Jl 2 - Chuj San Sebastian Bible

Til wal no c'ulb' jawnac

¹ 'Utz'jec q'uen trompeta 'a tzaln Sión. 'Utz'jec q'ue'en yic tzalx yab' eb' cajn 'a lum tzaln yic 'emmquilal yaj 'a Jehová. 'Ib'x cab' chan̈ smasnil eb' cajn 'a Judá, yujto jab'xoj sjaw jun c'u yic 'oj ya'nc Jehová yowl sc'ojol.

² A 'a jun c'u cha, caw q'uic'q'uinl 'oj 'ajoc. 'Oj 'och q'ui'l 'asun, yuj cha, 'oj 'och wewen. A wal no c'ulub', lajn wal no 'icha eb' soldado caw niwn sb'isul. Caw b'essi sb'ey e no 'icha wal sb'ey b'essoc wewen, masnto tzmacchj 'el lum jolmctac witz yu'uj. Mant 'a 'aj ujnc jun tic jun 'ejmoc 'a yic yaln̈taxi, man̈x 'a pax b'a'n̈ 'oj 'ujc jun 'ejm xo.

³ Lajn wal no 'icha te c'ac', c'uxn tzsatl smasnil yu'uj. A wal yic mantzac jaw e no', man̈x jantcoc swach'l yilx lum lu'um, 'icha wal yilx lum Edén. Ax yic 'oj lajwc ye'cn no', lajn 'oj 'ajcn lum 'icha lum cusltac lu'um. Man̈x 'a jac 'oj colchjoc cani.

⁴ A sat no', lajn wal yilx 'icha sat no chej. Caw ji'lti sb'ey no 'icha no chej tz'at 'a owal.

⁵ 'Icha sc'an̈ sb'ey jun tzo'n̈ caruaje tz'at 'a owal, mto 'icha sc'an̈ te tacn̈ xilte' yic tz'a te yuj c'ac', 'ixta wal sc'an̈ scot no 'a lum jolmctac witz. 'Icha pax jun b'ulc eb' soldado to caw 'ay yip, latz'tz'i s'at eb' 'a owal, 'ixta wal no'.

⁶ A eb' 'anma 'a junjn nacion̈, caw 'oj 'ib'xoc eb' yuj xiwlal, 'oj sacb'oc 'el sat eb' yic 'oj yilnc eb' no'.

⁷ 'Icha wal eb' winc caw jeln ya'n owal, caw jeln sb'eyi, tojln̈ej sb'atj 'ec' 'a yib'n̈ jun tzo'n̈ muro, tojln̈ej sb'ey 'a yojltac, man̈ coxquixtacc sb'eyi.

⁸ Matz tenlaj sb'a eb'. Junjn eb', tojl sb'ey eb' 'a sb'e. Matz 'och wan eb' yuj yespada eb' 'ajc'ojl 'a 'a, 'ixta no'.

⁹ A yic tzc'och no 'a junc chon̈ab', tojln̈ej sjen̈w 'ec' no 'a yib'n̈ smuroal, tojln̈ej yoch no 'a yol n̈a. Lajn no 'icha junc 'elc'm tz'och 'a te wentnu.

¹⁰ Caw tz'ib'x lum lum 'a yojltac e no', tzi'mj pax satcha'an̈. Tztup yoc c'u yet' yoc 'uj yuj yen̈l no', man̈x checloc swetzwni c'anal.

¹¹ A Jehová a 'aych 'a yojltac eb' soldado to yico', tzyac' 'ab'xoc yol sjaj 'icha wal sc'an̈ c'u. Caw niwn sb'isl eb' soldado cha, man̈x b'ischjb'enoc eb' tzyiclni schecnb'il. Caw niwn yel'ch jun c'u yic Jehová, 'ay xo smay yalxi. May junc mach tztac' ste'wtzan sb'a 'a yojltac.

Tz'o'ch sc'ojl Jehová

¹² Yuj cha tzyaln Jehová 'ixtic: Palta 'ayt sb'omb'il 'ayex. Meltzjan̈c cot 'ayn yet' smasnil e c'ojol. 'Ochn̈ec 'a c'ajb'c'ojlal, 'el cab' eyaw, 'o'n̈ec, xchi.

¹³ Man̈ colb'ilc ton̈j tze tziljat e pichul, palta cus cab' e c'ojl yuj e mul. Meltzjan̈c 'a Jehová qui Diosalec, yujto caw wach' snab'en 'ayn̈ec. Caw tz'o'ch sc'ojol, 'ay sniwnc'ojlal, 'ay pax schamc'ojlal, tzchaj sc'ojl yi'n 'el jun yailal tic 'a quib'n̈ec.

¹⁴ Meltzjan̈c 'a 'a, toq'ue matz ya'ch yailal 'a quib'n̈ec, ax tz'aji, tzya'n cot yaxilal 'a quib'n̈ec, atn qui trigo, yet' yal qui uva. Yuj cha, 'ay tas tztac' ca'nec ofrendail 'a 'a.

¹⁵ 'Utz'jec q'uen trompeta 'a tzaln Sión sec tzyam sb'a smasnil eb' 'anma', 'ochn̈ec e masnil 'a c'ajb'c'ojlal.

¹⁶ Smolb'tzoc cot cab' sb'a smasnil eb' schon̈b' Dios, sacb'tzoc cab' sb'a eb'. Smolb'tzoc cot cab' sb'a eb' 'ichmtac 'anma', eb' 'unin, yet' eb' tz'ulc 'unn tzat chuwi. An̈jtona eb' tot xlajw snupni, 'elt cab' eb' 'a yol yatut.

¹⁷ 'O' cab' eb' ya'mal 'och qui tic 'a Dios, eb' tz'a'w servil 'a Jehová. A 'a snan̈l yatut Dios yet' jun yet'l xajmb'al, ata tzyal cab' eb' 'ixtic: Mamin Jehová, 'ac' niwnc'ojlal 'a quib'n̈ an̈ a chon̈b' on̈ tic. May cab' mach tzon̈ b'uchni. Man̈ on̈ a cha 'ajxoc ganar yuj jun tzo'n̈ xo chuc chon̈b'al, man̈ yal cab' eb' 'ixtc 'ayn̈ on̈: ¿'Ajtil 'ay e Diosal cha? man̈ xchic cab' eb', xchi cab' eb'.

¹⁸ 'Oj lajwc cha, ax sch'oxn Jehová schamc'ojlal 'ayn̈ec an̈ schon̈b' on̈c tic, caw 'oj 'o'ch pax sc'ojl 'ayn̈ec,

¹⁹ ax yaln 'ixtic: 'Oj wac' e trigo, yal eyuva, eyaceite, masnto 'oj e b'ut'ji. Man̈x 'oj wac' b'uchwjoc eb' chuc chon̈b'al 'ayex.

²⁰ A eb' 'ajc'ojl tzcot 'a stojlal norte, najt 'oj wi'l eb' 'a e tz'ey, ax wa'n can 'at eb' 'a cusltac lu'um. A eb' b'ab'el, 'oj wa'cn 'at eb' 'a yojl a Mar Muerto, ax eb' tzac'an, 'oj 'atcn eb' 'a yojl a Mar Mediterráneo. 'Oj c'a sniwnal eb', ax yaj sjab'. ¡Caw satjub'tac yilx tas 'oj in b'o 'a e cal! xchi Dios.

²¹ Tzalj cab' eb' 'anma cajn 'a sat lum lu'um, man̈ xiw cab' eb' yujto 'ay wal tas niwn yel'ch 'oj sb'o Jehová.

²² Tzalj cab' e no noc' 'ay 'a caltcte', man̈ xiw cab' e no', yujto 'oj yaxb'oc pax chan̈ te c'ultac. A eb' te niwc te', 'oj ya'x eb' te sat, caw 'oj satnc te higo yet' te uva.

²³ E masnil ax cajn ex 'a Sión, tzaljan̈ec. Tzaljan̈c 'a Jehová qui Diosal, yujto 'oj ya'x cot n̈ab'lq'uinl 'a 'ayn̈ec 'a 'icha stiempoal, atn b'ab'l n̈ab', yet' schab'l n̈ab', 'icha tzyac' xon 'a yaln̈taxi.

²⁴ Caw wal wach' 'oj 'ajx 'ixm trigo, niwn yal uva yet' aceite 'oj yac'a.

²⁵ Xyaln Dios 'ixtic: 'Oj in jelx smasnil sat eyawb'en lajwnac 'el yuj no c'ulb' xwa't 'a e cal 'icha eb' soldado.

²⁶ Ax ticnec, 'oj e wa'i masnto 'oj e b'ut'ji, ax eyaln e wach' paxti 'a 'ayn an Jehová e Diosal in, yujto til wal tas satjub'tac xin b'o yuj e wach'loc. Man̈x 'a b'a'n̈ 'oj e can 'a q'uixwc'ojlal.

²⁷ Ax snachj 'el eyuj ax israel ex tic, to an Jehová in, caw 'ayn 'ec' 'a e cal. Cojn in ton e Diosal in, may junc xo. Man̈x 'a b'a'n̈ 'oj e can 'a q'uixwc'ojlal.

'Oj jawc Yespíritu Dios

²⁸ A yic 'oj jawc jun slajb' tiempoal, 'oj wa'ch Wespíritu 'a smasnil 'anma'. Ax eb' 'unnab'il yet' eb' 'islab'il 'oj alnc 'el in paxti'. A eb' 'ichmtac 'anma', 'oj in paxtin 'a eb' 'a swayich, ax eb' quelmtac, 'oj in ch'ox jun tzo'n̈ tas 'a eb', 'a 'icha waychil.

²⁹ A 'a yic jun tiempoal cha, 'oj wa'ch Wespíritu 'a jantcn̈ej eb' tzin 'a'n servil, wach'xam winac, wach'xam 'ix.

³⁰ 'Oj in ch'ox jun tzo'n̈ tas satjub'tac yilx 'a satcha'an̈, yet' pax 'a yolyib'n̈q'uinl tic, atn chic' yet' c'ac', yet' pax jun niwn tab' 'icha 'asun.

³¹ 'Oj 'och q'uic'q'uinl 'a c'u, ax 'uj caw chac 'oj 'aj 'icha chic'. A jun tzo'n̈ tic, 'oj ujoc 'a yic mantzac jaw sc'ul in jaw an Jehová in tic. A jun c'u cha, caw niwn yel'chi, caw 'ay smay.

³² Palta ax smasnil eb' tzyal sb'a 'ayn an Jehová in, 'oj colchjoc can 'el eb'. 'Icha wal yaj waln cani, to a 'a tzaln Sión 'a Jerusalén, 'ay eb' 'oj colchjoc, a eb' sic'b'il 'el wu'uj, ma'oj cham eb'.