacn coti, xchi Jesús.

⁴³ Xlajw yaln jun tzo'n̈ tic, caw 'ip 'ix 'awj cha'an̈: —Lázaro, 'eln̈ta, xchi.

⁴⁴ Ax win chamnc cha, 'ix 'el paxta. B'a'nto 'och jun tzo'n̈ nip 'a yoc yet' 'a sc'ab'. 'Ay pax jun xotn 'ejm 'a sti'. Yuj cha, xyaln Jesús 'ixtic: —Xuyc 'el jun tzo'n̈ nip tic 'aych 'a 'a, xchi 'a eb'.

Sayjnac eb' yajal tas tz'aj scham Jesús

⁴⁵ Ax eb' israel chi ajun yet' 'ix María cha, 'ix yiln eb' tas 'ix b'o yuj Jesús. Yuj cha, til wal eb' xya'ch sc'ojl 'a 'a.

⁴⁶ Palta 'ay jun tzo'n̈ xo eb' x'at alnoc yab' ewin fariseo, tas 'ix b'o yu'uj.

⁴⁷ Ax ewin fariseo cha, yet' eb' sat ya'mal 'och sti eb' israel 'a Dios, 'ix sc'umj sb'a ewin yet' eb' sat yajal. 'Ix laj yalnc eb' 'ixtic: —¿Tas tzcutjec tze na'a? Yujto til wal jun tzo'n̈ milagro wan sch'oxn jun winc cha.

⁴⁸ Toto ton̈j tzquilc win ticnec, smasnil eb' quit chon̈b'ec, 'oj ya'ch eb' sc'ojl 'a winac. Ax ewin yajl 'a Roma, 'oj wul smac' poj ewin jun yatut Dios tic, ax ya'n pax ewin owl yet' eb' quit chon̈b'ec smasnil. Caw 'oj qui canc 'a yaln̈ yuj ewinac, xchi eb'.

⁴⁹ Palta 'ay jun win Caifás sb'i 'a scal eb'. Atn jun chi sat ya'mal 'och sti eb' 'a Dios 'a jun ab'il cha. A 'ix aln pax 'ixtc 'a eb': —Ax tic, caw may xon jac tas eyojtac.

⁵⁰ Matz nachj 'el eyu'uj, to yel xo wach' 'ayn̈ec, toto tzcham jun chi sjelc eb' 'anma smasnil. Toto 'ixta', ma'oj lajwc 'el eb' quit chon̈b'ec tic smasnil, xchi winac.

⁵¹ A win Caifás cha, man̈ munoc xnachj 'el jun chi yu'uj, xyaln jun cha. Palta yujto sat ya'mal 'och sti eb' israel yaj win 'a Dios 'a jun ab'il cha, yuj cha, a 'a win 'ix sch'ox Dios, to 'oj cham Jesús sjelc eb' israel smasnil.

⁵² Man̈ yujocn̈ej eb' israel cha, 'ix schami. 'Ix chami, yic tzmolb'tzan jantc eb' Yunnal Dios t'un̈ctac yajcn 'at 'a yolyib'n̈q'uinl tic, sec junxn̈ej 'oj 'aj eb'.

⁵³ Yuj cha, a 'a jun c'u cha, 'ix 'el yich syamn 'och ewin yajl chi sayn tas tzyutj smiln Jesús.

⁵⁴ Yuj cha, man̈xtzac 'ec' Jesús 'a scal eb' 'aj Judea cha. 'Ix yi'n 'el sb'a 'a jun lugar cha. 'Ix 'at 'a jun chon̈b' Efraín sb'i 'ay 'a sti lum cusltac lu'um. Ata x'och wan yet' eb' scuywum cha.

⁵⁵ Ax yic wan sjapx stiempoal sjaw q'uin̈ yic snanb'il cot yel eb' israel 'a libre, til wal eb' xlaj cot 'a najat, 'ix laj c'och eb' 'a Jerusalén. Yic mantzac 'och q'uin̈ cha, 'ix c'och eb' ta', sec tzb'o sb'a eb' 'icha xon sb'eyb'al.

⁵⁶ A yic 'ayc' eb' ta', til wal xlaj sayc' eb' Jesús. Yet' 'a yamq'uil yatut Dios, 'ay eb' xlaj aln 'ixtic: —¿Tas tze na'a? ¿'Oj jawc am Jesús 'a q'uin̈ tic, mto ma'ay? xchi eb'.

⁵⁷ Ax ewin fariseo yet' eb' sat ya'mal 'och sti eb' israel chi 'a Dios, 'ix ya'n 'elt eb' jun ley, 'a 'aj tzyal 'ixtic: Toto 'ay 'aj tzeyil Jesús, tzwul eyal 'a tic, xchi jun ley cha. 'Ixta xyutj ewin yaln 'eli, yujto tznib'j ewin ya'ch Jesús 'a preso.