Jeremías 9 - Chuj San Sebastian Bible

¹ ¡Comnoc wal lajn yol in sat tic yet' junc a spac'b'a tz'el yoctac, sec sc'ual, yac'wlil woc' yuj smasnil eb' wit chon̈b' xlaj chami!

² ¡Comnoc wal 'ay junc wet'l 'aj wach' in c'och cajn 'a cusltac lu'um, sec najt tzin 'elcn 'a stz'ey eb' wit chon̈b' tic! Yujto 'ix yij 'el sb'a eb' 'a stz'ey Dios, 'ixtm 'anma pax eb'.

³ Caw jeln eb' ya'n 'es, cojxn yuj 'es tzlaj q'ue'ch eb' ricoal. Man̈x 'a tas yel tzalx 'a jun nacion̈ tic. Yuj cha, tzyaln Jehová 'ixtic: Cojxn maysch'olnil tzb'o eb', caw man̈xtzac snib'j eb' tzin yalch sDiosaloc.

⁴ Ach Jeremías, a smasnil eb' a wach'c'ojol, yet' eb' o'tac, caw tzyac' eb' 'es 'a apatic, yuj cha, man̈x a'ch eb' yipc a c'ojol.

⁵ Tzlaj yixtj paxti sb'a junjn eb', may junc mach yel tas tzyala. Tox xc'ayl eb' ya'n 'es, man̈xtzac stac' sjeln eb' snab'en.

⁶ A wal et'l 'aj cajn ach 'eq'ui, ata 'ayc' 'a scal eb' tz'ixtn eb' 'anma'. Yujto caw tzya'ch eb' sc'ojl yixtn yit 'anma'il, yuj cha, caw man̈xtzac snib'j eb' tzin yalch sDiosaloc.

⁷ Yuj wal cha, an Jehová in, tztac' wuj smasnil, an tzwala: ¿Tas to wal junc xo tztac' in b'on yet' eb' in chon̈b' tic? Cojn to 'oj wa't eb' 'a scal c'ac', sec tz'och eb' wach'il, 'icha tzyac' q'uen plata.

⁸ A sti eb', lajn wal 'icha junc jul-lab' caw tojln̈ej scham 'anma yu'uj. Cojxn 'es tzlaj 'ec' yal-l eb'. Caw wach' cob' tzyutj eb' ya'lanc stzatzl sc'ojl junc swach'c'ojol, palta ax 'a snab'en eb', wan snan eb' tas tzyutj eb' ya'n telwc junc cha.

⁹ ¿Tom man̈ smojc wa'n syailal eb' yuj tas tzb'o cha? An Jehová in, an tzwala, to caw smoj wa'n spac 'a junc chon̈b' 'ixta tzb'o'o, xchi Dios.

¹⁰ 'Ix waln an Jeremías in tic 'ixtic: Caw tzin 'oc' yuj eb' lum jolmctac witz, tzin cus yuj eb' lum 'a'lic 'aj wach' swa e cajb'en noc', yujto 'ix tz'a smasnil, man̈x 'a mach tztac' sb'eyc' ta'. Man̈x 'a junc wacx tz'el yaw; an̈jtona e no ch'ic yet' e no calte'al noc', 'ix 'at e no 'elc smasnil, xin chi.

¹¹ 'Ix wab' spacn Jehová 'ixtic: A yic 'oj lajwc in b'on jun tzo'n̈ tic, a Jerusalén yet' Judá, jun b'uln̈ 'oj wutc in ma'n 'ejm lan̈chjoc cani. Axn̈ej no 'ocs 'oj 'ec' ta', xchi Dios.

¹² 'Ix waln 'a Jehová 'ixtic: May junc on̈ tznachj 'el cu'uj tas yuj a jun qui chon̈b' tic x'ochcn 'a cusltac lumal. Al 'ayn̈ on̈ tas yuj 'ixta 'ix 'aji, xin chi 'a 'a.

¹³ 'Ix ta'w Jehová 'ayn 'ixtic: 'Ixtc x'aji, yujto xyactj can eb' chon̈b' in ley xwac' 'a 'a. Ma'ix schaj eb' yab' tas xwala, ma'ix syiclj eb'.

¹⁴ Caw 'ix yac' pitb'oc 'el eb' snab'en, ax 'a jun tzo'n̈ comn dios 'ix 'och tza'n eb', 'icha wal yaj scuyx can eb' yuj smam yicham.

¹⁵ Yuj cha, an ton tic Jehová in, tztac' wuj smasnil, sDiosal in Israel, an tzwal 'ixtic: 'Oj wac' sc'ux eb' tas to caw wal c'a, ax wa'n yuc' eb' a a 'ay't veneno 'a scal.

¹⁶ Ax wa'n sactzic can 'at eb' 'a scal jun tzo'n̈ nacion̈ to man̈ 'ojcab'ilc yuj eb', man̈ 'ojc'ab'ilc pax yuj smam yichm eb'. Ax wa'n pechxoc b'eyc'oc eb' yet' q'uen espada, masnto 'oj satl eb' smasnil, xchi Dios.

Cusc'ojlal 'a Jerusalén

¹⁷ A Jehová tztac' yuj smasnil, a tzaln 'ixtic: Macljec eyab' tas 'oj wala', 'a'c 'awtxoc cot eb' 'ix 'ix to tojb'il yoc' yuj eb' chamnac, atn eb' 'ix to 'aycn 'och 'a yib'n̈ yoq'ui, xchi.

¹⁸ Ax eb' 'aj Jerusalén cha, 'oj yal eb' 'ixtic: Cot cab' eb' 'ix muc'uc, 'o' cab' eb' 'ix yuj qui cusc'ojlalec. Lojx cab' 'el yol qui satc coq'ui, 'em cab' jichljoc yal qui sat 'a xil yol qui sat.

¹⁹ A 'a chon̈b' Sión, caw tz'ab'x yoch 'oc'l yuj cusc'ojlal, yal cab' eb' 'ixtic: Caw wal 'oltacn̈ec, tox on̈ lajwec 'eli, caw wal tzcab'c syal q'uixwc'ojlal. A ticnec yowlal 'oj cactquec can jun qui chon̈b'ec tic, yujto tox 'ix lajw slan̈chj 'ejm catutec, xchi cab' eb' tz'oc' cha, xchi Jehová.

²⁰ Ex 'ix, macljec eyab' spaxti Jehová, 'a'c wal 'och e chicn 'a scuynb'il. Cuyc eb' 'ix eyune yoc' yuj cusc'ojlal, tzeyaln pax 'a eb' e wach'c'ojol, 'o' cab' eb' yuj chaml tzlaj uji.

²¹ A chamel, tox 'ix 'och 'a yol catutec, tox 'ix c'och 'a yol despacho. Tzlaj cham eb' 'unn 'a yoltc caye, ax eb' quelmtac, tzlaj cham eb' 'a yol chon̈ab'.

²² 'Ix yal Jehová 'ayn 'ixtic: Al 'a eb' to an Jehová in tzwal 'ixtic: A sniwnal eb' 'anma', b'ulctac 'oj 'ajcn 'a 'a'lic, 'icha tz'ajcn tzicn stza no noc', 'icha pax tz'ajcn tzicn 'ixm schon trigo 'a spatquil eb' polm trigo, man̈x 'a junc mach 'oj si'noc, xa chi 'a eb', xchi Dios 'ayin.

A junc 'anma tz'ojcan 'el Dios

²³ 'Ix yaln pax Jehová 'ixtic: A eb' jelan, man̈ cab' yac' eb' tzaljoc sc'ojl yet' sjelnal. An̈jtona eb' 'ay yip, man̈ cab' yac' eb' tzaljoc sc'ojl yet' yip, an̈jtona eb' rico, man̈ cab' yac' eb' tzaljoc sc'ojl yet' sricoal cha.

²⁴ An Jehová in, an tzwala, toto 'ay mach tznib'j tzyac' tzaljoc sc'ojol, tzalj cab'i', yujto tzin yojquej 'eli, chajtlto an ton Jehová in, wach' tzwutj in b'a 'a sat lum lum tic yet' chamc'ojlal yet' pax tojlal. Atn jun tzo'n̈ tic tzchaj in c'ojol, xchi Dios.

^25-26 'Ix yaln pax Jehová 'ixtic: Wan sjaw stiempoal yic 'oj wa'nc 'och syailal eb' 'aj Egipto, eb' 'aj Judá, eb' 'aj Edom, eb' 'aj Amón, eb' 'aj Moab, yet' eb' cajn 'a lum cusltac lu'um, atn eb' tzjoxl xil sjolm 'a spac'b'il sjolom. A smasnil jun tzo'n̈ 'anma tic, tzcob' ya'ch eb' yechl circuncisíon 'a sniwnal, palta matz yac' eb' 'emmquilal 'ayin. An̈jtona pax eb' israel, tzcob' ya'ch eb' yechl circuncisión 'a sniwnal, palta matz yiclj eb' jun in trato tzch'ox jun yechl cha, xchi Dios.