Jl 1 - Chuj San Sebastian Bible

¹ An Joel in tic, yunnal in Petuel. An xin tz'ib'j jun libro tic tzaln yuj spaxti Jehová xyal 'ayin.

Xlajw 'el 'awb'en yuj no c'ulub'

² 'Ab'c wal jun tzo'n̈ tic ex yichm wincal chon̈ab', yet' e masnil ax cajn ex 'a jun nacion̈ tic. Toc 'ayx 'aj xeyil tas lajn 'icha jun tic. Toc am 'ay 'aj x'ilx junc tas 'icha jun tic yic yec' eb' qui mam quichmec.

³ Alc jun tzo'n̈ tic 'a eb' eyunnal, ax eb' 'oj alnc 'a yunnal, ax pax eb' chi 'oj alnc 'a eb' 'oj 'aljoc yic b'aq'uin̈.

⁴ A smasnil tas 'awb'il, sc'ux 'ejm no c'ulub', ax jantc to tas 'ix cani, chuc jun tzo'n̈ xo no xwul wach' c'uxnc 'ejmi.

⁵ A wal ax 'u'm ex 'an̈, pitzc 'el e wayan̈. Ex 'u'm yal uva to jawnc sti', caw wal 'o'n̈ec, yujto 'oj 'ijxoc 'ec' te yal uva chi 'ayex.

⁶ 'Icha wal jun b'ulc eb' soldado caw wal 'ay smay, 'ixta wal x'aj sjaw no c'ulb' 'a sat qui lumec. Caw man̈xtzac b'ischj no'. 'Ay ye no 'icha no león.

⁷ Tox 'ix yixtj 'el no te uva, tox satl no te higo. C'uxn xyij 'el no stz'umal te', sac xlaj 'aj scal sc'ab' te'.

⁸ 'O'n̈ec 'icha junc 'ix cob's 'ix tz'oc' yuj schamlil win winc xyac' sti snupn yet' 'ix, tzya'n 'och 'ix spichl yic cusc'ojlal.

⁹ 'Ixta cab' tz'aj yoc' eb' ya'mal 'och qui ti 'a Dios, yujto man̈x 'a tas tzc'uxxi, man̈x 'a pax yal uva 'a yatut Dios, atn wal jun tzo'n̈ ofrenda tz'ajx 'a Jehová.

¹⁰ Caw xjuw 'el yilx smasnil lugar, 'icha to 'aych lum lum tic 'a cusc'ojlal. Xlajw 'ejm 'ixm trigo, xtacj 'el te uva, xtacj pax 'el te olivo.

¹¹ Ex munljum, 'o'n̈ec, cusn̈ec, yujto caw xlajw 'ejm eyawb'en uva. Man̈x 'a polj trigo yet' cebada.

¹² Tox xtacj 'el te uva, tox xlajw 'ejm te higo. Xtacj pax 'el te granado, te palma, te manzan, yet' pax smasnil te 'awb'ente'. 'Ixta x'aj slajw 'ejm stzaljc'ojlal eb' 'anma'.

Tz'ajx sna sb'a eb' israel

¹³ A wal ax tic ex ya'mal 'och qui ti 'a Dios, ex tzex 'a'w servil 'a jun yet'l xajmb'al, 'a'c 'och e pichl n̈achtac sat yic cusc'ojlal. 'Ochn̈ec 'a yojl yatut Dios yuj tan̈j 'ac'wal. 'O'n̈ec yuj yailal, yujto a 'a yatut Dios man̈x 'a 'ixm trigo yet' yal uva tz'ajx ofrendail.

¹⁴ 'Awtjec cot smasnil eb' 'anma', 'ochn̈ec 'a c'ajb'c'ojlal yet' eb'. Molb'tzejec e b'a 'a yatut Jehová qui Diosal, yet' smasnil eb' yichmtac wincal chon̈ab', yet' smasnil eb' 'anma 'a jun nacion̈ tic yic tzex tew 'a Jehová.

¹⁵ ¡'Oltacn̈ec, caw la'nxoj sjaw jun c'u yic yowl sc'ojl Jehová! Atn jun c'u caw 'ay smay yic 'oj satl smasnil nacion̈ yuj Dios tztac' yuj smasnil.

¹⁶ Q'uelnon̈c wal 'ochi, 'ix 'ijx 'ec' tas tzqui c'uxec, 'ix lajw tzaljc'ojlal 'a yatut qui Diosalec.

¹⁷ A 'ixm 'in̈at, ton̈j xc'a 'ixm 'a yol lu'um, yuj cha, man̈x 'a 'ixm trigo. Ax jun tzo'n̈ sc'un̈ail, wan laj slan̈chj 'ejmi yujto man̈x 'a tas 'ay 'a yojol, man̈x 'a pax n̈ab'.

¹⁸ Caw tz'el yaw e no cajb'en noc' yec' yuj wejel. Tzlaj 'ec' e no wacx say cob' te c'ultac. 'Ipn laj scham e no calnelu yuj wejel.

¹⁹ ¡Mamin Jehová, tzin tew 'ayach! yujto caw wal xtacj 'ejm smasnil te c'ultac, 'icha to stz'a te c'ultc 'aj wach' xon swa e no noc', yet' 'a smasnil caltcte'.

²⁰ An̈jtona pax smasnil no calte'al noc', caw tz'el yaw no 'ayach, yujto xtup 'ejm smasnil eb' a a', 'icha to stz'a te c'ultc smasnil.